“Parlament nazorati toʻgʻrisida”gi Oʻzbekiston Respublikasi Qonunining 14-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. “Suv resurslaridan samarali foydalanish, suvni tejaydigan sugʻorish uslublari va texnologiyalarini joriy etish hamda magistral va ichki kanallarni betonlashtirish ishlarining borishi toʻgʻrisida”gi Oʻzbekiston Respublikasi Oliy Majlisi Qonunchilik palatasining parlament soʻroviga Oʻzbekiston Respublikasi suv xoʻjaligi vaziri Sh. Xamrayev tomonidan yuborilgan yozma javob maʼlumot uchun qabul qilinsin.

2. Oʻzbekiston Respublikasi Vazirlar Mahkamasiga Oʻzbekiston Respublikasi Suv xoʻjaligi vazirligining yozma javob maʼlumotida taklif etilgan sugʻorish tarmoqlarini betonlashtirish ishlarini ragʻbatlantirish maqsadida qishloq xoʻjaligi ishlab chiqaruvchilariga subsidiyalar va imtiyozli kreditlar ajratish, suv obyektlarini betonlashtirgan hamda soz holatda saqlagan suv isteʼmolchilari uchun soliq toʻlovlari boʻyicha imtiyozlar berish mexanizmlarini joriy qilish masalasini koʻrib chiqish tavsiya etilsin.

3. Oʻzbekiston Respublikasi Oliy Majlisi Qonunchilik palatasining Agrar va suv xoʻjaligi masalalari qoʻmitasi parlament soʻrovini koʻrib chiqish natijalari boʻyicha belgilangan chora-tadbirlarning ijro etilishi yuzasidan parlament nazoratini amalga oshirsin.

4. Ushbu Qaror qabul qilingan kundan eʼtiboran kuchga kiradi.