Инвестиция киритиш мажбурияти билан энг яхши таклифни танлаб олиш орқали тадбиркорлик субъектларига ер майдонларини узоқ муддатли ижара ҳуқуқи асосида ажратиб бериш тартиб-таомилларини соддалаштириш, шунингдек, ер участкаларини ажратиш ҳужжатларини тайёрлаш ва келишиш жараёнларини рақамлаштириш мақсадида Қорақалпоғистон Республикаси Вазирлар Кенгаши қарор қилади:

1. Қорақалпоғистон Республикаси Вазирлар Кенгашининг «Йирик инвестиция лойиҳасини амалга ошириш учун энг яхши таклифни танлаб олиш ва ер участкаларни тўғридан-тўғри ижарага бериш тўғрисида» 2025 йил 28 апрелдаги 208-13-0-Қ/25-сонли қарорига қуйидагиларни назарда тутувчи ўзгартириш ва қўшимчалар киритилсин:

инвестиция киритиш мажбурияти билан энг яхши таклифни танлаб олишда ер участкаларни танлаш, ажратиш ҳужжатлари «YERELEKTRON» автоматлаштирилган ахборот тизими (кейинги ўринларда — электрон тизим) орқали амалга оширилиши ҳисобига келишиш муддатлари ва босқичларини қисқартириш;

жисмоний ва юридик шахслар томонидан ўзлари танлаган ер участкаларини ажратиб бериш бўйича таклифларини электрон тизим орқали киритиш имкониятини яратиш;

инвестиция лойиҳаси доирасида экологик, геологик экспертизалар ўтказиш ва бошқа турдаги рухсат бериш билан боғлиқ босқичлар бевосита ер майдони ажратиб берилгандан кейин амалга оширилишини белгилаш.

2. «Йирик инвестиция лойиҳасини амалга ошириш учун энг яхши таклифни танлаб олиш ва ер участкаларини тўғридан-тўғри ижарага бериш тартиби тўғрисидаги низом» 1-иловага мувофиқ;

«Йирик инвестиция лойиҳасини амалга ошириш учун энг яхши таклифни танлаб олиш ва ер участкаларини тўғридан-тўғри ижарага бериш масаласини кўриб чиқиш бўйича комиссия таркиби» 2-иловага мувофиқ тасдиқлансин.

3. Қорақалпоғистон Республикаси Вазирлар Кенгашининг «Йирик инвестиция лойиҳасини амалга ошириш учун энг яхши таклифни танлаб олиш ва ер участкаларни тўғридан-тўғри ижарага бериш тўғрисида» 2025 йил 28 апрелдаги 208-13-0-Қ/25-сонли қарорининг:

4-бандидаги «1-июнь санасига қадар» сўзлари «1-октябрь санасига қадар» сўзлари билан алмаштирилсин;

«Қорақалпоғистон Республикаси Вазирлар Кенгашига сўзлари» ««YERELEKTRON» автоматлаштирилган ахборот тизими орқали» сўзлари билан тўлиқтирилсин;

2-, 5- ва 6-бандлари ўз кучини йўқотган деб ҳисоблансин.

4. Мазкур қарор қабул қилингунга қадар Республика комиссияси қарорлари билан маъқулланган лойиҳалар бўйича ер участкаларини ажратишда «YERELEKTRON» автоматлаштирилган ахборот тизими орқали келишиш талаб этилмайди, шунингдек, ушбу ер участкаларида амалга оширилаётган лойиҳалар бўйича давлат экология экспертизасини ўтказиш ушбу қарор билан тасдиқланган Низом асосида ер участкалари ажратилгандан сўнг ўтказилиши белгилаб қўйилсин.

5. Вазирлик, идора ва ташкилотлар бир ой муддатда ўзлари томонидан қабул қилинган ҳужжатларини ушбу қарор талабларига мувофиқлаштирсин.

6. Мазкур қарорнинг бажарилишини таъминлаш ва назорат қилиш Қорақалпоғистон Республикаси Вазирлар Кенгаши Раисининг ўринбосарлари (Жоллибеков, Тешаев ва Юсупов) зиммаларига юклансин.