Ўзбекистон Республикаси Олий Мажлиси Қонунчилик палатаси ва Олий Мажлис Сенатининг 2019 йил 14-сентябрдаги «Тўйлар, оилавий тантаналар, маърака ва маросимларни тартибга солиш тўғрисида»ги 2736-III/КҚ-592-III-сонли Қўшма қарорини баъзи бир ҳудудларда тўлиқ ижро этилмаслиги сабабли, тўй-ҳашам, маросим ва унга доир турли оилавий тадбирлар исрофгарчилик ва дабдабабозлик билан ўтказилиши кенг жамоатчиликни ташвишга солаётганлиги, аҳолининг таклиф ва мурожаатларига мувофиқ, «Маҳаллий давлат ҳокимияти тўғрисида»ги Ўзбекистон Республикаси Қонунининг 6 ва 24-моддаларига асосан, халқ депутатлари Ғозғон шаҳар Кенгаши қарор қилади:

1. Ўзбекистон «Миллий тикланиш» демократик партияси таклифига биноан, шаҳарда «Тўйлар, оилавий тантаналар, маърака ва маросимлар ўтказилишини тартибга солиш тизимини янада такомиллаштириш тўғриси»да Шаҳар маданият бўлими бошлиғи Ш.Раҳмоновнинг ахбороти маълумот учун қабул қилинсин.

2. Тўйлар, оилавий тантаналар, маърака ва маросимлари каби тадбирлар ўтказилишини тартибга солиш масалалари бўйича халқ депутатлари шаҳар Кенгаши депутатлари, Ўзбекистон Маҳаллалар уюшмасининг шаҳар бўлими, «Нуроний» жамғармаси шаҳар бўлими, Маънавият ва маърифат маркази шаҳар бўлими, оила ва хотин-қизлар бўлими, Ёшлар ишлари агентлиги шаҳар бўлими ва бошқа ҳудудий давлат ҳамда нодавлат нотижорат ташкилотлар билан биргаликда кенг жамоатчиликнинг мувофиқлаштирувчи «Жамоатчилик Кенгаши» таркиби иловага мувофиқ тасдиқлансин.

3. Ўзбекистон Республикаси Олий Мажлиси Қонунчилик палатаси ва Олий Мажлис Сенатининг 2019 йил 14 сентябрдаги 2736-III/КҚ-592-III-сонли Қўшма қарори Низоми талабларига асосан, «Жамоатчилик Кенгаши»нинг мақсад ва вазифалари қуйидаги тартибда белгилансин:

- шаҳар ҳудудида ўтказиладиган тўйлар, маърака ва маросимлар, оилавий унга доир бошқа тадбирларида жамоатчилик назоратини ўрнатиш, ҳамда тўй ва маросим эгалари билан ихчам, исрофгарчиликсиз ва белгиланган талаблар асосида, ўтказиш бўйича тушунтириш ишларини олиб бориш;

- кенг жамоатчилик вакилларини жалб қилган ҳолда, мазкур тадбирларни тартибга солиш ҳамда ихчам ва миллий қадриятлар, урф-одатлар ва анъаналар асосида ўтказиш бўйича аҳоли ўртасида тарғибот ишларини амалга ошириш;

- мазкур тадбирларни амалга оширишда ижтимоий табақаланишга йўл қўймасдан ўтказиш бўйича жамоавий суҳбатлар ташкил этиш;

- мазкур тадбирларни ўтказишни режалаштирган оила вакиллари билан, айниқса, никоҳнинг илк даврларида эр-хотин ва уларнинг ота-оналари ўртасидаги муносабатларни мустаҳкамлаш борасида суҳбатлар ташкил этиш;

- хотин-қизларга мазкур тадбирларни камхаражат қилиб ўтказишни, уларда ортиқча исрофгарчиликка берилиш оила иқтисодига ва ёш оиланинг мустаҳкамлигига салбий таъсир кўрсатишини ҳаётий мисоллар орқали кенг тушунтириш;

- турмуш қуриш арафасида турган ёшлар билан ижтимоий-психологик суҳбатлар уюштириши, уларни оилавий ҳаётга тайёрлаши, мазкур тадбирларни ихчам ва исрофгарчиликсиз ўтказиш бўйича тарғибот ишларини олиб бориши бўйича ишларни амалга ошириш тавсия этилсин.

4. Тўйлар, оилавий тантаналар, маърака ва маросимлар фақат бир кун (дафн этиш маросими бундан мустасно) соат 06:00 ва 23:00 оралиғида ўтказиш, Соат 23:00 дан кейин тўйлар, оилавий тантаналар, маърака ва маросимларни давом эттиришга йўл қўйилмаслик;

- тўйлар, оилавий тантаналар, маърака ва маросимларда 200 нафаргача, мазкур тадбирлар муносабати билан ош бериш маросимида 250 нафаргача киши қатнашиши;

- қўшалоқ тўйларда 250 нафаргача, у билан боғлиқ ош бериш маросимида 300 нафаргача киши қатнашиши мумкинлиги;

- никоҳни давлат рўйхатидан ўтказиш, келин-куёвнинг тўйхонага келиши ва кетиши билан боғлиқ оилавий тадбирларда 3 тадан кўп бўлган енгил автомашинадан ёки жамоат хавфсизлигига таҳдид солувчи бошқа транспорт воситаларидан фойдаланмаслик (тўй эгаларининг шахсий автомашиналаридан ҳамда ҳомийлар ёрдамида жалб этилган автотранспорт воситаларидан фойдаланилган ҳоллар бундан мустасно);

- дафн этиш ва мотам маросимлари кўпи билан уч кун мобайнида чекланмаган миқдордаги фуқаролар иштирокида ўтказилиши мумкин (ош бериш маросими бундан мустасно).

5. Кенгашнинг ушбу қарори билан аҳолини таништириш мақсадида шаҳардаги барча МФЙлари, аҳоли яшаш ва меҳнат жамоалари жойларига ҳамда ресторан, ошхона, кафе ва тўйхоналарда тадбирларни ўтказиш тартиб таомилларини алоҳида эслатма тарзида тайёрланиб қўйилиши таъминлансин.

Жамоатчилик Кенгаши томонидан амалга оширилган ишлар ҳар чоракда кенг муҳокама қилиб борилсин ва бу ҳақида жамоатчиликка хабардор қилинсин.

6. Шаҳар бош имом-хатиби (Й.Бомуллаев)га:

- тўйлар, оилавий тантаналар,маърака ва маросимларда диний мавзуда маъруза кўзда тутилган бўлса, ушбу маъруза диний ташкилотининг ваколатли вакили томонидан ўқилиши;

- тўйлар, оилавий тантаналар, маърака ва маросимлар, хотирага бағишланган тадбирларни ихчам ўтказиш ва тадбирларни дабдабали ўтказиш ўрнига маблағни кам таъминланган фуқароларни моддий қўллаб-қувватлашга йўналтиришни тарғиб қилиш;

- имом-хатиблар тўйлар ва маросимлардаги маърузаларида аҳоли эътиборини ёшлар тарбияси, ота-онанинг масъулияти, жамият ҳаётига хавф солаётган таҳдидларни олдини олиш, тинчлик ва мустақиллик неъматини асраш, шукроналик туйғусини шакллантириш каби масалаларга қаратиши тавсия этилсин.

7. Шаҳар ҳокимлиги ахборот хизмати, «Навқирон Ғозғон» шаҳар газетаси таҳририяти (Э.Эсанов) билан биргаликда:

- ушбу қарор эълон қилиниши ва тўйлар, оилавий тантаналар, маърака ва маросимлар ва бошқа тадбирларни тартибга солиш масалаларини кенг ёритиш ва тарғибот ишларини олиб бориш;

- оммавий ахборот воситалари ва ижтимоий тармоқлар орқали намунали тўйлар, оилавий тантаналар, маърака ва маросимлар ҳақида жамоатчилик фикрини шакллантириши, ижтимоий роликлар яратиши, услубий қўлланмалар ва тарғибот материалларини тайёрлаш;

- тўйлар, оилавий тантаналар, маърака ва маросимларда миллий қадриятларимизга ёт бўлган «оммавий маданият» унсурлари намоён бўлишининг олдини олиш мақсадида мунтазам маънавий-маърифий тарғибот ишларини олиб борилишини ташкил этиш тавсия этилсин.

8. Халқ депутатлари шаҳар Кенгаши депутатларига:

қарор мазмун-моҳиятини ўз ҳудудларида кенг тарғиб қилиш ҳамда ижросини таъминлаш вазифалари юклатилсин.

9. Мазкур қарорнинг ижросини назорат қилиш ва таъминлаш шаҳар ҳокимининг ўринбосарлари (Р.Шодиев, Д.Эгамова) ва халқ депутатлари шаҳар Кенгашининг Коррупцияга қарши курашиш, ижтимоий соҳа, ёшлар сиёсати, маданият ва спорт масалалари бўйича доимий комиссияси (Р.Жўраева) зиммасига юклатилсин.