Oʻzbekiston Respublikasi Prezidentining 2025-yil 8-maydagi PF-84-son “Kambagʻal oilalarni davlat tomonidan ijtimoiy qoʻllab-quvvatlash tizimini yanada takomillashtirish toʻgʻrisida”gi Farmoniga muvofiq Oʻzbekiston Respublikasi Maktabgacha va maktab taʼlimi vazirligi hamda Iqtisodiyot va moliya vazirligi qaror qiladi:

1. Oʻzbekiston Respublikasi Xalq taʼlimi vazirligi hamda Moliya vazirligining 2016-yil 25-iyuldagi 8-mh, 55-son qarori (roʻyxat raqami 2821, 2016-yil 23-avgust) (Oʻzbekiston Respublikasi qonun hujjatlari toʻplami, 2016-y., 34-son, 406-modda) bilan tasdiqlangan Maktabgacha taʼlim tashkilotlari va maktab-internatlardagi bolalar taʼminotiga haq toʻlash tartibi toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 5-bobning nomi quyidagi tahrirda bayon etilsin:

“5-bob. Bolalar taʼminoti uchun toʻlovdan ozod qilish”.

2. 19-bandning birinchi xatboshisi quyidagi tahrirda bayon etilsin:

“19. Maktabgacha taʼlim tashkilotlaridagi (maktab-internatlardagi) bolalar umumiy sonining 15 foizi doirasida “Ijtimoiy himoya yagona reyestri” axborot tizimi orqali kam taʼminlangan yoki “Kambagʻal oilalar reyestri” axborot moduli orqali kambagʻal deb eʼtirof etilgan oilalar farzandlari toʻlovdan ozod qilinadi. Bunda, birinchi navbatda ota-onalaridan biri yoki har ikkisiga nogironlikning I yoxud II guruhi belgilangan kam taʼminlangan yoki kambagʻal oila farzandlariga, shuningdek oʻrtacha oylik daromadi eng past darajada boʻlgan kam taʼminlangan yoki kambagʻal oila farzandlariga imtiyoz beriladi.”.

3. 20-bandning “a” kichik bandi quyidagi tahrirda bayon etilsin:

“a) kam taʼminlangan yoki kambagʻal oilalarning farzandlari uchun “Ijtimoiy himoya yagona reyestri” axborot tizimi orqali berilgan oila kam taʼminlangan deb eʼtirof etilganligi toʻgʻrisidagi maʼlumotnoma yoki “Yagona milliy ijtimoiy himoya” axborot tizimi orqali berilgan shaxsning kambagʻal deb eʼtirof etilgan oilaning aʼzosi ekanligi haqidagi maʼlumotnoma (oila kambagʻal deb eʼtirof etilganligi toʻgʻrisidagi maʼlumotlar);”.

4. 22-band “kam taʼminlangan” degan soʻzlardan keyin “yoki kambagʻal deb eʼtirof etilgan” degan soʻzlar bilan toʻldirilsin.

5. 26-banddagi “Iqtisodiyot va moliya vazirligi huzuridagi” degan soʻzlar “Bosh prokuraturasi huzuridagi Iqtisodiy jinoyatlarga qarshi kurashish departamentining” degan soʻzlar bilan almashtirilsin.