LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Qishloqni ijtimoiy jihatdan obod qilishda yuz bergan katta qoloqlikni bartaraf etish yuzasidan amaliy chora-tadbirlarni bajarish maqsadida respublika qishloq aholisini 1990—1992-yillarda ichimlik suv va tabiiy gaz bilan ta’minlashni yaxshilash Davlat dasturini qabul qilish zarur deb hisoblayman:
O‘zbekiston SSJ Vazirlar Kengashi mazkur masala yuzasidan tegishli qaror qabul qilsin, qishloq aholisini markazlashtirilgan tarzda suv va tabiiy gaz bilan ta’minlashni tubdan ko‘paytirishni ko‘zda tutsin. Ko‘rsatilgan davrda 1,7 million qishloq aholisiga vodoprovod tarmog‘idan ichimlik suv va qishloqdagi 330 mingta uy-joy hamda kvartiraga tabiiy gaz berish ta’minlansin. Shu maqsadda suv bilan ta’minlash ishlari hajmi 3 baravar va gazlashtirish ishlari hajmi 4 baravar oshirilsin.
Sovet va xo‘jalik idoralari respublikada gaz va vodoprovod tarmoqlarini qurishga qo‘shimcha moddiy-texnika resurslarini jalb etish uchun mamlakatning boshqa regionlari bilan bevosita shartnomalar tuzishni kengroq amalga oshirsin, dasturni ro‘yobga chiqarishda ishtirok etayotgan mehnat jamoalari tashabbusi rag‘batlantirilsin. Bu ijtimoiy dasturni moliyaviy va moddiy-texnikaviy resurslar bilan ustun darajada ta’minlash yuzasidan sharoit yaratilsin.
O‘zbekiston SSJ Vazirlar Kengashi 1991—1993-yillar davomida har yili yanvar oyida O‘zbekiston SSJ Prezidentini jumhuriyat qishloq aholisini ichimlik suv va tabiiy gaz bilan ta’minlashni yaxshilash dasturi qanday bajarilayotganligidan xabardor qilib tursin.