Respublika aholisi manfaatlari himoya qilinishini taʼminlash, alkogolli va tamaki mahsulotlari mamlakat hududiga keltirilishi, ishlab chiqarilishi va sotilishi ustidan davlat nazoratini yanada kuchaytirish maqsadida Vazirlar Mahkamasi qaror qiladi:

1. Belgilab qoʻyilsinki, 1998-yil 5-avgustdan boshlab alkogolli va tamaki mahsulotlari transportning barcha turlari bilan, Oʻzbekiston Respublikasining bojxona hududi orqali tranzit olib oʻtilishiga faqat Vazirlar Mahkamasining ruxsatnomasi bilan ijozat beriladi.

Mazkur talab Oʻzbekiston Respublikasi xalqaro aeroportlarida bortga yoʻlovchilarni qabul qilish va (yoki) tushirish, tovarlar yoki pochta ortish va (yoki) tushirish nazarda tutilmagan yoqilgʻi quyish, kutilmagan zarur taʼmirlashni oʻtkazish yoki avariya holatidagi qoʻnishni amalga oshiruvchi havo kemalariga nisbatan tatbiq etilmaydi.

Oʻzbekiston Respublikasi Davlat bojxona qoʻmitasi, Davlat soliq qoʻmitasi Moliya vazirligi va Tashqi iqtisodiy aloqalar vazirligi bilan birgalikda besh kun muddatda Alkogolli va tamaki mahsulotlari Oʻzbekiston Respublikasining bojxona hududi orqali tranzit olib oʻtilishi tartibi toʻgʻrisidagi nizomni ishlab chiqsinlar va Vazirlar Mahkamasi bilan kelishgan holda tasdiqlasinlar, bunda yukning respublika bojxona organlari xodimlari tomonidan kuzatib borilishini nazarda tutsinlar.

2. Belgilansinki, alkogolli va tamaki mahsulotlarini erkin muomala (import)ga chiqarish tartibida bojxonada rasmiylashtirish:

tovar kelib chiqqan va joʻnatilgan mamlakatda tovar joʻnatishdan oldin majburiy inspeksiya qilingan, agar kontraktning umumiy qiymati 10,0 ming AQSH dollaridan ortiq boʻlsa;

tovarga Oʻzbekiston Respublikasi sanitariya-epidemiologiya stansiyalari laboratoriyalarining sanitariya-gigiyena xulosasi mavjud boʻlgan taqdirda amalga oshiriladi.

3. 1998-yil 1-avgustdan boshlab Oʻzbekiston Respublikasi hududida:

olib chiqib ketiladigan xom ashyodan alkogolli mahsulot ishlab chiqarish;

spirt va alkogolli mahsulotlarni ishlab chiqarish va ular aylanishi chogʻida barter operatsiyalarini amalga oshirish taʼminlansin.

4. Aksiz markalari tizimini joriy etish boʻyicha idoralararo komissiya aksiz markalarini himoya qilishning yangi, shu jumladan golografik yoʻllar qoʻllaniladigan usullarini joriy etgan holda aksiz markalarini muntazam ravishda yangilab turishni amalga joriy etsin.

5. Oʻzbekiston Respublikasi Davlat soliq qoʻmitasi va Moliya vazirligiga alkogolli va tamaki mahsulotlari ishlab chiqargan korxonalar tomonidan aksiz soligʻi va boshqa soliqlar qonun hujjatlari bilan belgilangan muddatidan 3 oy muddatda toʻlanmagan taqdirda alkogolli va tamaki mahsulotlarni ishlab chiqarishga berilgan litsenziyalarning amal qilishini toʻxtatish yoki ularni bekor qilish toʻgʻrisida Oʻzbekiston Respublikasi Vazirlar Mahkamasiga takliflar kiritish huquqi berilsin.

6. Oʻzbekiston Respublikasi Moliya vazirligi, Davlat soliq qoʻmitasi, Davlat bojxona qoʻmitasi Adliya vazirligi bilan birgalikda Oʻzbekiston Respublikasining Maʼmuriy javobgarlik toʻgʻrisidagi kodeksiga va Jinoyat kodeksiga etil spirti, alkogolli va tamaki mahsulotlari gʻayriqonuniy keltirilganligi, ishlab chiqarilganligi va aylanishda boʻlganligi uchun fuqarolar va mansabdor shaxslarning maʼmuriy va jinoiy javobgarligini kuchaytirishni nazarda tutuvchi oʻzgartirish va qoʻshimchalar kiritish toʻgʻrisidagi takliflarni ikki hafta muddatda kiritsinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.