Ўзбекистон Республикасининг 2020 йил 23 сентябрда тасдиқланган «Таълим тўғрисида»ги қонунининг 47-моддаси, Ўзбекистон Республикаси Вазирлар Маҳкамасининг 2017 йил 15 мартдаги 140-сонли қарори билан тасдиқланган «Умумий ўрта таълим тўғрисида»ги низомининг 39-бандига асосан шаҳарда янги қурилган массивлар ва маҳаллалар ташкил қилинганлигини инобатга олган ҳолда шаҳарда мактаб ёшидаги болаларни умумий ўрта таълимга қамраб олиш жараёнида умумтаълим муассасаларига бириктирилган ҳудудлар (микроҳудуд)ни аниқ белгилаб олиш мақсадида «Маҳаллий давлат ҳокимияти тўғрисида»ги Ўзбекистон Республикаси қонунининг 6, 21¹-моддаларини қўллаб, қарор қиламан:

1. Давлат кадастрлар палатаси Хоразм вилояти бошқармаси Урганч шаҳар филиали (Б.Аллаяров) томонидан киритилган Урганч шаҳрида мактаб ёшидаги болаларни умумий ўрта таълимга тўлиқ қамраб олиш бўйича умумтаълим муассасаларига бириктирилган ҳудудлар (микроҳудуд) рўйхати иловага асосан тасдиқлансин.

2. Урганч шаҳридаги таълим рус тилида олиб бориладиган 3,10,15,28,30-сонли мактабларга шаҳардаги барча ҳудудлардан русийзабон ўқувчиларнинг келишини, ушбу мактабларда 1-синфга қабул рус тилини билиш даражаси бўйича амалга оширилишини инобатга олган ҳолда микроҳудуд беркитилмасин.

3. Шаҳар ҳокимининг ўринбосари (А.Исаков), шаҳар мактабгача ва мактаб таълими бўлими (М.Маримов), шаҳардаги умумтаълим муассасалари раҳбарлари зиммасига мактаб ёшидаги болаларни умумий ўрта таълимга тўлиқ қамраб олиш, ўқувчиларнинг дарсларга қатнашиш ҳолати юзасидан мониторинг олиб бориш ва унинг натижасида аниқланган муаммоларни бартараф этиш бўйича зарур чоралар кўриш вазифаси топширилсин.

4. Шаҳардаги умумтаълим муассасалари раҳбарлари ўзлари раҳбарлик қилаётган муассасага бириктирилган ҳудуддаги мактаб ёшидаги болаларни умумтаълим мактабларига жалб этишга шахсан масъул эканликлари ушбу қарор билан белгилаб қўйилсин.

5. Ўзбекистон маҳаллалари уюшмаси шаҳар бўлими (С.Якубов) маҳалла фуқаролар йиғини раислари билан биргаликда мактаб ёшидаги болаларни умумтаълим муассасаларига жалб этиш жараёнида шаҳар мактабгача ва мактаб таълими бўлими ҳамда умумтаълим мактаблари раҳбарларига амалий ёрдам кўрсатсин.

6. Ушбу қарор кучга кириши муносабати билан шаҳар ҳокимининг 2024 йил 24 майдаги 298-12-180-Қ/24-сонли қарори ўз кучини йўқотган деб ҳисоблансин.

7. Шаҳар ҳокимлиги ахборот хизмати (Б.Худайберганов):

- мазкур қарорни www.регулатион.гов.уз га жойлаштирсин;

- шаҳар халқ таълими бўлими билан биргаликда ушбу қарорнинг мазмун моҳиятини аҳолига тушунтириш ишларини олиб борсин.

- ушбу қарорни расмий нашрларда эълон қилсин.

8. Мазкур қарорнинг бажарилишини назорат қилиш шаҳар ҳокимининг ўринбосари А.Исаков зиммасига юклатилсин.