Ўзбекистон Республикаси Вазирлар Маҳкамасининг «Республика Маънавият ва маърифат марказининг туман (шаҳар) бўлинмалари тизимидаги маънавият ва маърифат масканлари моддий-техник базасини мустаҳкамлаш чора-тадбирлари тўғрисида» 2025 йил 3 мартдаги 138 сонли қарори ижросини таъминлаш мақсадида «Маҳаллий давлат ҳокимияти тўғрисида»ги Қонуннинг 6 ва 21¹-моддаларига асосан қарор қиламан:

1. Ўзбекистон Республикаси Вазирлар Маҳкамасининг 2025 йил 3 мартдаги 138 сонли қарори раҳбарлик ва ижро учун қабул қилинсин.

2. Вазирлар Маҳкамасининг мазкур қарори билан:

Маънавият ва маърифат масканларининг намунавий тузилмаси 1-иловага; Маънавият ва маърифат масканларини (кейинги ўринларда - Масканлар) моддий- техник жиҳатдан жиҳозлашга доир минимал талаблар 2-иловага мувофиқ тасдиқланганлиги;

масканлар Республика Маънавият ва маърифат марказининг туман (шаҳар) бўлинмалари тизимида ташкил этилиши;

масканларнинг штат бирликларини шакллантириш ҳамда сақлаш Республика Маънавият ва маърифат марказининг Қорақалпоғистон Республикаси, вилоятлар ва Тошкент шаҳар бўлимлари, шунингдек, туман (шаҳар) бўлинмаларининг штат бирликлари ва меҳнатга ҳақ тўлаш жамғармаси доирасида амалга оширилиши белгиланганлиги инобатга олинсин ва маълумот учун қабул қилинсин.

3. Вилоят Иқтисодиёт ва молия бош бошқармаси (Б.Ахмедов), Республика Маънавият ва маърифат марказининг вилоят бўлими (И.Умарова), туман (шаҳар)лар ҳокимликлари масканларнинг биноларини сақлаш билан боғлиқ харажатларни 2025 йилдан бошлаб босқичма-босқич маҳаллий бюджет маблағлари ҳисобидан амалга ошириш чораларини кўрсин.

4. Республика Маънавият ва маърифат марказининг вилоят бўлими (И.Умарова), туман (шаҳар)лар ҳокимликлари Вазирлар Маҳкамасининг 2025 йил 3 мартдаги 138 сонли қарори талаблари асосида масканлар фаолиятини ташкил этсин.

Мазкур қарор ижросини назорат қилиш вилоят ҳокимининг биринчи ўринбосари - З.Азимов ҳамда вилоят ҳокимининг ўринбосари А.Савурбаев зиммасига юклансин.