Oʻzbekiston Respublikasi Prezidenti Sh.M. Mirziyoyevning 2024-yil 18-noyabr kuni Oʻzbekiston Respublikasi Oliy Majlisi Qonunchilik palatasining birinchi majlisidagi nutqida deputatlarning saylov okruglaridagi faoliyatini samarali tashkil etish borasida qator takliflar va tashabbuslar bildirildi. Xususan, mamlakatda keng koʻlamli islohotlarni hamda ulkan vazifalarni amalga oshirishda deputatlar oʻz okruglarida eng faol ishtirokchi va targʻibotchi boʻlishlari zarurligi alohida taʼkidlandi.

Bu, oʻz navbatida, Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalari va deputatlardan saylov okruglaridagi ishlarni bugungi kun talablari asosida yoʻlga qoʻyishni, ushbu yoʻnalishdagi vazifalarni aniq reja asosida, puxta tashkil qilishni taqozo etadi.

Yuqoridagilardan kelib chiqib, Oʻzbekiston Respublikasi Oliy Majlisi Qonunchilik palatasi deputatlarining saylovchilar bilan doimiy muloqotini sifat jihatidan yangi darajaga koʻtarish hamda mamlakatimizda amalga oshirilayotgan keng koʻlamli islohotlar jarayonida deputatlar korpusining faol ishtirokini taʼminlash maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi deputatlarining saylov okruglaridagi ishlari samaradorligini yanada oshirish boʻyicha chora-tadbirlar rejasi (bundan buyon matnda Chora-tadbirlar rejasi deb yuritiladi) ilovaga muvofiq tasdiqlansin.

2. Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalariga Chora-tadbirlar rejasidagi tadbirlarni oʻz vaqtida va sifatli amalga oshirish choralarini koʻrish tavsiya etilsin.

3. Oʻzbekiston Respublikasi Oliy Majlisi Qonunchilik palatasining qoʻmitalari Chora-tadbirlar rejasida nazarda tutilgan nazorat-tahlil tadbirlarini oʻz vaqtida amalga oshirish choralarini koʻrsin.

4. Oʻzbekiston Respublikasi Oliy Majlisi Qonunchilik palatasi Devonining Nazorat-tahlil boʻlimi Chora-tadbirlar rejasining ijrosi yuzasidan doimiy monitoring oʻrnatib, har oyda Oʻzbekiston Respublikasi Oliy Majlisi Qonunchilik palatasining rahbariyatiga umumlashtirilgan maʼlumot kiritib borsin.

5. Oʻzbekiston Respublikasi Oliy Majlisi Qonunchilik palatasi Devonining Matbuot xizmati Chora-tadbirlar rejasi doirasida amalga oshiriladigan ishlarning ommaviy axborot vositalarida keng yoritilishini taʼminlasin.

6. Chora-tadbirlar rejasida nazarda tutilgan tadbirlarning bajarilishini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklatilsin.

7. Ushbu Qaror qabul qilingan kundan eʼtiboran kuchga kiradi.