“Xorijiy investitsiyalar ishtirokidagi korxonalarga beriladigan qoʻshimcha ragʻbatlantirishlar va imtiyozlar toʻgʻrisida”gi Farmonga muvofiq, shuningdek Oʻzbekiston Respublikasi hududida xorijiy investitsiyalar ishtirokidagi korxonalarni tashkil etish va davlat roʻyxatidan oʻtkazish tartibini soddalashtirish, qoʻshma ishlab chiqarish korxonalarini tashkil etishni va ularning samarali faoliyat koʻrsatishini ragʻbatlantirish maqsadida Vazirlar Mahkamasi qaror qiladi:

1. Quyidagilar tasdiqlansin:

Oʻzbekiston Respublikasida xorijiy investitsiyalar ishtirokidagi korxonalarni huquqiy ekspertizadan, davlat roʻyxatidan oʻtkazish va tugatish tartibi toʻgʻrisidagi Nizom 1-ilovaga muvofiq;

Xorijiy investitsiyalar ishtirokidagi korxonalarni tashqi iqtisodiy aloqalar qatnashchisi sifatida roʻyxatdan oʻtkazish toʻgʻrisidagi Nizom 2-ilovaga muvofiq.

Oʻzbekiston Respublikasi Adliya vazirligi va Tashqi iqtisodiy aloqalar vazirligining birinchi rahbarlari zimmasiga ularning xodimlari tomonidan xorijiy investitsiyalar ishtirokidagi korxonalarni tashkil etish va tegishli roʻyxatdan oʻtkazishning tasdiqlangan tartibi va muddatlariga qatʼiy rioya etilishi yuzasidan shaxsan javobgarlik yuklansin.

2. Muassislar taʼsis shartnomasida belgilangan muddatda ustav jamgʻarmasini shakllantirish boʻyicha oʻz majburiyatlarini bajarishgan taqdirda, 1997-yil 1-yanvargacha davlat roʻyxatidan oʻtgan korxonalar uchun, mazkur korxonalar davlat roʻyxatidan oʻtkazilgan vaqtda amalda boʻlgan qonunchilikka muvofiq, xorijiy investitsiyalar ishtirokidagi korxonalar maqomi va kafolatlar saqlab qolinsin.

Belgilab qoʻyilsinki, taʼsis hujjatlariga kiritilgan oʻzgartirishlar va qoʻshimchalarni qayta roʻyxatdan oʻtkazishni, shuningdek koʻrsatib oʻtilgan korxonalarni Davlat reyestridan chiqarishni Oʻzbekiston Respublikasi Adliya vazirligi va uning hududiy organlari amalga oshiradi.

3. Oʻzbekiston Respublikasi Adliya vazirligi manfaatdor idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki hafta muddatda xorijiy investitsiyalar ishtirokidagi korxonalarga mansub boʻlmagan xorijiy yuridik va jismoniy shaxslar qatnashgan korxonalarni roʻyxatdan oʻtkazishni tartibga soluvchi nizomni ishlab chiqsin va Vazirlar Mahkamasiga taqdim etsin.

4. Oʻzbekiston Respublikasi Tashqi iqtisodiy aloqalar vazirligi Adliya vazirligi va Davlat mulki qoʻmitasi bilan birgalikda Oʻzbekiston Respublikasi rezidentlari hisoblangan yuridik va jismoniy shaxslar ishtirokida chet elda korxonalar, shuʼba korxonalar, filiallar hamda vakolatxonalar tashkil etish va ularning faoliyat koʻrsatishi tartibi toʻgʻrisidagi nizomni bir oy muddatda ishlab chiqsin va tasdiqlasin.

5. Oʻzbekiston Respublikasi Vazirlar Mahkamasining 1995-yil 14-fevraldagi 55-son qarori bilan tasdiqlangan “Oʻzbekiston Respublikasida xususiy tadbirkorlik toʻgʻrisida Nizom”ning 3-bandi ikkinchi xatboshi quyidagi tahrirda bayon qilinsin:

“Ushbu Nizom xorijiy fuqarolar ishtirokidagi xususiy korxonalarni tashkil qilish, ularning faoliyati hamda ularni tugatishning huquqiy va iqtisodiy asoslariga tatbiq etiladi.”.

6. Vazirlar Mahkamasining “Oʻzbekiston Respublikasida xorijiy investitsiyalar ishtirokidagi korxonalarni tashkil etish, davlat roʻyxatidan oʻtkazish va ularning faoliyati tartibini takomillashtirish toʻgʻrisida” 1996-yil 12-fevraldagi 55-son qarori oʻz kuchini yoʻqotgan, deb hisoblansin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

1. Mazkur Nizom Oʻzbekiston Respublikasining qonun hujjatlari asosida ishlab chiqilgan va Oʻzbekiston Respublikasi hududida xorijiy investitsiyalar ishtirokidagi korxonalarni tashkil etish, davlat roʻyxatidan oʻtkazish va tugatish tartibini belgilaydi.

2. Ushbu Nizomning amal qilishi joriy etiladigan xorijiy investitsiyalar ishtirokidagi korxonalar (bundan keyin Korxona deb ataladi) jumlasiga quyidagilar kiradi:

qoʻshma korxonalar, shuningdek aksiyalari ulushi (payi) xorijiy yuridik va jismoniy shaxslarga tegishli boʻlgan xoʻjalik jamiyatlari va shirkatlar;

xorijiy investitsiyalar ustav jamgʻarmasining 100 foizini tashkil qiladigan xorijiy korxonalar;

bosh korxonasi respublika tashqarisida joylashgan va xoʻjalik faoliyatini amalga oshiradigan shuʼba korxonalar va filiallar;

Oʻzbekiston Respublikasi hududida faoliyat koʻrsatayotgan xorijiy investitsiyalar ishtirokidagi korxonalarning shuʼba korxonalari va filiallari.

3. Davlat roʻyxatidan oʻtkaziladigan xorijiy investitsiyalar ishtirokidagi korxonalar jumlasiga quyidagi shartlarga javob beruvchi korxonalar kiradi:

korxona ustav jamgʻarmasi miqdori 150 ming AQSh dollariga teng summadan kam boʻlmasligi kerak;

korxona ishtirokchilaridan biri albatta xorijiy yuridik shaxs boʻlishi kerak;

xorijiy investitsiyalar ulushi korxona ustav jamgʻarmasining kamida 30 foizini tashkil etishi kerak.

Koʻrsatib oʻtilgan shartlarga muvofiq boʻlmagan korxonalar xorijiy investitsiyalar ishtirokidagi korxonalar jumlasiga kirmaydi va korxona joylashgan joydagi shaharlar va tumanlar hokimliklarida belgilangan tartibda davlat roʻyxatidan oʻtkazilishi lozim.

4. Xorijiy korxonalarning vakolatxonalarini Oʻzbekiston Respublikasi hududida akkreditatsiya qilish belgilangan tartibda Oʻzbekiston Respublikasi Tashqi iqtisodiy aloqalar vazirligi tomonidan amalga oshiriladi.

5. Xorijiy investitsiyalar ishtirokidagi korxonalar Oʻzbekiston Respublikasining amaldagi qonunchiligiga muvofiq tashkil etiladi va oʻz faoliyatini amalga oshiradi.

6. Oʻzbekiston Respublikasi hududida Korxona tashkil etish yoki mavjud Oʻzbekiston korxonasini 20 mln. va undan koʻproq AQSh dollariga teng summa bilan baholanadigan investitsiyalash dasturiga ega boʻlgan qoʻshma korxonaga aylantirish toʻgʻrisida qaror qabul qilish Oʻzbekiston Respublikasi Vazirlar Mahkamasi bilan kelishilgan holda oʻzbekistonlik qatnashchi tomonidan amalga oshiriladi.

7. Davlat roʻyxatidan oʻtkazish vaqtigacha Korxona ustav jamgʻarmasiga taʼsis hujjatlarida koʻrsatilgan ustav jamgʻarmasi miqdorining kamida 30 foizini qoʻyishi kerak.

Agar koʻrsatib oʻtilgan 30 foiz 50 ming AQSh dollariga teng summadan oshsa, u holda Korxona davlat roʻyxatidan oʻtkazish vaqtigacha ustav jamgʻarmasiga 50 ming AQSh dollariga teng summani qoʻyadi. Vaqtinchalik jamgʻarish schyotlariga qoʻyilmalar summasi bank muassasalarining tegishli hujjatlari bilan tasdiqlanadi.

8. Oʻzbekiston Respublikasi hududida tashkil etiladigan Korxonalar Oʻzbekiston Respublikasi Adliya vazirligida va uning hududiy organlarida (bundan keyin roʻyxatdan oʻtkazuvchi organ deb ataladi) davlat roʻyxatidan oʻtkazilgandan keyin yuridik shaxs huquqiga ega boʻlishadi.

9. Qoraqalpogʻiston Respublikasi va viloyatlar hududlarida joylashgan, 500 ming AQSh dollarigacha miqdorda ustav jamgʻarmasiga ega boʻlgan xorijiy investitsiyalar ishtirokidagi Korxonalar Qoraqalpogʻiston Respublikasi Adliya vazirligida va viloyatlar hokimliklarining adliya boshqarmalarida hujjatlarning huquqiy ekspertizasidan hamda davlat roʻyxatidan oʻtadilar.

Ustav jamgʻarmasi 500 ming AQSh dollaridan koʻp boʻlgan, shuningdek Toshkent shahrida joylashgan Korxonalar Oʻzbekiston Respublikasi Adliya vazirligida huquqiy ekspertizadan va davlat roʻyxatidan oʻtadilar.

10. Korxonalar huquqiy ekspertizadan va davlat roʻyxatidan oʻtish uchun roʻyxatdan oʻtkazuvchi organga quyidagi hujjatlarni taqdim etadilar:

a) davlat roʻyxatidan oʻtkazish toʻgʻrisida ariza;

b) taʼsis hujjatlari (taʼsis yigʻilishi protokoli, taʼsis shartnomasi va ustav)ning asl nusxalari va bittadan notarial tasdiqlangan nusxasi;

v) taʼsis hujjatlarida belgilangan ustav jamgʻarmasi miqdoridan 30 foizi soʻm va valyutadagi vaqtinchalik jamgʻarish schyotlariga oʻtkazilganligini tasdiqlovchi bank toʻlov hujjati yoki dastlabki badal hisobiga Oʻzbekiston Respublikasi hududiga mol-mulk yoki asbob-uskunalar keltirilganligini tasdiqlovchi bojxona hujjati. Koʻrsatilgan 30 foiz 50 ming AQSh dollariga teng boʻlgan summadan koʻp boʻlgan taqdirda 50 ming AQSh dollariga teng summaga bank toʻlov hujjati;

g) korxonani roʻyxatdan oʻtkazganlik uchun belgilangan miqdorda davlat poshlinasi toʻlanganligini tasdiqlovchi bank toʻlov hujjati;

d) Oʻzbekiston Respublikasi konsullik muassasasi yoki mazkur mamlakatda Oʻzbekiston Respublikasining konsullik muassasasi boʻlmagan taqdirda Rossiya Federatsiyasining konsullik muassasasi tomonidan tegishli tarjimasi bilan belgilangan tartibda rasmiylashtirilgan xorijiy muassis toʻgʻrisida u roʻyxatdan oʻtgan joydagi savdo reyestridan koʻchirma va bank tavsiyanomasi;

e) roʻyxatdan oʻtkazilayotgan korxona ustavida faoliyatning litsenziyalanadigan turi mavjud boʻlgan taqdirda amaldagi qonunchilik bilan talab qilinadigan hujjatlar.

j) korxonaning pochta manzilini tasdiqlovchi hujjat;

z) savdo va savdo-vositachilik korxonalari yuqorida sanab oʻtilgan hujjatlardan tashqari, oʻzlarida oʻz ustav faoliyatiga muvofiq savdo, omborxona maydonlari va asbob-uskunalar, shu jumladan, chakana savdo korxonalari — nazorat-kassa apparatlari yoki ularni xarid qilish yoxud ijaraga olish uchun mablagʻlar mavjudligini tasdiqlovchi hujjatlarni ham taqdim etadilar.

11. Agar ustav jamgʻarmasiga dastlabki badal sifatida intellektual mulk qoʻyilsa, u holda Korxona roʻyxatdan oʻtkazuvchi organga Oʻzbekiston Respublikasi Fan va texnika davlat qoʻmitasining mazkur mulk bahosi toʻgʻrisidagi xulosasini taqdim etishi kerak.

12. Oʻzbekiston Respublikasi hududida Korxona tashkil etishda yoki mavjud Oʻzbekiston korxonasini 20 mln. va undan koʻp AQSh dollariga teng boʻlgan summada baholanadigan investitsiyalash dasturi bilan qoʻshma korxonaga aylantirishda roʻyxatdan oʻtkazuvchi organga Oʻzbekiston Respublikasi Vazirlar Mahkamasining roziligi taqdim etiladi.

13. Agar Korxonaning Oʻzbekiston tomonidan muassisi davlat mulki shaklidagi yoki davlat mulki ulushi ishtirokidagi korxona boʻlsa, roʻyxatdan oʻtkazuvchi organga qoʻshimcha ravishda Oʻzbekiston Respublikasi Davlat mulki qoʻmitasi yoki uning hududiy organlarining korxonaga beriladigan mol-mulkni baholash va berish toʻgʻrisidagi qarori taqdim etiladi.

14. Shuʼba korxonalar va filiallarni roʻyxatdan oʻtkazishda qoʻshimcha ravishda Oʻzbekiston Respublikasi konsullik muassasasi, mazkur mamlakatda Oʻzbekiston Respublikasi konsullik muassasasi boʻlmagan taqdirda esa Rossiya Federatsiyasi konsullik muassasasi tomonidan tarjimasi bilan belgilangan tartibda rasmiylashtirilgan xorijiy firmaning notarial tasdiqlangan ustavining nusxasi taqdim etiladi.

15. Oʻzbekiston Respublikasida ishlab turgan korxonani xorijiy investor tomonidan toʻliq oʻz mulki qilib sotib olishda xorijiy investor roʻyxatdan oʻtkazuvchi organga korxona egasi bilan kelishilgan tegishli shartnoma matnini, mulkni va foydalanish huquqini sotib olishda esa — mulk egasi bilan kelishilgan oldi-sotdi yoki ijara shartnomasining matnini taqdim etadi.

16. Koʻrsatib oʻtilgan roʻyxatdan ortiqcha qoʻshimcha materiallar soʻrab olish qatʼiyan taqiqlanadi.

Roʻyxatdan oʻtkazuvchi organning huquqiy ekspertizadan va davlat roʻyxatidan oʻtkazish tartibini buzishda aybdor boʻlgan xodimlari maʼmuriy javobgarlikka tortilishi kerak.

17. Qoʻshma korxonalar, ularning shuʼba korxonalari va filiallarini davlat roʻyxatidan oʻtkazganlik uchun milliy valyutada eng kam oylik ish haqining 5 baravari miqdoridagi poshlina, shuningdek 500 AQSh dollari undiriladi. Poshlinaning 20 foizi Oʻzbekiston Respublikasi Adliya vazirligining markazlashtirilgan schyotiga, qolgan qismi respublika budjetiga (Oʻzbekiston Respublikasi Adliya vazirligida roʻyxatdan oʻtkazilganda) yoki Qoraqalpogʻiston Respublikasi va viloyatlarning mahalliy budjetlariga oʻtkaziladi.

Xorijiy korxonalarni, ularning shuʼba korxonalari va filiallarini davlat roʻyxatidan oʻtkazganlik uchun 2000 AQSh dollari miqdorida boj undiriladi. Bu mablagʻlarning 15 foizi Oʻzbekiston Respublikasi Adliya vazirligining markazlashtirilgan schyotiga, qolgan qismi respublika budjetiga (Oʻzbekiston Respublikasi Adliya vazirligida roʻyxatdan oʻtkazilganda) yoki Qoraqalpogʻiston Respublikasi va viloyatlarning mahalliy budjetlariga oʻtkaziladi.

Davlat bojining chet el valyutasidagi koʻrsatib oʻtilgan summasi Markaziy bankning toʻlov kunidagi kursi boʻyicha milliy valyutada toʻlanadi, bunda roʻyxatdan oʻtkazuvchi organga toʻlangan mablagʻlarning qonuniyligi haqida hujjat taqdim etiladi.

18. Taʼsis hujjatlarini davlat roʻyxatidan oʻtkazgan holda huquqiy ekspertizadan oʻtkazish yoki Korxonani yuridik shaxs sifatida qayta roʻyxatdan oʻtkazish roʻyxatdan oʻtkazuvchi organ tomonidan zarur hujjatlar ilova qilingan ariza olingan vaqtdan boshlab 5 ish kunigacha boʻlgan muddatda amalga oshiriladi.

Roʻyxatdan oʻtkazuvchi organ roʻyxatdan oʻtkazish uchun kiritilgan hujjatlar amaldagi qonun hujjatlariga muvofiq kelmagan taqdirda hujjatlarni qaytadan kiritish uchun puxta ishlashga qaytarish huquqiga egadir. Bunday hollarda u qaytarib yuborishning aniq mulohazalari roʻyxatini yozma holda bayon qilishi zarur.

Hujjatlarni takroran koʻrib chiqishda roʻyxatdan oʻtkazuvchi organ tomonidan ilgari arizachiga yozma ravishda bayon qilinmagan yangi mulohazalar bildirilishiga yoʻl qoʻyilmaydi.

Agar ariza beruvchi koʻrsatib oʻtilgan mulohazalarni bartaraf etmasa, hujjatlar puxta ishlash uchun qaytarilishi mumkin.

Korxonaning Ustavda koʻrsatilgan faoliyatida faoliyatning amaldagi qonun hujjatlari bilan taqiqlangan turlarini amalga oshirish nazarda tutilgan yoki ataylab qalbaki hujjatlar taqdim etilgan taqdirdagina uni davlat roʻyxatidan oʻtkazish rad etilishi mumkin.

Ariza beruvchi roʻyxatdan oʻtkazish rad etilganligidan norozi boʻlgan taqdirda sud organlariga murojaat qilishga haqlidir.

19. Roʻyxatdan oʻtkazuvchi organ davlat roʻyxatidan oʻtgan xorijiy investitsiyalar ishtirokidagi korxonalarning Davlat reyestrini yuritadi.

20. Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar hokimliklarining adliya boshqarmalari Korxona ustavini roʻyxatdan oʻtkazadilar. Roʻyxatdan oʻtkazish organlarida Korxonaning roʻyxatdan oʻtkazilgan taʼsis hujjatlari va boshqa hujjatlari nusxalari saqlash uchun qoldiriladi.

21. Davlat roʻyxatidan oʻtgan Korxonaga Korxona ustavining roʻyxatdan oʻtkazilgan asl nusxasi, taʼsis shartnomasi va roʻyxatdan oʻtkazilganligi toʻgʻrisida tegishli namunadagi guvohnoma beriladi. Ushbu hujjat roʻyxatdan oʻtkazuvchi organ rahbariyati tomonidan imzolanadi va muhr bilan tasdiqlanadi.

22. Roʻyxatdan oʻtkazilgan Korxona bir hafta muddatda Oʻzbekiston Respublikasi Makroiqtisodiyot va statistika vazirligining Davlat statistika departamenti yoki tegishli hududiy organida uning Korxonalar va tashkilotlarning yagona davlat registriga kiritilganligi va unga Korxonalar va tashkilotlar umumrespublika klassifikatorining identifikatsiya kodlari berilganligi toʻgʻrisidagi guvohnomani olishga majburdir.

23. Korxona roʻyxatdan oʻtkazilgan paytdan boshlab bir hafta muddatda oʻzi joylashgan joydagi soliq inspeksiyasida roʻyxatdan oʻtishga majburdir.

24. Oʻzbekiston Respublikasi hududida ishlab turgan Korxonalar taʼsis hujjatlariga oʻzgartirish va qoʻshimchalar kiritilgan taqdirda bir hafta muddatda ularni roʻyxatga olgan organga qayta roʻyxatdan oʻtkazish uchun quyidagi hujjatlarni taqdim etadilar:

qayta roʻyxatdan oʻtkazish toʻgʻrisida ariza;

xorijiy investitsiyalar ishtirokidagi korxona yuqori organining oʻzgartirish va qoʻshimchalar kiritish haqidagi protokoli;

oʻzgartirish va qoʻshimchalar matni;

korxonaning nomi yoki tashkiliy-huquqiy shakli oʻzgargan taqdirda roʻyxatdan oʻtkazilganlik toʻgʻrisidagi guvohnomaning asl nusxasi;

ustav jamgʻarmasi oʻzgargan taqdirda ustav jamgʻarmasining shakllanishi toʻgʻrisidagi hujjat taqdim etiladi;

korxonaning pochta manzilini tasdiqlovchi hujjat;

korxona qayta roʻyxatdan oʻtkazilganligi uchun belgilangan miqdorda davlat boji toʻlanganligi haqida bank tomonidan berilgan toʻlov hujjati.

Muassislar tarkibi oʻzgargan taqdirda roʻyxatdan oʻtkazishda muassislardan talab qilingan hujjatlar va chiqib ketgan muassisning roziligi haqidagi hujjat qoʻshimcha ravishda taqdim etiladi.

Taʼsis hujjatlari oʻzgartirilganda va unga qoʻshimchalar kiritilganda, shuningdek korxonani qayta tashkil etishda korxona qayta roʻyxatdan oʻtkaziladi, buning uchun roʻyxatdan oʻtkazilganlik uchun milliy valyutada toʻlanadigan summaning 20 foizi miqdorida boj undiriladi.

Korxona oʻzining pochta manzili oʻzgarganligi toʻgʻrisida vakolatli davlat organlarini oʻn kun muddatda xabardor qilishga majburdir. Vakolatli davlat organlarini pochta manzili oʻzgarganligi haqida xabardor qilmaganlik uchun korxonaning mansabdor shaxslari qonunchilikda nazarda tutilgan tartibda javobgarlikka tortiladilar.

25. Korxonani qayta tashkil etish va tugatish Oʻzbekiston Respublikasining amaldagi qonun hujjatlariga va Korxonaning taʼsis hujjatlariga muvofiq amalga oshiriladi.

26. Korxona tomonidan qonunchilik va ustavda belgilangan faoliyat buzilgan, ataylab qalbaki hujjatlar taqdim etilgan hollarda roʻyxatdan oʻtkazuvchi organ korxonaga ularni bartaraf qilish toʻgʻrisida ogohlantirish xati yuboradi. Agar ogohlantirish xatida koʻrsatilgan tartibni buzishlar bir oy muddatda bartaraf etilmasa, adliya organlari korxonani tugatish toʻgʻrisidagi daʼvo bilan xoʻjalik sudiga murojaat qilish huquqiga ega boʻladi.

Davlat roʻyxatidan oʻtkazilgandan keyin qonun hujjatlarida belgilangan muddat oʻtgach korxona roʻyxatdan oʻtkazuvchi organga taʼsis hujjatlarida maʼlum qilingan ustav jamgʻarmasini shakllantirish tugallanganligi toʻgʻrisida maʼlumotnoma taqdim etishga majburdir. Ustav jamgʻarmasi shakllantirilmagan, biroq belgilangan eng kam miqdordan kam boʻlmagan, amalda shakllantirilgan miqdorgacha kamaytirilmagan yoki boshqacha tashkiliy-huquqiy shakllarga oʻzgartirilgan taqdirda roʻyxatdan oʻtkazuvchi organ korxonalarni tugatish boʻyicha maxsus komissiyaga korxona bundan buyon faoliyat koʻrsatishining maqsadga muvofiqligi toʻgʻrisidagi masalani koʻrib chiqish uchun taqdimnoma kiritadi.

27. Korxona qonun hujjatlarida nazarda tutilgan tartibda tugatiladi.

Mulkida davlat ulushi boʻlgan korxonalar uchun tugatish balansi Oʻzbekiston Respublikasi Davlat mulki qoʻmitasi yoki uning hududiy boʻlinmalari bilan kelishilgan boʻlishi kerak.

28. Korxona Korxonalarning davlat reyestridan chiqarilgan vaqtdan boshlab tugatilgan hisoblanadi.

Tugatilgan Korxonani Korxonalarning davlat reyestridan chiqarish roʻyxatdan oʻtkazuvchi organ tomonidan Korxona muassislarining qarori, yohud xoʻjalik sudining qarori asosida amalga oshiriladi.

29. Korxona tugatilganda va u Korxonalarning davlat reyestridan chiqarilganda Oʻzbekiston Respublikasi Adliya vazirligi bir hafta muddatda Oʻzbekiston Respublikasi Makroiqtisodiyot va statistika vazirligining Davlat statistika departamentiga, Davlat soliq qoʻmitasiga va Tashqi iqtisodiy aloqalar vazirligiga bu haqda maʼlum qilishi kerak.

30. Oʻzbekiston Respublikasi Adliya vazirligi va uning hududiy organlari roʻyxatdan oʻtkazuvchi organ sifatida korxonalar tomonidan oʻz taʼsis hujjatlariga va ustavda koʻrsatilgan faoliyatga, qayta roʻyxatdan oʻtkazish va tugatish tartibiga rioya qilinishi ustidan nazoratni amalga oshiradilar.

Taʼsis hujjatlarida nazarda tutilgan qoidalar buzilgan taqdirda roʻyxatdan oʻtkazuvchi organ korxonadan xoʻjalik sudi orqali eng kam oylik ish haqining 200 baravarigacha miqdorda jarima undirishga haqlidir. Jarimaning 20 foizi Oʻzbekiston Respublikasi Adliya vazirligining markazlashtirilgan schyotiga, qolgan mablagʻlar esa — respublika budjeti daromadiga oʻtkaziladi. Bunday daʼvolar bilan xoʻjalik sudiga murojaat qilishda Oʻzbekiston Respublikasi Adliya vazirligi va uning organlari davlat boji toʻlashdan ozod qilinadi.

1. Davlat roʻyxatidan oʻtgan va Korxonalarning davlat reyestriga kiritilgan xorijiy investitsiyalar ishtirokidagi korxona Oʻzbekiston Respublikasi Tashqi iqtisodiy aloqalar vazirligida (keyingi oʻrinlarda roʻyxatdan oʻtkazuvchi organ deb ataladi) tashqi iqtisodiy aloqalar qatnashchisi sifatida roʻyxatdan oʻtishi mumkin.

2. Xorijiy investitsiyalar ishtirokidagi korxonani roʻyxatdan oʻtkazish va uni tegishli roʻyxatdan oʻtkazish raqami bilan tashqi iqtisodiy aloqalar qatnashchilari reyestriga kiritish roʻyxatdan oʻtkazuvchi organ tomonidan hozir boʻlish tartibida korxona taqdim etgan quyidagi hujjatlar asosida amalga oshiriladi:

a) roʻyxatdan oʻtkazish toʻgʻrisida ariza;

b) rahbar tomonidan imzolangan va muhr bilan tasdiqlangan belgilangan shakldagi roʻyxatdan oʻtkazish kartochkasi;

v) korxona yuridik shaxs sifatida roʻyxatdan oʻtkazilganligi toʻgʻrisida Oʻzbekiston Respublikasi Adliya vazirligi yoki uning hududiy organlari tomonidan berilgan guvohnomaning notarial tasdiqlangan nusxasi;

g) roʻyxatdan oʻtkazish yuzasidan koʻrsatilgan xizmatlar uchun yigʻimning belgilangan miqdori toʻlanganligi toʻgʻrisida bank tomonidan berilgan toʻlov hujjati.

3. Oʻzbekiston Respublikasi Tashqi iqtisodiy aloqalar vazirligi hujjatlar ariza beruvchidan olingan sanadan boshlab 3 ish kuni mobaynida uni tashqi iqtisodiy aloqalar qatnashchisi sifatida roʻyxatdan oʻtkazadi va unga vazirlik rahbariyati tomonidan imzolangan va muhr bilan tasdiqlangan belgilangan namunadagi roʻyxatdan oʻtkazilganlik toʻgʻrisidagi guvohnomani beradi.

4. Xorijiy investitsiyalar ishtirokidagi korxonani tashqi iqtisodiy aloqalar qatnashchisi sifatida roʻyxatdan oʻtkazganlik uchun eng kam oylik ish haqining 5 baravari miqdorida toʻlov undiriladi, undan roʻyxatga olish yuzasidan koʻrsatilgan xizmatlar bilan bogʻliq ishlab chiqarish sarf-xarajatlarini qoplash uchun vazirlik tomonidan mustaqil ravishda foydalaniladi.

5. Xorijiy investitsiyalar ishtirokidagi korxona yuridik shaxs sifatida qayta roʻyxatdan oʻtkazilgan taqdirda, u tashqi iqtisodiy aloqalar qatnashchisi sifatida ham qayta roʻyxatdan oʻtishga majburdir.

6. Korxona tashqi iqtisodiy aloqalar qatnashchisi sifatida har yili qayta roʻyxatdan oʻtishi kerak.