Mamlakatimizda ishbilarmonlik muhitini yaxshilash va tadbirkorlik faoliyatini amalga oshirish uchun qulay shart-sharoitlar yaratish boʻyicha tizimli ishlar amalga oshirilmoqda.

Shu bilan birga, qonunchilik hujjatlarida qurilish obyektlariga yoki ishlab chiqarish (xizmat koʻrsatish) korxonalariga ishlash maqsadida kelgan va ushbu obyektlarning yashash uchun moslashtirilgan joylarida yashab, mehnat faoliyati bilan shugʻullanayotgan shaxslarni vaqtincha turgan joyi boʻyicha roʻyxatga olish tartibining belgilanmaganligi tadbirkorlar uchun noqulaylik tugʻdirmoqda.

Tadbirkorlik subyektlari uchun xodimlarni ishga yollashda qoʻshimcha qulayliklar yaratish, shuningdek, qurilish obyektlari yoki ishlab chiqarish (xizmat koʻrsatish) korxonalarining yashash uchun moslashtirilgan joylarida yashab, mehnat faoliyati bilan shugʻullanayotgan shaxslarni vaqtincha turgan joyi boʻyicha roʻyxatga olish tartibini soddalashtirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga qurilish obyektlarida yoki ishlab chiqarish (xizmat koʻrsatish) korxonalarida ishlash maqsadida kelgan va ushbu obyektlarning yashash uchun moslashtirilgan joylarida yashab, mehnat faoliyati bilan shugʻullanayotgan shaxslarni mazkur qurilish obyektlariga yoki ishlab chiqarish (xizmat koʻrsatish) korxonalariga vaqtincha turgan joyi boʻyicha roʻyxatga olish tartibini nazarda tutuvchi oʻzgartirish va qoʻshimchalar kiritilsin.

2. Oʻzbekiston Respublikasi Qurilish va uy joy kommunal xoʻjaligi vazirligi manfaatdor vazirlik va idoralar bilan birgalikda qurilish obyektlarida yoki ishlab chiqarish (xizmat koʻrsatish) korxonalarida ishlash maqsadida kelgan va ushbu obyektlarning yashash uchun moslashtirilgan joylarida yashab, mehnat faoliyati bilan shugʻullanayotgan shaxslar uchun zarur shart-sharoitlar yaratilganligi, texnika xavfsizligi, yongin xavfsizligi, sanitariya-epidemiologiya rejimi talablariga qatʼiy rioya etilayotganligi doimiy nazorat qilib borilishini taʼminlasin.

3. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

1. Vazirlar Mahkamasining 2018-yil 22-oktabrdagi 845-son qarori bilan tasdiqlangan Oʻzbekiston Respublikasi fuqarolarini doimiy yashash joyi va vaqtincha turgan joyi boʻyicha roʻyxatga olish tartibi toʻgʻrisidagi nizomda:

quyidagi mazmundagi 36¹-band bilan toʻldirilsin:

“36¹. Qurilish obyektlarida yoki ishlab chiqarish (xizmat koʻrsatish) korxonalarida ishlash maqsadida kelgan va ushbu obyektlarining yashash uchun moslashtirilgan joylarida (vaqtincha inshootlar, moslashtirilgan binolar va konteyner uylarda) yashayotgan fuqarolar ushbu qurilish obyektlari yoki ishlab chiqarish (xizmat koʻrsatish) korxonalariga “Manzil” tizimi orqali vaqtincha turgan joyi boʻyicha roʻyxatga olinadi.

Bunda fuqarolarni qurilish obyektlari yoki ishlab chiqarish (xizmat koʻrsatish) korxonalariga vaqtincha turgan joyi boʻyicha roʻyxatga olish mazkur qurilish obyektlari yoki ishlab chiqarish (xizmat koʻrsatish) korxonalarida yashash uchun moslashtirilgan joylarning mavjudligi, roʻyxatga olinayotgan fuqarolar turar joy bilan (texnika xavfsizligi, yongin xavfsizligi, sanitariya-epidemiologiya rejimi talablariga rioya etilgan holda) taʼminlanganligi hamda ularni vaqtincha turgan joyi boʻyicha roʻyxatga olish haqida qurilish obyektlari yoki ishlab chiqarish (xizmat koʻrsatish) korxonalari rahbarlarining xati (roziligi) asosida amalga oshiriladi”;

44-bandning birinchi xatboshisidagi “va vaqtincha” soʻzlari chiqarib tashlansin.

2. Vazirlar Mahkamasining 2019-yil 28-dekabrdagi 1049-son qarori bilan tasdiqlangan Oʻzbekiston Respublikasi fuqarolarini Toshkent shahri va Toshkent viloyatida doimiy yashash va vaqtincha turgan joyi boʻyicha roʻyxatga olish tartibi toʻgʻrisidagi nizomda:

quyidagi mazmundagi 52¹-band bilan toʻldirilsin:

“52¹. Qurilish obyektlarida yoki ishlab chiqarish (xizmat koʻrsatish) korxonalarida ishlash maqsadida kelgan va ushbu obyektlarining yashash uchun moslashtirilgan joylarida (vaqtincha inshootlar, moslashtirilgan binolar va konteyner uylarda) yashayotgan fuqarolar ushbu qurilish obyektlari yoki ishlab chiqarish (xizmat koʻrsatish) korxonalariga “Manzil” tizimi orqali vaqtincha turgan joyi boʻyicha roʻyxatga olinadi.

Bunda fuqarolarni qurilish obyektlari yoki ishlab chiqarish (xizmat koʻrsatish) korxonalariga vaqtincha turgan joyi boʻyicha roʻyxatga olish mazkur qurilish obyektlari yoki ishlab chiqarish (xizmat koʻrsatish) korxonalarida yashash uchun moslashtirilgan joylarning mavjudligi, roʻyxatga olinayotgan fuqarolar turar joy bilan (texnika xavfsizligi, yongin xavfsizligi, sanitariya-epidemiologiya rejimi talablariga rioya etilgan holda) taʼminlanganligi hamda ularni vaqtincha turgan joyi boʻyicha roʻyxatga olish haqida qurilish obyektlari yoki ishlab chiqarish (xizmat koʻrsatish) korxonalari rahbarlarining xati (roziligi) asosida amalga oshiriladi”;

64-banddagi “va vaqtincha” soʻzlari chiqarib tashlansin.

3. Vazirlar Mahkamasining 2020-yil 28-sentabrdagi 593-son qarori bilan tasdiqlangan Oʻzbekiston Respublikasi hududida chet el fuqarolari va fuqaroligi boʻlmagan shaxslarni vaqtincha turgan joyi boʻyicha roʻyxatga olish tartibi toʻgʻrisidagi nizomda:

12-bandning “b” kichik bandi “turar joy bergan jismoniy” soʻzlaridan keyin “va yuridik” soʻzlari bilan toʻldirilsin;

quyidagi mazmundagi 40¹-band bilan toʻldirilsin:

“40¹. Qurilish obyektlarida yoki ishlab chiqarish (xizmat koʻrsatish) korxonalarida ishlash maqsadida kelgan va ushbu obyektlarning yashash uchun moslashtirilgan joylarida (vaqtincha inshootlar, moslashtirilgan binolar va konteyner uylarda) yashayotgan yashash guvohnomasi yoki ID-kartaga ega boʻlgan chet el fuqarolari va fuqaroligi boʻlmagan shaxslar ushbu qurilish obyektlari yoki ishlab chiqarish (xizmat koʻrsatish) korxonalariga “Manzil” tizimi orqali vaqtincha turgan joyi boʻyicha roʻyxatga olinadi.

Bunda qurilish obyektlari yoki ishlab chiqarish (xizmat koʻrsatish) korxonalariga yashash guvohnomasi yoki ID-kartaga ega boʻlgan chet el fuqarolari va fuqaroligi boʻlmagan shaxslarni vaqtincha turgan joyi boʻyicha roʻyxatga olish mazkur qurilish obyektlari yoki ishlab chiqarish (xizmat koʻrsatish) korxonalarida yashash uchun moslashtirilgan joylarning mavjudligi, roʻyxatga olinayotgan yashash guvohnomasi yoki ID-kartaga ega boʻlgan chet el fuqarolari va fuqaroligi boʻlmagan shaxslar turar joy bilan (texnika xavfsizligi, yongin xavfsizligi, sanitariya-epidemiologiya rejimi talablariga rioya etilgan holda) taʼminlanganligi va ularni vaqtincha turgan joyi boʻyicha roʻyxatga olish haqida qurilish obyektlari yoki ishlab chiqarish (xizmat koʻrsatish) korxonalari rahbarlarining xati (roziligi) asosida amalga oshiriladi”.