Oʻzbekiston Respublikasining Prezidenti Sh. Mirziyoyev raisligida 2024-yil 23-sentabr kuni qurilish industriyasi va qurilish materiallari tarmogʻini rivojlantirish chora-tadbirlari muhokamasi boʻyicha oʻtkazilgan videoselektor yigʻilishida qurilish sohasidagi dolzarb masalalar, shu jumladan, sohaga doir standart va yondashuvlarni bugungi kun talablari asosida takomillashtirish hamda shaharsozlik normalari va qoidalarini muntazam yangilab borish boʻyicha ustuvor vazifalar va yoʻnalishlar belgilab berildi.

Mazkur vazifalarning oʻz vaqtida va samarali bajarilishida vakillik organlarining faol ishtirokini taʼminlash, xususan, qurilish sohasiga oid amaldagi qonunchilikni har tomonlama koʻrib chiqish hamda ilgʻor xorijiy davlatlar tajribasini oʻrgangan holda takomillashtirish borasidagi ishlarni yanada jadallashtirish muhim ahamiyat kasb etadi.

Yuqoridagilardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Qurilish sohasidagi qonunchilikni takomillashtirish yuzasidan takliflar ishlab chiqish boʻyicha ishchi guruh (bundan buyon matnda Ishchi guruh deb yuritiladi) ilovaga muvofiq tarkibda tuzilsin.

2. Ishchi guruh Qurilish va uy-joy kommunal xoʻjaligi vazirligi bilan birgalikda:

shaharsozlik va qurilish sohasiga oid qonun hujjatlarini toʻliq xatlovdan oʻtkazsin;

ilgʻor xorijiy davlatlar tajribasini oʻrgangan holda sohaga oid qonunchilikni takomillashtirish yuzasidan takliflar tayyorlasin;

takliflarni bir oy muddatda Oʻzbekiston Respublikasi Oliy Majlisi Qonunchilik palatasi Kengashiga va Oʻzbekiston Respublikasi Oliy Majlisi Senati Kengashiga taqdim etsin.

3. Ushbu Qoʻshma qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Xaitov va Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

4. Mazkur Qoʻshma qaror qabul qilingan kundan eʼtiboran kuchga kiradi.