Xokkey sport turini yanada ommalashtirish, iqtidorli sportchilarni saralab olish tizimini takomillashtirish, trener va hakamlarni xalqaro talablar asosida tayyorlash, shuningdek, xokkey sport turi bo‘yicha infratuzilmani yaxshilash maqsadida:

1. Quyidagilar xokkey sport turini rivojlantirishning asosiy yo‘nalishlari etib belgilansin:

xokkey sport turi bo‘yicha terma jamoalar va sport klublari uchun sport zaxirasini yaratish, iqtidorli sportchilarni saralash (seleksiya)ning raqamlashtirilgan tizimini joriy qilish;

xokkey sport turi bo‘yicha malakali trenerlar, hakamlar va mutaxassislarni tayyorlash, qayta tayyorlash va ularning malakasini oshirish tizimini yanada takomillashtirish;

chet ellik mutaxassislar, trener va sportchilarni jalb etish hamda ular bilan o‘zaro hamkorlikni yanada kengaytirish;

xokkey sport turi bo‘yicha infratuzilmani yanada yaxshilash hamda xalqaro talablarga muvofiqlashtirish.

2. Sport vazirligi Oliy ta’lim, fan va innovatsiyalar vazirligi, Iqtisodiyot va moliya vazirligi, O‘zbekiston davlat jismoniy tarbiya va sport universiteti hamda O‘zbekiston xokkey federatsiyasi bilan birgalikda 2025-yildan boshlab har yili:

xokkey sport turi bo‘yicha xalqaro tashkilotlar va chet ellik mutaxassislar ishtirokida seminar-treninglar, shuningdek, ilmiy-amaliy anjumanlar o‘tkazib borsin;

O‘zbekiston davlat jismoniy tarbiya va sport universitetining “Sport faoliyati” (xokkey)” bakalavriat ta’lim yo‘nalishi talabalarining xokkey klublari sport bazalarida amaliyotini tashkil etish choralarini ko‘rsin.

3. 2025 — 2027-yillarda Toshkent shahridagi Olimpiya shaharchasi hududida Xokkey sport majmuasini (keyingi o‘rinlarda — Majmua) barpo etish belgilanganligi ma’lumot uchun qabul qilinsin.

4. Sport vazirligi, Davlat aktivlarini boshqarish agentligi, O‘zbekiston Milliy olimpiya qo‘mitasi va O‘zbekiston xokkey federatsiyasining:

Majmuani innovatsion texnologiyalarga asoslangan holda qimmat bo‘lmagan va energiya tejovchi materiallardan zamonaviy muz saroyi bilan birgalikda barpo etish va foydalanishga topshirish;

Majmua qurib bitkazilgandan so‘ng unga O‘zbekiston xokkey federatsiyasini tekin foydalanish huquqi asosida joylashtirish va Majmuani saqlash xarajatlarini O‘zbekiston xokkey federatsiyasi mablag‘lari hisobidan moliyalashtirish to‘g‘risidagi takliflari ma’qullansin.

5. Belgilansinki:

Majmua 2025 — 2027-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida barpo etiladi;

Majmua xokkey sport turi bo‘yicha terma jamoalar uchun o‘quv-mashg‘ulot jarayonini va sport musobaqalarini o‘tkazish bo‘yicha O‘zbekiston xokkey federatsiyasining asosiy bazasi hisoblanadi;

sport maktablari va ixtisoslashtirilgan sport maktablariga o‘quvchilarning hujjatlarini qabul qilish hamda ularning o‘qishini ko‘chirish bo‘yicha davlat xizmatlarini ko‘rsatish davlat xizmatlari markazlari yoki Yagona interaktiv davlat xizmatlari portali orqali 2024/2025 o‘quv yilidan boshlab tegishli moliya yili uchun ajratilgan mablag‘lar doirasida yil davomida amalga oshiriladi.

6. Sport vazirligi Majmua qurib bitkazilgandan so‘ng uni belgilangan tartibda qabul qilib olish hamda O‘zbekiston xokkey federatsiyasiga tekin foydalanish huquqi asosida berish choralarini ko‘rsin.

7. Shunday tartib o‘rnatilsinki, unga muvofiq:

O‘zbekiston xokkey federatsiyasi, xokkey sport turi bo‘yicha sport klublari va nodavlat sport ta’lim tashkilotlari uchun foyda solig‘i uch yil muddatga 50 foizga kamaytiriladi;

O‘zbekiston xokkey federatsiyasi, xokkey sport turi bo‘yicha sport klublari va nodavlat sport ta’lim tashkilotlari faoliyatini moliyalashtirish uchun yuridik shaxslar tomonidan yo‘naltiriladigan homiylik xayriyalari summasi foyda solig‘ini hisoblashda soliq solinadigan bazadan chegirib tashlanadi.

8. Samarqand viloyati va Toshkent shahri hokimliklarining xokkey sport turi bo‘yicha chet ellik mutaxassis va trenerlarni belgilangan tartibda Samarqand shahrida 2 ta hamda Toshkent shahrida 10 ta xizmat uylari bilan ta’minlash to‘g‘risidagi takliflari ma’qullansin.

9. Belgilab qo‘yilsinki:

O‘zbekiston xokkey federatsiyasi, xokkey sport turi bo‘yicha sport klublari va nodavlat sport ta’lim tashkilotlari tomonidan O‘zbekiston Respublikasiga xokkey sport turi bo‘yicha jalb etiladigan chet ellik trener, sportchi va boshqa mutaxassislar uchun O‘zbekiston Respublikasi hududida mehnat faoliyatini amalga oshirish huquqini beruvchi tasdiqnoma tegishli to‘lovlarni undirmagan holda beriladi (uzaytiriladi);

2024 — 2029-yillarda O‘zbekiston xokkey federatsiyasi moddiy-texnik bazasini mustahkamlash, xokkey bo‘yicha bolalar va o‘smirlar sportini yanada rivojlantirish, xorijiy mutaxassislarni jalb etgan holda ilg‘or ilmiy tajribalarni joriy etish hamda milliy terma jamoalar sportchilarini samarali tayyorlashni yo‘lga qo‘yish maqsadida har yil Davlat budjetidan 2 milliard so‘m mablag‘ O‘zbekiston xokkey federatsiyasiga ajratiladi;

xokkey sport turi bo‘yicha chet ellik sportchilar, trenerlar va boshqa mutaxassislarni yashash uchun mehmonxonalar va boshqa joylashtirish vositalariga joylashtirishda O‘zbekiston xokkey federatsiyasi, xokkey sport turi bo‘yicha sport klublari va nodavlat sport ta’lim tashkilotlari bilan tuzilgan shartnomalar bo‘yicha turistik yig‘im undirilmaydi.

10. 2028-yil 1-yanvarga qadar O‘zbekiston xokkey federatsiyasi, uning hududiy bo‘linmalari, shuningdek, xokkey sport turi bo‘yicha sport klublari va nodavlat sport ta’lim tashkilotlari tomonidan belgilangan tartibda shakllantiriladigan ro‘yxatlar bo‘yicha olib kelinadigan hamda O‘zbekiston Respublikasida ishlab chiqarilmaydigan sport asbob-uskunalari, inventarlari, translyatsiya qilish bilan bog‘liq barcha asbob-uskunalar va texnikalar, farmakologiya mahsulotlari, sport ozuqalari, maxsus professional sport kiyimlari, maxsus texnika va transport vositalari, shuningdek, xokkey sport turida foydalaniladigan boshqa barcha mahsulotlar uchun bojxona boji to‘lovlaridan (bundan bojxona rasmiylashtiruvi uchun yig‘imlar mustasno) ozod qilinadi.

Mazkur banddagi imtiyoz va shartlar Sport vazirligi va uning tizimidagi tashkilotlar, O‘zbekiston Milliy olimpiya qo‘mitasi, O‘zbekiston Milliy paralimpiya qo‘mitasi hamda Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklariga ham tatbiq etiladi.

11. O‘zbekiston Milliy teleradiokompaniyasi O‘zbekiston Milliy axborot agentligi, Sport vazirligi, O‘zbekiston xokkey federatsiyasi bilan birgalikda mazkur qarorning mazmun-mohiyati va amaliy ahamiyatini yoritishga oid maqolalar, brifinglar, tematik teleko‘rsatuvlar tashkil etsin.

12. Sport vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

13. Mazkur qarorning ijrosini samarali tashkil qilishga mas’ul va shaxsiy javobgar etib O‘zbekiston Respublikasi sport vaziri A.I. Ikramov belgilansin.

Qaror ijrosini muhokama qilib borish, ijro uchun mas’ul tashkilotlar faoliyatini muvofiqlashtirish va nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidenti Administratsiyasi departamenti rahbari O.Q. Abduraxmanov zimmasiga yuklansin.