Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi hamda “Qimmatli qogʻozlar bozori toʻgʻrisida”gi qonunlariga muvofiq Oʻzbekiston Respublikasi Markaziy banki boshqaruvi qaror qiladi:

1. Oʻzbekiston Respublikasi Markaziy banki boshqaruvining 2008-yil 15-martdagi 8/8-son qarori (roʻyxat raqami 1829, 2008-yil 18-iyun) (Oʻzbekiston Respublikasi qonun hujjatlari toʻplami, 2008-y., 24-25-son, 247-modda) bilan tasdiqlangan Oʻzbekiston Respublikasining davlat qimmatli qogʻozlari bilan REPO bitimlarini tuzish va ijro etish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror Oʻzbekiston Respublikasi Iqtisodiyot va moliya vazirligi bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.

1. Muqaddima quyidagi tahrirda bayon etilsin:

“Ushbu Nizom Oʻzbekiston Respublikasining davlat qimmatli qogʻozlari bilan REPO bitimlarini tuzish va ijro etish tartibini belgilaydi.”.

2. 2-banddagi “moliyaviy broker sifatida faoliyat koʻrsatuvchi” degan soʻzlar “qimmatli qogʻozlar bozorida professional faoliyat yuritish huquqini olgan investitsiya vositachisi va OʻzRVB aʼzosi hisoblangan” degan soʻzlar bilan almashtirilsin.

3. 3-bandda:

birinchi va ikkinchi xatboshilar quyidagi tahrirda bayon etilsin:

“3. Mazkur Nizomda quyidagi asosiy tushunchalar qoʻllaniladi:

davlat qimmatli qogʻozlari (keyingi oʻrinlarda — DQQ) — Oʻzbekiston Respublikasi nomidan chiqarilgan davlat gʻaznachilik obligatsiyalari, xalqaro obligatsiyalar, shuningdek Oʻzbekiston Respublikasi Markaziy bankining (keyingi oʻrinlarda — Markaziy bank) obligatsiyalari;”;

uchinchi xatboshidan “aynan shu chiqarilishdagi va miqdordagi” degan soʻzlar chiqarib tashlansin;

oʻn toʻrtinchi xatboshi “REPO bitimining tomonlari kelishuvi asosida” degan soʻzlardan keyin “diskontni inobatga olgan holda” degan soʻzlar bilan toʻldirilsin;

yigirma toʻqqizinchi xatboshidagi “qimmatli qogʻozlar va pul mablagʻlari” degan soʻzlar “DQQ va pul mablagʻlaridagi pozitsiyalar” degan soʻzlar bilan almashtirilsin.

4. 5-bandda:

“b” kichik banddagi “10” raqami “5” raqami bilan almashtirilsin;

toʻrtinchi xatboshi quyidagi tahrirda bayon etilsin:

“Taʼminotga turli chiqarilishdagi DQQlarni DQQ savati orqali kiritish mumkin.”;

quyidagi mazmundagi xatboshi bilan toʻldirilsin:

“DQQ savati REPO bitimi tarkibiga kiritilishi mumkin boʻlgan har xil chiqarilishlardagi DQQ toʻplamidan iborat roʻyxat boʻlib, uning tarkibidagi DQQ chiqarilishlari REPO bitimining ikkinchi qismini bajarish sanasiga qadar DQQning boshqa chiqarilishlari bilan REPO bitimi tomonlarining kelishuviga asosan ayirboshlanishi mumkin. Bunda, DQQning har bir ayirboshlanishi natijasida vujudga kelgan taʼminot qiymati REPO bitimining avvalgi shartlari bilan belgilangan taʼminot qiymatidan kam boʻlmasligi lozim.”;

5. 7-bandning birinchi xatboshisidan “Savdo tizimi tomonidan,” degan soʻzlar chiqarib tashlansin.

6. 8-bandning ikkinchi xatboshisi quyidagi tahrirda bayon etilsin:

“REPO muddati davomida taʼminot tarkibidagi qimmatli qogʻozlar boʻyicha kupon (foiz) daromadlari emitent tomonidan dastlabki sotib oluvchiga toʻlab beriladi. Bunda, REPO summasi toʻlov amalga oshirilgan kunda ushbu toʻlangan kupon (foiz) daromadi miqdoriga kamaytiriladi.”.

7. 11-bandda:

ikkinchi xatboshidan “(avtomatik)” degan soʻz chiqarib tashlansin;

uchinchi xatboshi quyidagi tahrirda bayon etilsin:

“Dilerning oʻzi tomonidan REPO stavkasi koʻrsatiladigan raqobatli buyurtmalardan farqli ravishda, raqobatsiz buyurtmalar Savdo tizimiga buyurtma berilgan vaqtda birja qoidalariga muvofiq avtomatik hisoblanadigan REPO stavkasi boʻyicha kiritiladi.”.

8. 12-bandda:

“v” kichik band quyidagi tahrirda bayon etilsin:

“v) buyurtma bergan diler (investor)ning nomi va taʼminotdagi DQQning identifikatsiya raqami yoki xalqaro kodi;”;

“e” kichik banddan “tizimdan tashqaridagi” degan soʻzlar chiqarib tashlansin;

9. 18-band oʻz kuchini yoʻqotgan deb topilsin.

10. 19 — 21-bandlar quyidagi tahrirda bayon etilsin:

“19. REPO bitimlari taʼminoti blokirovka qilingan yoki taʼminoti blokirovka qilinmagan holda tuzilishi mumkin. Taʼminoti blokirovka qilingan REPO bitimi buyurtmada tegishli shart koʻrsatilgan taqdirdagina tuziladi.

OʻzRVBning birja guvohnomasi REPO bitimining tuzilganligini tasdiqlovchi hujjat boʻlib, uning standart shakli birja qoidalariga muvofiq tasdiqlanadi.

20. Savdo tizimining har bir REPO bitimi boʻyicha dastlabki sotuvchi va dastlabki sotib oluvchidan oladigan vositachilik haqi birja qoidalariga muvofiq undiriladi.

21. REPO bitimlari boʻyicha dilerning majburiyatlari ijrosini taʼminlash OʻzRVB tomonidan uning Markaziy bankda ochilgan vakillik hisobvaragʻidan akseptsiz tartibda hisobdan chiqarish orqali amalga oshiriladi.”.

11. 22, 23 va 27-bandlar oʻz kuchini yoʻqotgan deb topilsin.

12. 31-bandning ikkinchi xatboshisi chiqarib tashlansin.

13. 34-band oʻz kuchini yoʻqotgan deb topilsin.

14. 38-bandning ikkinchi xatboshisi chiqarib tashlansin.

15. 49-bandning toʻrtinchi xatboshisi quyidagi tahrirda bayon etilsin:

“taʼminotdagi DQQ chiqarishlari va/yoki DQQning miqdori;”.

16. 58-bandning oʻn uchinchi xatboshisi quyidagi tahrirda bayon etilsin:

“Amaldagi REPO bitimining ikkinchi qismi Savdo tizimida avtomatik ravishda shakllanadigan va xabarnomadagi maʼlumotlarni oʻz ichiga olgan buyurtma-topshiriqlarni dilerlar tomonidan tasdiqlanishi orqali ijro etiladi.”.

17. 71-band quyidagi tahrirda bayon etilsin:

“71. Taʼminotning sotilishi tegishli REPO bitimining ikkinchi qismi ijro etish sanasida yoki ijro etish sanasidan keyingi savdo kunidan boshlab Savdo tizimi tomonidan oʻtkaziladigan kunlik auksionlar shaklida amalga oshiriladi.

DQQning auksiondagi sotilish narxi birja qoidalariga muvofiq belgilanadi.”.

18. 82 va 83-bandlar quyidagi tahrirda bayon etilsin:

“82. Markaziy bank tomonidan REPO bitimlari mazkur Nizomga hamda bank bilan tuziladigan toʻgʻridan-toʻgʻri REPO bitimi boʻyicha Bosh bitimga muvofiq amalga oshiriladi.

83. Markaziy bank va banklar oʻrtasida toʻgʻridan-toʻgʻri REPO bitimlari overnayt REPO va REPO auksionlari shaklida oʻtkaziladi. Bunda, REPO bitimlarini oʻtkazish tartibi va shartlari birja qoidalariga muvofiq amalga oshiriladi.”.

19. 85-bandning “b” kichik bandidagi “Kelishuvni” degan soʻz “Bosh bitimni” degan soʻzlar bilan almashtirilsin.

20. 87-band quyidagi tahrirda bayon etilsin:

“87. REPO buyurtmasi mazkur Nizomning 12-bandida koʻrsatilgan REPO bitimining barcha majburiy shartlarini oʻz ichiga olishi lozim.”.

21. 88-banddagi “Kelishuvning” degan soʻz “Bosh bitimning” degan soʻzlar bilan almashtirilsin.

22. 89 — 92 hamda 94-bandlar oʻz kuchini yoʻqotgan deb topilsin.