Oʻzbekiston Respublikasi Prezidentining 2018-yil 11-apreldagi PF-5409-son “Tadbirkorlik faoliyati sohasidagi litsenziyalash va ruxsat berish tartib-taomillarini yanada qisqartirish va soddalashtirish, shuningdek, biznes yuritish shart-sharoitlarini yaxshilash chora-tadbirlari toʻgʻrisida”gi hamda 2022-yil 27-apreldagi PF-122-son “Bojxona maʼmuriyatchiligini yanada takomillashtirishga doir qoʻshimcha chora-tadbirlar toʻgʻrisida”gi Farmonlariga muvofiq buyuraman:

1. Oʻzbekiston Respublikasi Davlat bojxona qoʻmitasining 2013-yil 5-noyabrdagi 01-02/12-29-son qarori (roʻyxat raqami 2525, 2013-yil 18-noyabr) (Oʻzbekiston Respublikasi qonun hujjatlari toʻplami, 2013-y., 47-son, 619-modda) bilan tasdiqlangan Xorijiy aviakompaniyalarning havo kemalari uchun moʻljallangan aviakerosin mahsulotini bojxona rasmiylashtiruvidan oʻtkazish qoidalariga ilovaga muvofiq oʻzgartirishlar kiritilsin.

2. Mazkur buyruq Oʻzbekiston Respublikasi Transport vazirligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

1. 3-band quyidagi tahrirda bayon etilsin:

“3. Aviakerosin mahsuloti belgilangan joyga yetkazilganidan soʻng, bojxona yuk deklaratsiyasining bojxona rasmiylashtiruvi “Masofaviy elektron deklaratsiyalash” bojxona postlari tomonidan amalga oshiriladi.”.

2. 6 va 7-bandlar oʻz kuchini yoʻqotgan deb topilsin.

3. 8-band quyidagi tahrirda bayon etilsin:

“8. Havo kemasiga quyish uchun aviakerosin mahsuloti bojxona omboridan yoki bojxona ombori hisoblanmaydigan joylardan maxsus transportga yuklanadi. Yuklash yakunlangach ilovaga muvofiq elektron shaklda aviakerosin mahsuloti maxsus transportga yuklanganligi toʻgʻrisida dalolatnoma (bundan buyon matnda dalolatnoma deb yuritiladi) bojxona omborining egasi yoki aviakerosin mahsulotini bojxona ombori hisoblanmaydigan joyda saqlagan shaxs (bundan buyon matnda vakolatli shaxs deb yuritiladi) tomonidan Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining yagona avtomatlashtirilgan axborot tizimida (bundan buyon matnda Bojxona qoʻmitasining axborot tizimi deb yuritiladi) tuziladi.

Dalolatnoma hududiy bojxona organlarining bojxona posti mansabdor shaxsi tomonidan Bojxona qoʻmitasining axborot tizimida elektron imzo qoʻyish orqali rasmiylashtiriladi.

Dalolatnoma 2 nusxada chop etiladi.

Dalolatnomaning I boʻlimi 1 — 4-bandlari, 5-bandining “a” — “g” va “j” ustunlari bojxona omborining egasi tomonidan toʻldiriladi.

Dalolatnomaning II boʻlimi yuklash yakunlangach toʻldiriladi.”.

4. 9-band quyidagi tahrirda bayon etilsin:

“9. Dalolatnomaning chop etilgan bitta nusxasi bojxona omborida qoladi, 2-nusxasi esa bojxona rasmiylashtiruvini amalga oshirishda bojxona postiga taqdim qilish uchun deklarantga beriladi.”.

5. 11-band “bojxona omborining egasi,” degan soʻzlardan keyin “bojxona ombori hisoblanmaydigan joyda saqlanishi va undan olib chiqilishi uchun vakolatli shaxs,” degan soʻzlar bilan toʻldirilsin.

6. 14-band oʻz kuchini yoʻqotgan deb topilsin.

7. 16-band quyidagi tahrirda bayon etilsin:

“16. Aviakerosin mahsulotini “reeksport” bojxona rejimiga joylashtirish uchun uning havo kemasiga quyilgan kunidan boshlab uch ish kunidan kechiktirmasdan bojxona rasmiylashtiruvini amalga oshiradigan bojxona postiga deklarant tomonidan ushbu rejimga rasmiylashtirish uchun toʻldirilgan bojxona yuk deklaratsiyasi bilan birga quyidagi hujjatlar taqdim qilinishi lozim:

dalolatnomaning chop etilgan nusxasi;

tovarning kuzatuv hujjatlari.

Hujjatlar deklarant tomonidan tasdiqlanishi lozim.”.

8. 19-banddan “Oʻzbekiston Respublikasi Iqtisodiyot va moliya vazirligi huzuridagi” degan soʻzlar chiqarib tashlansin.