Oʻzbekiston Respublikasi Oliy Majlisi Qonunchilik palatasi Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasining (bundan buyon matnda Qoʻmita deb yuritiladi) 2024-yil besh oyidagi faoliyati yuzasidan axborotini koʻrib chiqib, Oʻzbekiston Respublikasi Oliy Majlisi Qonunchilik palatasining Kengashi taʼkidlaydiki, mamlakatimizda amalga oshirilayotgan demokratik islohotlarni yanada chuqurlashtirish, inson huquqlarini himoya qilish kabi muhim yoʻnalishlarning huquqiy asoslarini mustahkamlashga hamda qonunchilikda belgilangan vakolatlarga muvofiq nazorat-tahlil tadbirlarini tashkil etishga hisobot davrida Qoʻmita tomonidan ustuvor ahamiyat qaratilgan.

Qoʻmita qonun ijodkorligi faoliyati yoʻnalishida jami 4 ta qonun loyihasiga masʼul boʻlgan. Oʻtgan davrda qonun loyihalarining 2 tasi Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) tomonidan qabul qilingan hamda 1 tasi ikkinchi oʻqish muhokamasiga tayyorlanmoqda. Shuningdek 1 ta qonun loyihasi Qonunchilik palatasi majlisida birinchi oʻqishda koʻrib chiqish jarayonida rad etilgan.

Hisobot davrida Qoʻmita tomonidan qonunlarning ijrosi holatini hamda huquqni qoʻllash amaliyotini joylarga chiqib oʻrganish, shuningdek muhim masalalar yuzasidan davlat organlari rahbarlarining axborotini eshitishga doir 11 ta nazorat-tahlil tadbiri oʻtkazilgan.

Xususan, joriy yil 15-mart kuni Qoʻmita majlisida Oʻzbekiston Respublikasi Maktabgacha va maktab taʼlimi vazirligining “Taʼlim muassasalari sharoitlarini imkoniyati cheklangan bolalarning manfaatlarini hisobga olgan holda yaxshilash orqali nogironlar uchun barcha darajadagi taʼlim va kasbiy-texnik tayyorgarlikdan teng foydalanish imkoniyatini, barcha uchun xavfsiz va samarali oʻqitish muhitini taʼminlash borasida amalga oshirilgan ishlar toʻgʻrisida”gi axboroti eshitilgan.

Jismoniy va yuridik shaxslarning murojaatlarini oʻz vaqtida oʻrganish hamda ularni hal etishga hisobot davrida Qoʻmita tomonidan alohida eʼtibor qaratildi.

Oʻtgan vaqt ichida jismoniy va yuridik shaxslardan kelib tushgan 97 ta murojaat Qoʻmita aʼzolari tomonidan belgilangan tartibda koʻrib chiqilgan. Qonunchilikni takomillashtirish yuzasidan fuqarolardan kelib tushgan takliflar alohida oʻrganilib, takliflari asosli deb topilgan 7 nafar fuqaroga minnatdorlik xati yuborilgan.

Qoʻmita faoliyati haqida keng jamoatchilikni oʻz vaqtida xabardor qilish, nazorat-tahlil tadbirlari yakunlari va qoʻmita masʼulligida koʻrib chiqilayotgan qonun loyihalarining mazmun-mohiyatini aholiga muntazam ravishda tushuntirib borish boʻyicha jami 14 ta tashkiliy-amaliy tadbir oʻtkazilgan.

Hisobot davrida qoʻmita aʼzolari tomonidan ommaviy axborot vositalarida jami 334 marotaba chiqish qilingan hamda qonun ijodkorligi va qoʻmita faoliyatiga oid materiallarning muntazam yoritib borilishi taʼminlangan.

Shu bilan birga Qoʻmitaning oʻtgan davrdagi faoliyati tahlili oʻz yechimini kutayotgan qator masalalar ham mavjudligini, ularga alohida eʼtibor qaratish lozimligini koʻrsatmoqda.

Jumladan, Qoʻmitaning joylarda qonunlarning ijro etilish holatini oʻrganishga doir ishlarini yanada jonlantirish hamda qonunchilikni takomillashtirish yuzasidan takliflar ishlab chiqish borasidagi tashabbuskorligini kuchaytirish zarur.

Qoʻmita tomonidan oʻz faoliyat yoʻnalishidan kelib chiqib, parlament nazorati tadbirlari yakunlari boʻyicha qabul qilingan qarorlarning ijrosini doimiy monitoring qilib borish muhim ahamiyat kasb etadi.

Qonun loyihalarini ishlab chiqish va nazorat-tahlil tadbirlariga Qoʻmita huzuridagi ekspert guruhi aʼzolarini kengroq jalb qilish lozim.

Yuqorida bayon etilganlardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasining 2024-yil besh oyidagi faoliyati toʻgʻrisidagi axboroti maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasi Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasiga:

Oʻzbekiston Respublikasi Oliy Majlisi Qonunchilik palatasining 2024-yildagi faoliyatining asosiy yoʻnalishlarida Qoʻmita masʼul etib belgilangan vazifalarni oʻz vaqtida va sifatli amalga oshirish;

Qoʻmita masʼulligida boʻlgan qonun loyihalarining jamoatchilik muhokamalarini tashkil etish hamda kelib tushgan takliflar va fikr-mulohazalarni qonun loyihalarini maromiga yetkazishda hisobga olish;

nazorat-tahlil tadbirlari doirasida qabul qilingan qarorlarning ijrosini monitoring qilish borasidagi ishlarni yanada kuchaytirish;

Qoʻmita aʼzolarining qonunchilik tashabbusi huquqidan foydalanish samaradorligini yanada oshirish;

Qonun loyihalarini ishlab chiqish va koʻrib chiqish jarayonlarida ekspertlar va ilmiy hamjamiyat vakillari bilan maslahatlashish, ularning salohiyati va ilmiy ishlanmalaridan foydalanish amaliyotini kengaytirish;

“Oʻzbekiston — 2030” strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturida Qoʻmita faoliyatiga taalluqli boʻlgan bandlarning ijro etilishi ustidan taʼsirchan parlament nazoratini amalga oshirish choralarini koʻrish tavsiya etilsin.

3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari A. Saidov zimmasiga yuklatilsin.

4. Ushbu Qaror qabul qilingan kundan eʼtiboran kuchga kiradi.