Oʻzbekiston Respublikasi Hukumati va Fransiya Respublikasi Hukumati, keyingi oʻrinlarda “Tomonlar” deb ataluvchilar,

Oʻzbekiston Respublikasi Hukumati bilan Fransiya Respublikasi Hukumati oʻrtasida 2016-yil 8-dekabrda Gamburg shahrida Oʻzbekiston Respublikasida Fransiya taraqqiyot agentligi va “PROPARKO”ni taʼsis etish va ularning faoliyati toʻgʻrisidagi Bitim (keyingi oʻrinlarda “Hukumatlararo bitim” deb ataluvchi) tuzilganligini inobatga olgan holda;

Oʻzbekiston Respublikasining iqtisodiy, siyosiy va ijtimoiy rivojlanishi maqsadlariga muvofiq Fransiya taraqqiyot agentligi (FTA), “PROPARKO” va “Expertise France” moliyaviy va texnik yordamini Oʻzbekiston Respublikasida qulaylashtirish uchun ushbu Bayonnoma (keyingi oʻrinlarda “Bayonnoma” deb ataluvchi) tuzilishi Tomonlarning umumiy manfaatlariga javob berishini qayd qilib;

“Expertise France”ga ham Oʻzbekiston Respublikasi hududida Fransiya taraqqiyot agentligi va “PROPARKO”ga qoʻllaniladigan maxsus maqomni berish orqali “Expertise France”ning FTA Guruhiga samarali integratsiyalashuvini inobatga olishni taʼkidlab;

quyidagilar toʻgʻrisida kelishib oldilar:

Mazkur Bayonnomaning maqsadi FTA Guruhining aʼzosi sifatida “Expertise France” uchun Hukumatlararo Bitimning qoʻllanilishini kengaytirish hisoblanadi.

Tomonlar Hukumatlararo bitimdagi FTA va “PROPARKO”ga tegishli boʻlgan havolalar “Expertise France”ni ham oʻz ichiga olishi uchun Hukumatlararo bitimga oʻzgartirishlar kiritilganiga rozilik bildirdilar.

Hukumatlararo Bitim shartlariga muvofiq Oʻzbekiston Respublikasi tomonidan oʻz hududida FTA va “PROPARKO”ga berilgan imtiyozlar va preferensiyalar, FTA Guruhining aʼzosi sifatida “Expertise France” uchun shuningdek, u yollagan xodimlarga, oʻz vazifalarini bajarish uchun zarur boʻlgan darajada qoʻllaniladi.

Hukumatlararo Bitimning 6-moddasi 6.5-bandi ikkinchi xatboshisi quyidagi tahrirda bayon etilsin:

“Vakolatxonalar faoliyati uchun zarur boʻlgan tovarlar va xizmatlar hamda import qilinadigan asbob-uskunalar uchun bojxona toʻlovlari va soliqlarni toʻlashdan ozod qilish.”.

Mazkur Bayonnoma Hukumatlararo bitimga ilova qilinadi va uning ajralmas qismi hisoblanadi.

Mazkur Bayonnoma Hukumatlararo Bitimning 8-moddasi 8.1-bandida belgilangan tartibda kuchga kiradi.

Samarqand shahrida, 2023-yil 2-noyabr kuni ikki (2) asl nusxada, har biri oʻzbek va fransuz tillarida imzolandi, bunda ikkala matn bir xil kuchga ega.