Respublikada aholini ijtimoiy muhim turdagi oziq-ovqat mahsulotlari bilan barqaror narxlarda uzluksiz va kafolatli taʼminlash maqsadida Vazirlar Mahkamasi qaror qiladi:

1. Vazirlar Mahkamasining “Aholini asosiy turdagi oziq-ovqat mahsulotlari bilan kafolatli taʼminlash va ichki bozorda narxlar barqarorligini saqlashga doir qoʻshimcha chora-tadbirlar toʻgʻrisida” 2021-yil 7-oktabrdagi 627-son qaroriga muvofiq oziq-ovqat mahsulotlarini import qilishda tadbirkorlik subyektlarini aylanma mablagʻlar bilan taʼminlash maqsadida Tiklanish va taraqqiyot jamgʻarmasi tomonidan 32,8 mln AQSh dollari hamda Oʻzbekiston Respublikasi Iqtisodiyot va moliya vazirligi tomonidan 200 mlrd soʻm miqdoridagi mablagʻlar 2024-yil 1-iyulga qadar qaytarish sharti bilan tijorat banklariga foizsiz depozitga joylashtirilganligi maʼlumot uchun qabul qilinsin.

2. Vazirlar Mahkamasining “Aholini asosiy turdagi oziq-ovqat mahsulotlari bilan kafolatli taʼminlash va ichki bozorda narxlar barqarorligini saqlashga doir qoʻshimcha chora-tadbirlar toʻgʻrisida” 2021-yil 7-oktabrdagi 627-son qarorining 2-bandi quyidagi tahrirda bayon etilsin:

“2. Oziq-ovqat mahsulotlarini import qilishda tadbirkorlik subyektlarini aylanma mablagʻlar bilan taʼminlash maqsadida Tiklanish va taraqqiyot jamgʻarmasi 32,8 mln AQSh dollari ekvivalentida milliy valyutada hamda Oʻzbekiston Respublikasi Iqtisodiyot va moliya vazirligi 200 mlrd soʻm miqdordagi mablagʻlarni tegishli tijorat banklariga ularning soʻrovlariga asosan 2025-yil 1-iyulga qadar qaytarish sharti bilan foizsiz depozitga joylashtirsin.

Belgilansinki, Tiklanish va taraqqiyot jamgʻarmasi hamda Oʻzbekiston Respublikasi Iqtisodiyot va moliya vazirligining foizsiz depozitlari hisobidan kreditlar tijorat banklari tomonidan tadbirkorlik subyektlariga likvidli garov taʼminoti asosida oʻsimlik yogʻi, kartoshka, guruch, shakar xomashyosi, goʻsht (mol, qoʻy, parranda goʻshti), muzlatilgan baliq importi uchun yillik 4 foiz stavkada ajratiladi”.

3. Oʻzbekiston Respublikasi Iqtisodiyot va moliya vazirligi hamda Tiklanish va taraqqiyot jamgʻarmasi 2024-yil 1-iyulga qadar tijorat banklari bilan birgalikda ushbu qarorning talablaridan kelib chiqqan holda tegishli shartnomalarni qayta rasmiylashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.