Oʻzbekiston Respublikasi Prezidentining “Iqtisodiy islohotlarni yanada chuqurlashtirish, xususiy mulk manfaatlarini himoya qilish va tadbirkorlikni rivojlantirish chora-tadbirlari toʻgʻrisida” gi Farmonining 12-bandiga muvofiq Vazirlar Mahkamasi qaror qiladi:

1. Xoʻjalik birlashmalarini davlat roʻyxatidan oʻtkazish haqidagi ilova qilinayotgan Nizom tasdiqlansin.

2. Belgilab qoʻyilsinki, Oʻzbekiston Respublikasi hududida faoliyat koʻrsatayotgan xoʻjalik birlashmalari (korporatsiyalar, konsernlar, uyushmalar, ittifoqlar, aksionerlik jamiyatlari va boshqalar), mulkchilik shaklidan qatʼi nazar, 1994-yil 1-iyulgacha Oʻzbekiston Respublikasi Adliya vazirligida va joylarda Qoraqalpogʻiston Respublikasi Adliya vazirligida, viloyat hokimliklari adliya boshqarmalarida davlat roʻyxatidan oʻtishlari kerak.

Belgilangan muddatda davlat roʻyxatidan oʻtmagan xoʻjalik birlashmalarining faoliyati noqonuniy hisoblanadi hamda ularning daromadi tegishli budjetga musodara qilinadi.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari faoliyat koʻrsatayotgan barcha xoʻjalik birlashmalarining 1994-yil 1-iyulgacha Oʻzbekiston Respublikasi Adliya vazirligida davlat roʻyxatidan oʻtishlarini taʼminlash majburiyatlarini yuklasinlar.

4. Vazirlar Mahkamasining 1991-yil 12-iyundagi 159-son qarori bilan tasdiqlangan Oʻzbekiston SSR hududidagi Nizomning 1-bandidan “birlashmalar” soʻzi chiqarib tashlansin (OʻzSSR, QT, 1991, 6-son, 19-modda).

1. Mazkur Nizom Oʻzbekiston Respublikasidagi xoʻjalik birlashmalarini davlat roʻyxatidan oʻtkazish tartibini nazarda tutadi.

2. Oʻzbekiston Respublikasi Adliya vazirligida davlat roʻyxatidan oʻtishi kerak boʻlgan xoʻjalik birlashmalari deb korporatsiyalar, konsernlar, uyushmalar, ittifoqlar, aksionerlik jamiyatlari va respublika ahamiyatiga ega boʻlgan mustaqil korxonalarning boshqa birlashmalari, shuningdek, Toshkent shahrida joylashgan, tarmoq, hududiy yoki boshqa prinsiplar boʻyicha birgalikdagi faoliyatni muvofiqlashtirish va yuritish, ularning huquqlarini taʼminlash, tegishli davlat organlarida va boshqa organlarda ularning umumiy manfaatlarini ifodalash maqsadida tashkil etilgan boshqa birlashmalar hisoblanadi.

3. Qoraqalpogʻiston Respublikasidagi, viloyatlardagi xoʻjalik birlashmalari tegishli ravishda Qoraqalpogʻiston Respublikasi Adliya vazirligida, viloyat hokimliklari adliya boshqarmalarida roʻyxatdan oʻtadilar.

4. Xoʻjalik birlashmalarini davlat roʻyxatidan oʻtkazish uchun quyidagi hujjatlar taqdim etiladi:

a) xoʻjalik birlashmasini davlat roʻyxatidan oʻtkazish toʻgʻrisida ariza;

b) taʼsis shartnomasi va Ustav qabul qilinganligi toʻgʻrisidagi taʼsis yigʻilishi (konferensiyasi) bayoni;

taʼsis shartnomasi va Ustavning notarius tomonidan tasdiqlangan nusxalari, tovar belgisi;

v) yangidan tashkil etilayotgan xoʻjalik birlashmalari uchun –– agar uning ishlab chiqarish faoliyati uchun yer uchastkasi talab etilsa, yerdan foydalanuvchining rozilik xati;

g) korxonaning Oʻzbekiston Respublikasi Davlat tabiatni muhofaza qilish qoʻmitasi mahalliy organlarida roʻyxatdan oʻtkazganligi toʻgʻrisida maʼlumotnoma;

d) xoʻjalik birlashmasini roʻyxatdan oʻtkazganlik uchun belgilangan miqdorda yigʻim toʻlanganligini tasdiqlovchi bank toʻlov hujjati.

5. Xoʻjalik birlashmasini davlat roʻyxatidan oʻtkazilganlik uchun eng kam ish haqining besh baravari miqdorida yigʻim undiriladi. Olingan mablagʻning 20 foizi Oʻzbekiston Respublikasi Adliya vazirligining markazlashtirilgan schyotiga, qolganlari respublika (Oʻzbekiston Respublikasi Adliya vazirligida roʻyxatdan oʻtkazilganda) yoki mahalliy budjetga oʻtkaziladi.

Taʼsis hujjatlari oʻzgarganda yoki ularga qoʻshimchalar kiritilganda, shuningdek, xoʻjalik birlashmasi qayta tashkil etilganda qayta roʻyxatdan oʻtkazish amalga oshiriladi, buning uchun roʻyxatdan oʻtkazganlik uchun toʻlangan summaning yarmi miqdorida yigʻim undiriladi.

6. Xoʻjalik birlashmalarini davlat roʻyxatidan oʻtkazish zarur hujjatlar ilova qilingan xolda roʻyxatdan oʻtkazish toʻgʻrisidagi ariza olingan paytdan boshlab 30 kundan kechikmay amalga oshiriladi. Davlat roʻyxatiga olinganlik toʻgʻrisidagi maʼlumotlar roʻyxatga olingandan keyin10 kun muddatda korxona joylashgan joydagi soliq organlariga maʼlum qilinadi.

Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyat hokimliklarining Adliya boshqarmalari davlat roʻyxatidan xoʻjalik birlashmalarining 1-ilovaga muvofiq reyestrini yuritadilar.

7. Roʻyxatga olingan xoʻjalik birlashmasiga roʻyxatdan oʻtganlik toʻgʻrisidagi guvohnoma beriladi (2-ilova).

8. Faoliyat koʻrsatib turgan xoʻjalik birlashmasi tomonidan Oʻzbekiston Respublikasi qonun hujjatlariga zid boʻlgan taʼsis hujjatlari taqdim etilganligi munosabati bilan uni davlat roʻyxatidan oʻtkazish rad etilganda, roʻyxatga oluvchi bu haqda hisob-kitob operatsiyalarini toʻxtatish uchun mablagʻ bilan taʼminlovchi bankka maʼlum qiladi. Xoʻjalik birlashmalarini tugatish Oʻzbekiston Respublikasi qonun hujjatlarida belgilangan tartibda amalga oshiriladi.

9. Oʻzbekiston Respublikasi Adliya vazirligi roʻyxatga oluvchi organ sifatida xoʻjalik birlashmalari tomonidan oʻzlarining taʼsis shartnomalari va ustavlariga rioya etishlari ustidan nazoratni amalga oshiradi. Roʻyxatdan oʻtkazish va qayta roʻyxatdan oʻtkazish tartibi buzilgan taqdirda, shuningdek, xoʻjalik birlashmalari tomonidan taʼsis hujjatlariga rioya qilinmaganda (korxonalarning xoʻjalik faoliyatiga aralashish, ustavda nazarda tutilmagan faoliyat turlari bilan shugʻullanish va boshqalar) roʻyxatga oluvchi organ birlashmadan xoʻjalik sudi orqali eng kam ish haqining 100 baravari miqdorida jarima undirib olishga haqlidir.

Jarima respublika budjeti daromadiga oʻtkaziladi. Bunday daʼvolar bilan xoʻjalik sudiga murojaat qilishda Oʻzbekiston Respublikasi Adliya vazirligi va uning organlari davlat boji toʻlashdan ozod qilinadilar.

Agar xoʻjalik birlashmalari ulardan jarima undirib olingandan keyin amaldagi qonun hujjatlarini buzishni davom ettirsalar hamda taʼsis hujjatlarida belgilangan vakolatlardan chetga chiqsalar, roʻyxatga oluvchi organ ularni tugatish toʻgʻrisidagi daʼvo bilan xoʻjalik sudiga murojaat qilishga haqlidir.

10. Oʻzbekiston Respublikasi hududida faoliyat koʻrsatayotgan xoʻjalik birlashmalari qayta tashkil etilgan yoki ularning tuzilmasida shuningdek faoliyat turlarida oʻzgartishlar yuz bergan taqdirda, ular bir hafta muddatda roʻyxatdan oʻtkazgan organga qayta roʻyxatdan oʻtkazish uchun hujjatlarni taqdim etadilar.

11. Ushbu Nizom xorijiy investitsiyalar ishtirokida tuzilgan xoʻjalik birlashmalariga, shu jumladan, qoʻshma korxonalar, xalqaro birlashmalar, shuningdek, tarkibiy boʻlinmalari tomonidan tashkil etilayotgan xoʻjalik birlashmalariga joriy etilmaydi.