“Parlament nazorati toʻgʻrisida”gi Oʻzbekiston Respublikasi Qonunining 14-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. “Oʻzbekiston Respublikasi qurilish tarmogʻini modernizatsiya qilish, jadal va innovatsion rivojlantirishning 2021 — 2025-yillarga moʻljallangan strategiyasi doirasida amalga oshirilayotgan ishlar toʻgʻrisida”gi Oʻzbekiston Respublikasi Oliy Majlisi Qonunchilik palatasining parlament soʻroviga Oʻzbekiston Respublikasi qurilish va uy-joy kommunal xoʻjaligi vaziri B. Zakirov tomonidan yuborilgan yozma javob maʼlumot uchun qabul qilinsin.

2. Oʻzbekiston Respublikasi Qurilish va uy-joy kommunal xoʻjaligi vazirligiga:

qurilish tarmogʻini rivojlantirish, boshqaruv tizimi samaradorligini oshirish, ilgʻor xorijiy tajribalarni qoʻllash va raqamli texnologiyalarni joriy etish maqsadida aholi punktlarining shaharsozlik hujjatlarini ishlab chiqish, shuningdek hududlarda qurilishlarni rejalashtirish va ruxsat beruvchi hujjatlarni rasmiylashtirishda bosh rejalarga amal qilish borasidagi nazoratni kuchaytirish;

shaharsozlik normalari va qoidalarini takomillashtirish, xalqaro normalar bilan uygʻunlashtirish, loyiha hujjatlarini tayyorlash hamda ekspertiza qilishda ularga rioya etish, shuningdek qurilish ishlarini amalga oshirishda sifat nazoratining taʼminlanishi choralarini koʻrish;

qurilish sohasida zamonaviy axborot-kommunikatsiya texnologiyalarini keng joriy etish orqali sohaga oid barcha jarayonlarni raqamlashtirish va “Shaffof qurilish” milliy axborot tizimini yanada kengaytirish choralarini koʻrish;

Oʻzbekiston Respublikasi Prezidenti rahbarligida 2024-yil 29-yanvar kuni uy-joy, qurilish, kommunal xoʻjaligi, transport va ekologiya sohalarida 2024-yilda amalga oshirilishi lozim boʻlgan ustuvor vazifalar yuzasidan oʻtkazilgan videoselektor yigʻilishidan kelib chiqib, uy-joy, qurilish va kommunal xoʻjaligi sohalarida manzilli chora-tadbirlarni belgilab olish va uning ijrosini taʼminlash choralarini koʻrish tavsiya etilsin.

3. Oʻzbekiston Respublikasi Oliy Majlisi Qonunchilik palatasining Sanoat, qurilish va savdo masalalari qoʻmitasi yozma javob maʼlumotida qayd etilgan, parlament soʻrovini koʻrib chiqish natijalari boʻyicha belgilangan vazifalarning ijro etilishini taʼminlash yuzasidan parlament nazoratini amalga oshirsin.

4. Oʻzbekiston Respublikasi Qurilish va uy-joy kommunal xoʻjaligi vazirligi ushbu Qarorning ijrosi yuzasidan 2024-yilning 1-avgustiga qadar Oʻzbekiston Respublikasi Oliy Majlisining Qonunchilik palatasiga axborot taqdim etsin.

5. Mazkur Qaror Oʻzbekiston Respublikasi Qurilish va uy-joy kommunal xoʻjaligi vazirligiga yuborilsin.

6. Ushbu Qaror qabul qilingan kundan eʼtiboran kuchga kiradi.