Oʻzbekiston Respublikasi Oliy Majlisi Qonunchilik palatasi huzuridagi Yoshlar parlamentining (bundan buyon matnda Yoshlar parlamenti deb yuritiladi) 2023-yildagi faoliyati toʻgʻrisidagi axborotini koʻrib chiqib, Oʻzbekiston Respublikasi Oliy Majlisi Qonunchilik palatasi taʼkidlaydiki, hisobot davrida Yoshlar parlamenti tomonidan yoshlarni har tomonlama qoʻllab-quvvatlash, ularning mamlakatda olib borilayotgan islohotlar hamda ijtimoiy-siyosiy jarayonlardagi ishtirokiga koʻmaklashish, parlament hayotiga jalb qilish, huquqiy ongi va savodxonligini oshirishga ustuvor vazifa sifatida qaralgan.

Yoshlar parlamenti aʼzolarining Oʻzbekiston Respublikasi Oliy Majlisi Qonunchilik palatasidagi (bundan buyon matnda Qonunchilik palatasi deb yuritiladi) siyosiy partiyalar fraksiyalari bilan hamkorligi yoʻlga qoʻyilib, ularning fraksiya majlislarida ishtirok etib borishi taʼminlangan.

Oʻtgan davr mobaynida Yoshlar parlamenti tomonidan yoshlarni qonun ijodkorligi jarayoniga jalb etish hamda qabul qilinayotgan qonunlarni yoshlar orasida keng targʻib qilish masalalariga alohida eʼtibor berilgan. 2023-yilda Oʻzbekiston Respublikasi Oliy Majlisi Qonunchilik palatasida koʻrib chiqilgan qonun loyihalaridan 21 tasi yuzasidan 455 ta taklif tayyorlangan.

Shuningdek qonun ijodkorligi va huquqni qoʻllash amaliyotining muhim masalalarini yoshlar ishtirokida muhokama etishga, Qonunchilik palatasi qoʻmitalari hamda siyosiy partiyalar fraksiyalari faoliyati toʻgʻrisida yoshlarni keng xabardor qilishga qaratilgan 2 210 ta tadbir oʻtkazilgan.

Jumladan “Parlament va yoshlar”, “Qonun ijodkorligida yoshlarning oʻrni”, “Yoshlarga qonunchilikda qanday imtiyozlar bor?”, “Yosh olimlar ligasi”, “Yosh adolatchilar”, “Yosh akademiklar”, “Yosh ekologlar”, “Yosh siyosatchilar ligasi”, “Yoshlarga huquqiy koʻmak”, “Yoshlar huquqlari — eʼtiborda” kabi mavzularda oʻtkazilgan tadbirlarda 10 mingdan ziyod yoshlar qamrab olingan.

Qonunchilik palatasi deputatlarining hududlardagi uchrashuvlari, nazorat-tahlil tadbirlari va saylovchilar bilan muloqotlari jarayonida Yoshlar parlamenti aʼzolarining 61 marotaba bevosita ishtirok etishi taʼminlangan.

Shu bilan birga Yoshlar parlamenti tomonidan davlat organlari bilan ham faol hamkorlik yoʻlga qoʻyilgan boʻlib, uning 150 nafar aʼzosi 21 ta vazirlik va idoraga biriktirilgan. Buning amaliy natijasi oʻlaroq hisobot yilida 13 ta vazirlik va idorada amaliy uchrashuvlar tashkil etilgan.

Oʻtgan davrda xorijdagi yoshlar hamda chet davlatlarning qonun chiqaruvchi organlari huzuridagi Yoshlar parlamentlari bilan hamkorlik koʻlami sezilarli darajada kengaygan. Yoshlar parlament aʼzolari 21 ta xalqaro tadbirda, shu jumladan 9 ta xorijiy davlatda oʻtkazilgan anjumanlarda ishtirok etgan. Belarus Respublikasi Milliy Assambleyasi huzuridagi hamda Rossiya Federatsiyasi Federal Majlisi Davlat Dumasi huzuridagi Yoshlar parlamenti oʻrtasida hamkorlik uchrashuvlari oʻtkazilgan.

Yoshlar parlamenti faoliyati haqida jamoatchilikni, ayniqsa yoshlarni keng xabardor qilish maqsadida uning aʼzolari tomonidan ommaviy axborot vositalarida jami 10 456-marta chiqish qilingan.

Shu bilan birga Yoshlar parlamentining hisobot davridagi faoliyatining tahlili bu borada eʼtibor qaratilishi lozim boʻlgan ayrim masalalar ham mavjudligini koʻrsatmoqda.

Xususan Yoshlar parlamentining Qonunchilik palatasining qoʻmitalari bilan amaliy hamkorligini hamda qonun ijodkorligi va nazorat-tahlil tadbirlaridagi ishtirokini yanada kengaytirish borasidagi ishlar yetarli darajada tashkil etilmagan.

Shuningdek talaba-yoshlar bilan ishlash, ularni oʻtkaziladigan tadbirlarga jalb etish qamrovini kengaytirish, oʻzaro amaliy hamkorlikni kuchaytirish maqsadga muvofiq.

Yuqorida bayon etilganlardan kelib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Oliy Majlisi Qonunchilik palatasi huzuridagi Yoshlar parlamenti raisi Sh. Joldasovaning Oʻzbekiston Respublikasi Oliy Majlisi Qonunchilik palatasi huzuridagi Yoshlar parlamentining 2023-yildagi faoliyati toʻgʻrisidagi axboroti maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasining Yoshlar masalalari boʻyicha komissiyasi (M. Valiyev):

Yoshlar parlamentining ishini samarali tashkil etish, Yoshlar parlamenti aʼzolarini Qonunchilik palatasi faoliyatiga yanada kengroq jalb qilish;

Oʻzbekiston Respublikasi Oliy Majlisi Qonunchilik palatasining qoʻmitalari tomonidan oʻtkaziladigan nazorat-tahlil tadbirlarida Yoshlar parlamenti aʼzolarining faol ishtirokini taʼminlash;

Yoshlar parlamentining vazirlik va idoralar bilan amaliy hamkorlikni kuchaytirish ishlariga koʻmaklashish choralarini koʻrsin.

3. Oʻzbekiston Respublikasi Oliy Majlisi Qonunchilik palatasi huzuridagi Yoshlar parlamenti (Sh. Joldasova):

Yoshlar parlamentining Oʻzbekiston Respublikasi Oliy Majlisi Qonunchilik palatasining qoʻmitalari bilan oʻzaro hamkorlik qilish borasidagi ishlarini yanada jonlantirish;

Yoshlar parlamenti aʼzolarining talaba-yoshlar bilan amaliy hamkorligini yanada kuchaytirish hamda oʻtkaziladigan tadbirlarga ularni yanada kengroq jalb qilish;

Yoshlar parlamenti aʼzolari tomonidan oʻzlari biriktirilgan tashkilotlar rahbarlari tomonidan yoshlar bilan ishlash boʻyicha amalga oshirilayotgan ishlar holatini oʻrganib borish choralarini koʻrsin.

4. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari O. Tojiyev zimmasiga yuklatilsin.

5. Ushbu Qaror qabul qilingan kundan eʼtiboran kuchga kiradi.