Oʻzbekiston Respublikasi Hukumati va Chexiya Respublikasi Hukumati (keyingi oʻrinlarda “Tomonlar” deb ataluvchilar),

Oʻttiz yildan ortiq vaqt mobaynida rivojlangan siyosiy, iqtisodiy va madaniy aloqalarni katta mamnuniyat bilan qayd etib;

Birlashgan Millatlar Tashkiloti Nizomida belgilangan tamoyillarga, shuningdek, demokratiya, qonun ustuvorligi, inson huquqlari va asosiy erkinliklari qadriyatlariga qatʼiy sodiqligini tasdiqlab;

Xalqaro tinchlik, farovonlik va barqaror rivojlanishga hissa qoʻshishda oʻz roli va masʼuliyatini anglab;

Siyosiy muloqotni davom ettirish va ikki tomonlama savdo va investitsiyalarni chuqurlashtirish, shuningdek, oʻzaro manfaatdor boʻlgan turli sohalarda odamlar oʻrtasidagi almashinuv va sohaviy hamkorlik salohiyatini rivojlantirish va ragʻbatlantirishni qoʻllab-quvvatlash muhimligini alohida eʼtirof etib;

1996-yil 21-iyunda Florensiya shahrida imzolangan Oʻzbekiston Respublikasi, bir tomondan, Yevropa Hamjamiyatlari va ularga aʼzo-davlatlar, ikkinchi tomondan, oʻrtasida sherikchilik taʼsis etuvchi sherikchilik va hamkorlik toʻgʻrisidagi Bitim doirasida erishilgan yuqori natijalarni inobatga olib;

Oʻzaro manfaatli sohalarda hamkorlikni yanada kengaytirish va mustahkamlashga qaror qilib;

Tomonlar ikki tomonlama munosabatlarni kengaytirilgan hamkorlik darajasiga koʻtarishga kelishib oldilar va quyidagilarni eʼlon qildilar:

1. Tomonlar Kengaytirilgan hamkorlikni amalga oshirishga qaratilgan siyosiy muloqotni faollashtiradilar.

2. Ikkala Tomon ham yuqori darajalarda, xususan, Tashqi ishlar vazirliklari oʻrtasida oʻzaro manfaatli masalalar boʻyicha ikki tomonlama almashuvlar va maslahatlashuvlarni yanada muntazam oʻtkazishga harakat qiladilar.

3. Tomonlar muloqotning ahamiyati va rolini qayd etib, ikki mamlakat delegatsiyalarining oʻzaro tashriflarini faollashtirishga, shuningdek, ikki tomonlama parlamentlararo munosabatlarni yanada rivojlantirishni ragʻbatlantirishga tayyor ekanliklarini bildiradilar.

4. Tomonlar Oʻzbekiston Respublikasi Mudofaa vazirligi bilan Chexiya Respublikasi Mudofaa vazirligi oʻrtasida 2018-yil 21-mayda Toshkent shahrida imzolangan hamkorlik toʻgʻrisidagi Bitimga asoslanib, mudofaa sohasidagi hamkorlikni yanada rivojlantirish istagini bildiradilar. Ular, shuningdek, hukumatlar oʻrtasidagi hamkorlik imkoniyatlarini, jumladan, mudofaa sanoati kooperatsiyasi sohasidagi imkoniyatlarni oʻrganadilar.

5. Tomonlar amaldagi ikki tomonlama shartnoma bazasi yuzasidan maslahatlashuvlar oʻtkazishni va uni kelgusida rivojlantirish imkoniyatlarini koʻrib chiqish istagini bildiradilar.

6. Tomonlar oʻzaro manfaatli savdo va sarmoyalarni barqaror oshirish va rivojlantirishga koʻmaklashishda hamkorlik qilishga tayyorliklarini bildiradilar.

7. Har ikki Tomon ham oʻz vakolatxonalari oʻrtasida savdo va sarmoya, oʻzaro manfaatli aloqador sohalar, ishbilarmonlik hamkorlik, makroiqtisodiy siyosat va tendensiyalar boʻyicha muloqotni kengaytirish istagini bildiradilar. Oʻzbekiston Respublikasi Hukumati bilan Chexiya Respublikasi Hukumati oʻrtasida 2004-yil 28-iyunda Toshkentda imzolangan iqtisodiy, sanoat va ilmiy-texnikaviy hamkorlik toʻgʻrisidagi Bitimga muvofiq tashkil etilgan Iqtisodiy, sanoat, ilmiy-texnikaviy hamkorlik boʻyicha Oʻzbekiston-Chexiya qoʻshma hukumatlararo komissiyasi alohida rol oʻynaydi.

8. Tomonlar Oʻzbekistondan Yevropa Ittifoqiga eksport qilish imkoniyatini beruvchi GSP+ imtiyozli tizimining ahamiyatini eʼtirof etgan holda oʻzaro savdo hajmini oshirish va koʻlamini kengaytirish istagini bildiradilar. Tomonlar, shuningdek, Chexiya Respublikasidan Oʻzbekistonga asbob-uskunalar va ilgʻor texnologiyalar yetkazib berish hajmini yanada oshirish uchun shart-sharoit yaratish istagini bildiradilar.

9. Ikkala Tomon ham tegishli vazirliklar va ularning idoralari oʻrtasida savdo, sarmoya yoki turizmni rivojlantirishga xizmat qiluvchi aloqalar va oʻzaro manfaatli hamkorlikni kuchaytirishga hissa qoʻshadilar.

10. Ikkala Tomon ham bir-birining hududlariga, jumladan, infratuzilma, energetika (xususan, qayta tiklanuvchi manbalar) va qishloq xoʻjaligi sohalariga sarmoya kiritishni yanada ragʻbatlantiradilar va osonlashtiradilar.

11. Ikkala Tomon ham kichik va oʻrta biznesga alohida eʼtibor qaratgan holda, qoʻshma korxonalarni rivojlantirishga koʻmaklashish va turli sohalardagi tadbirkorlar oʻrtasidagi aloqalarni oshirishni davom ettiradilar.

12. Tomonlar, jumladan, togʻ-kon sanoati va xomashyoni qayta ishlash, energetika, sanoat kooperatsiyasi, transport va qishloq xoʻjaligi sohalarida sheriklik va hamkorlik boʻyicha muntazam muloqot oʻtkazishni qoʻllab-quvvatlaydilar.

13. Ikkala Tomon ham toza va ekologik barqaror texnologiyalarni ishlab chiqarish, uzatish va tarqatishni qoʻllab-quvvatlaydilar.

14. Energetika sektorining iqtisodiy va ijtimoiy rivojlanishi uchun strategik ahamiyatini eʼtirof etgan holda, Tomonlar anʼanaviy va qayta tiklanuvchi energiya hamda energiya samaradorligi sohasida hamkorlikni yoʻlga qoʻyish istagini bildiradilar. Oʻzbekiston tomoni Chexiya energetika kompaniyalarini elektr stansiyalari qurilishi loyihalarida, jumladan qayta tiklanuvchi energiya manbalari sohasida ishtirok etishga taklif qiladi.

15. Ikkala Tomon ham Yevropa Ittifoqi standartlariga muvofiq standartlashtirish, metrologiya va sinov sohalarida hamkorlikni davom ettiradilar va kengaytiradilar.

16. Ikkala Tomon ham asosiy eʼtiborni tegishli institutlarning bevosita hamkorligiga qaratgan holda fan, innovatsiyalar va zamonaviy texnologiyalar sohalarida hamkorlik faoliyatini, xususan, Oʻzbekiston Respublikasi Oliy taʼlim, fan va innovatsiyalar vazirligi hamda Chexiya Respublikasi Texnologiyalar agentligi va Fanni qoʻllab-quvvatlash jamgʻarmasi orqali ragʻbatlantiradilar, rivojlantiradilar va koʻmaklashadilar. Tomonlar, shuningdek, kompaniyalar va universitetlar oʻrtasidagi aloqalarni kengaytirish orqali sanoat innovatsiyalari, texnologiyalar, nou-xau yoki tajriba almashish sohasidagi hamkorlikni qoʻllab-quvvatlaydi.

17. Ikkala Tomon ham tibbiy asboblar sektori va sogʻliqni saqlashning boshqa sohalarida oʻzaro manfaatli hamkorlik imkoniyatlariga eʼtibor qaratadilar.

18. Tomonlar oʻzaro aloqalarni, shu jumladan transport infratuzilmasi tarmoqlari, toʻgʻridan-toʻgʻri aviaqatnovlar, logistika provayderlari va transport operatorlari sohalarida aloqalarni kengaytirishga tayyorliklarini bildiradilar va hamkorlik qiladilar uchun, ayniqsa, mavjud ikki tomonlama bitimlar asosida katta salohiyat mavjudligini eʼtirof etadilar.

19. Tomonlar, shuningdek, charm, ipak mahsulotlari va sanoat kanopi mahsulotlarini birgalikda ishlab chiqarish va yetkazib berish boʻyicha loyiha va shartnomalarni ragʻbatlantiradilar.

20. Tomonlar qoramol va mayda shoxli mollarni koʻpaytirish, shuningdek, chorvachilik mahsulotlarini qayta ishlash boʻyicha qoʻshma loyihalarni amalga oshirish boʻyicha hamkorlikni yoʻlga qoʻyish istagini bildiradilar.

21. Chexiya tomoni Oʻzbekistonning Jahon savdo tashkilotiga (JST) aʼzo boʻlish jarayoniga har tomonlama yordam koʻrsatishga tayyorligini bildirdi, shuningdek, Oʻzbekiston Respublikasi va Yevropa Ittifoqi oʻrtasida Kengaytirilgan sherikchilik va hamkorlik toʻgʻrisidagi Bitim imzolanishini qoʻllab-quvvatladi.

22. Har ikki Tomon madaniy hamkorlikni va oʻz madaniyatlari boʻyicha oʻzaro tushunishni oshirish maqsadida ular oʻrtasida odamlar oʻrtasidagi almashinuvni rivojlantirishga yordam beradilar.

23. Har ikki Tomon ikki tomonlama, shuningdek, Oʻzbekiston Respublikasi va Yevropa Ittifoqi hamkorligi doirasida oʻrnatilgan tegishli asoslar va vositalardan foydalangan holda tadqiqotchilar va talabalarning harakatchanligini taʼminlash yoʻllarini izlaydilar.

24. Tomonlar taʼlim sifatini oshirishga qaratilgan siyosat boʻyicha shu jumladan, kasbiy va texnik taʼlim sohasida tajriba va koʻnikmalar almashish istagini bildiradilar.

25. Iqtisodiy manfaatlar, doʻstlik va oʻzaro hamjihatlikni taʼminlashda turizmning muhim rolini taʼkidlagan holda, ikkala Tomon turizm sohasidagi hamkorlikni, jumladan, Chexiya Respublikasining ilgʻor texnologiyalari va ilgʻor tajribasini jalb etishni, turizm taʼlimi, ikki davlatning yirik shaharlari oʻrtasida toʻgʻridan-toʻgʻri aviaqatnovlarni yoʻlga qoʻyish va turizm biznesi hamkorligini kengaytirishni mustahkamlaydilar.

26. Ikkala Tomon madaniy va ijodiy sohalarda, jumladan kino, animatsiya, musiqa, musiqa asboblari ishlab chiqarish yoki koʻrgazmalar tashkil etishda ikki tomonlama hamkorlikni rivojlantirish boʻyicha birgalikdagi saʼy-harakatlarni amalga oshirish istagini bildiradilar.

27. Ikkala Tomon ham oʻzbek va chex arxeologlari oʻrtasidagi 20 yillik hamkorlikni rivojlantirishda davom etadilar.

28. Ikkala Tomon ikki mamlakatning yosh avlodlari oʻrtasida doʻstona aloqalarni rivojlantirish maqsadida yoshlar sohasida mumkin boʻlgan hamkorlik masalalarini muhokama qilishdan manfaatdorligini bildiradilar.

29. Ikkala Tomon ham Markaziy Osiyo va Yevropa Ittifoqi oʻrtasidagi mintaqaviy hamkorlikka faol hissa qoʻshishda davom etadilar.

30. Tomonlar Birlashgan Millatlar Tashkiloti, Yevropa Xavfsizlik va Hamkorlik Tashkiloti kabi xalqaro va mintaqaviy tashkilotlar va boshqa koʻp tomonlama mexanizmlar doirasida, jumladan, inson huquqlari va qonun ustuvorligi sohasida hamkorlik va fikr almashishni kuchaytirish istagini bildiradilar va xalqaro tashkilotlarga bir-birlarining nomzodlarini qoʻllab-quvvatlash imkoniyatlarini kengaytiradilar.

31. Tomonlar suv resurslarini boshqarish va iqlim oʻzgarishi kabi global muammolar boʻyicha hamkorlikni rivojlantirishga tayyorliklarini bildiradilar.

32. Tomonlar har bir aniq sohada hamkorlik shakllari va yoʻnalishlarini kelgusida ishlab chiqadilar. Mazkur Deklaratsiyani amalga oshirishni Oʻzbekiston Respublikasi Tashqi ishlar vazirligi hamda Chexiya Respublikasi Tashqi ishlar vazirligi muvofiqlashtiradilar.

33. Mazkur Qoʻshma deklaratsiya xalqaro shartnoma hisoblanmaydi va xalqaro huquqqa muvofiq huquq va majburiyatlarni keltirib chiqarmaydi.

Praga shahrida 2023-yil 10-oktabrda ingliz tilida qabul qilindi.