Oʻzbekiston Respublikasi Oliy Majlisi Qonunchilik palatasining 2022-yildagi faoliyati yakunlariga koʻra xalq manfaatlarini himoya qilishda faollik koʻrsatganligi, oʻz saylovchilari bilan doimiy muloqotda boʻlganligi, jismoniy va yuridik shaxslarning murojaatlarini koʻrib chiqishda, oʻz saylov okrugidagi muammolarni bartaraf etishda deputat nazoratidan faol foydalanganligini inobatga olib, shuningdek Oʻzbekiston Respublikasi Oliy Majlisi Qonunchilik palatasi deputatlarini maʼnaviy va moddiy ragʻbatlantirish boʻyicha komissiya tavsiyasiga muvofiq Qonunchilik palatasining Kengashi kiritgan taklifga asosan Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Oliy Majlisi Qonunchilik palatasining deputati Mavjuda Gʻaniyevna Hasanovaga “Xalqparvar deputat” maqomi berilsin.

2. Oʻzbekiston Respublikasi Oliy Majlisi Qonunchilik palatasining deputati M.Gʻ. Hasanovaga “Xalqparvar deputat” guvohnomasi hamda bazaviy hisoblash miqdorining besh baravari miqdorida bir martalik pul mukofoti berilsin.

3. Oʻzbekiston Xalq demokratik partiyasiga M.Gʻ. Hasanovani Oʻzbekiston Respublikasi Oliy Majlisi Qonunchilik palatasiga boʻlib oʻtadigan keyingi saylovlarda deputatlikka nomzod sifatida koʻrsatish tavsiya etilsin.

4. Ushbu Qaror qabul qilingan kundan eʼtiboran kuchga kiradi.