Oʻzbekiston Respublikasining 2022-yil 11-martdagi OʻRQ-758-son “Soliq maʼmuriyatchiligi takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni hamda Oʻzbekiston Respublikasi Prezidentining 2022-yil 21-dekabrdagi PF-269-son “Yangi Oʻzbekiston maʼmuriy islohotlarini amalga oshirish chora-tadbirlari toʻgʻrisida”gi Farmoniga muvofiq buyuraman:

1. Oʻzbekiston Respublikasi Davlat geologiya va mineral resurslar qoʻmitasining 2012-yil 3-sentabrdagi 5-son qarori (roʻyxat raqami 2395, 2012-yil 23-oktabr) (Oʻzbekiston Respublikasi qonun hujjatlari toʻplami, 2012-y., 43-son, 498-modda) bilan tasdiqlangan Geologiya-qidiruv ishlari qiymatini joriy narxlarda hisob-kitob qilish tartibi toʻgʻrisidagi yoʻriqnomaga ilovaga muvofiq oʻzgartirishlar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Muqaddima quyidagi tahrirda bayon etilsin:

“Mazkur Yoʻriqnoma Oʻzbekiston Respublikasi Davlat budjetidan moliyalashtiriladigan va Oʻzbekiston Respublikasi Togʻ-kon sanoati va geologiya vazirligi va uning tizimidagi tashkilotlar, “Navoiyuran” davlat korxonasi, “Navoiy kon-metallurgiya kombinati” AJ va “Olmaliq kon-metallurgiya kombinati” AJ tomonidan amalga oshiriladigan geologiya-qidiruv ishlari qiymatini joriy narxlarda hisob-kitob qilish tartibini belgilaydi.”.

2. 1-band quyidagi tahrirda bayon etilsin:

“1. Ushbu Yoʻriqnoma Oʻzbekiston Respublikasi Iqtisodiyot va moliya vazirligi Bilan kelishilgan geologiya-qidiruv ishlarining yillik dasturiga kiritiladigan obyektlarga oid loyiha-smeta hujjatlarini tuzishda qoʻllaniladi.”.

3. 2-bandning birinchi xatboshisi quyidagi tahrirda bayon etilsin:

“2. Mazkur Yoʻriqnoma Oʻzbekiston Respublikasi Davlat budjetidan moliyalashtiriladigan va Geologiya-qidiruv ishlarining yillik dasturlarini Oʻzbekiston Respublikasining Davlat budjetidan moliyalashtirish tartibi toʻgʻrisidagi nizomning (roʻyxat raqami 2662, 2015-yil 2-aprel) 3-bandida koʻrsatilgan geologiya-qidiruv ishlarining turlariga tatbiq etiladi.”.

4. 3-banddagi “Davlat geologiya qoʻmitasi” degan soʻzlar “Togʻ-kon sanoati va geologiya vazirligi” degan soʻzlar bilan almashtirilsin.

5. 4-bandning uchinchi xatboshisi quyidagi tahrirda bayon etilsin:

“mehnat sarfi qiymatini baholash uchun Statistika hisoboti shakllarining (roʻyxat raqami 3401, 2022-yil 12-dekabr) 43-ilovasiga muvofiq shakldagi Mehnat hisobotiga (bundan buyon matnda 1-T hisoboti deb yuritiladi) muvofiq oʻtgan yil uchun ishlab chiqarish xodimlarining oʻrtacha ish haqini qoʻllash;”.

6. 28-bandda:

toʻrtinchi xatboshidagi “Mehnat va aholini ijtimoiy muhofaza qilish vazirligining” degan soʻzlar “Kambagʻallikni qisqartirish va bandlik vazirligining” degan soʻzlar bilan almashtirilsin;

beshinchi xatboshi quyidagi tahrirda bayon etilsin:

“Ch —Oʻtgan yil uchun ishlab chiqarish xodimlarining oylik oʻrtacha soni.”.

7. 30-band quyidagi tahrirda bayon etilsin:

“30. Joriy narxlar ishlab chiqaruvchi tashkilotlarning va materiallarni yetkazib beruvchilarning sotish narxlari, birja narxlari, Oʻzbekiston Respublikasi hududida qurilish-montaj ishlarini amalga oshirishda qoʻllaniladigan moddiy-texnika resurslarining joriy narxlari katalogi, shuningdek Oʻzbekiston Respublikasi buxgalteriya hisobi Milliy standarti (4-sonli BHMS) “Tovar-moddiy zaxiralar”ning (roʻyxat raqami 3259, 2020-yil 30-iyun) 52-bandiga muvofiq belgilanishi mumkin.”.

8. 33-bandining ikkinchi xatboshisi quyidagi tahrirda bayon etilsin:

“Loyiha-smeta hujjatlarini tuzishda geologiya-qidiruv ishlari qiymati joriy narxlarda qoʻllaniladigan davr xarajatlari va foyda miqdori Oʻzbekiston Respublikasi moliya vazirining 2002-yil 27-dekabrdagi 140-son “Moliyaviy hisobot shakllari va ularni toʻldirish boʻyicha qoidalarni tasdiqlash toʻgʻrisida”gi buyrugʻining (roʻyxat raqami 1209, 2003-yil 24-yanvar) 2-son shakldagi moliyaviy natijalar toʻgʻrisidagi hisobot — 2-shakl, 1-T hisoboti va Statistika hisoboti shakllarining (roʻyxat raqami 3401, 2022-yil 12-dekabr) 96-ilovasiga muvofiq shakldagi tashkilot xoʻjalik faoliyatining asosiy koʻrsatkichlari toʻgʻrisida hisoboti, shuningdek hisobot koʻrsatkichlarining tahlili asosida oʻtgan yil uchun amaldagi maʼlumotlar boʻyicha hisob-kitob qilinadi.”.

9. 35-bandning ikkinchi xatboshisidagi “boshqa majburiy toʻlovlar” degan soʻzlar “yigʻimlar” degan soʻz bilan almashtirilsin.

10. 36-banddagi “Iqtisodiyot vazirligi” degan soʻzlar “Iqtisodiyot va moliya vazirligi” degan soʻzlar bilan almashtirilsin.