Oʻzbekiston Respublikasining “Qurol toʻgʻrisida”gi Qonuni, Oʻzbekiston Respublikasi Prezidentining “Yangi Oʻzbekiston maʼmuriy islohotlarini amalga oshirish chora-tadbirlari toʻgʻrisida” 2022-yil 21-dekabrdagi PF-269-son Farmoni hamda Vazirlar Mahkamasining 2020-yil 26-dekabrdagi 810-son “Qurol muomalasi sohasida ruxsat berish tartib-taomillarini takomillashtirishga doir qoʻshimcha chora-tadbirlar toʻgʻrisida”gi qaroriga muvofiq buyuraman:

1. Oʻzbekiston Respublikasi ichki ishlar vazirining 2015-yil 10-iyuldagi 118-son “Idoraviy va sport oʻqotar qurol hamda uning oʻq-dorilari saqlanadigan xonalarning muhandislik-texnik jihatdan mustahkamligi hamda qoʻriqlash-yongʻindan saqlash signalizatsiyasi vositalari bilan jihozlanishiga qoʻyiladigan talablar toʻgʻrisidagi nizomni tasdiqlash haqida”gi buyrugʻiga (roʻyxat raqami 2700, 2015-yil 23-iyul) (Oʻzbekiston Respublikasi qonun hujjatlari toʻplami, 2015-y., 29-son, 392-modda) ilovaga muvofiq oʻzgartirishlar kiritilsin.

2. Mazkur buyruq Oʻzbekiston Respublikasi Favqulodda vaziyatlar vazirligi va Milliy gvardiyasi bilan kelishilgan.

3. Ushbu buyruq rasmiy eʼlon qilingan kundan eʼtiboran kuchga kiradi.

1. Buyruqda:

a) buyruq nomi quyidagi tahrirda bayon etilsin:

“Qurol va uning oʻq-dorilari saqlanadigan xonalarning muhandislik-texnik jihatdan mustahkamligiga, qoʻriqlash-yongʻin signalizatsiyasi vositalari hamda videokuzatuv tizimlari bilan jihozlanishiga qoʻyiladigan talablar toʻgʻrisidagi nizomni tasdiqlash haqida”;

b) buyruq muqaddimasi quyidagi tahrirda bayon etilsin:

“Oʻzbekiston Respublikasining “Qurol toʻgʻrisida”gi Qonuni hamda Vazirlar Mahkamasining 2020-yil 26-dekabrdagi 810-son “Qurol muomalasi sohasida ruxsat berish tartib-taomillarini takomillashtirishga doir qoʻshimcha chora-tadbirlar toʻgʻrisida”gi qaroriga muvofiq buyuraman:”;

v) 1-band quyidagi tahrirda bayon etilsin:

“1. Qurol va uning oʻq-dorilari saqlanadigan xonalarning muhandislik-texnik jihatdan mustahkamligiga, qoʻriqlash-yongʻin signalizatsiyasi vositalari hamda videokuzatuv tizimlari bilan jihozlanishiga qoʻyiladigan talablar toʻgʻrisidagi nizom ilovaga muvofiq tasdiqlansin.”.

2. Nizomda:

a) nizom nomi quyidagi tahrirda bayon etilsin:

“Qurol va uning oʻq-dorilari saqlanadigan xonalarning muhandislik-texnik jihatdan mustahkamligiga, qoʻriqlash-yongʻin signalizatsiyasi vositalari hamda videokuzatuv tizimlari bilan jihozlanishiga qoʻyiladigan talablar toʻgʻrisidagi nizom”;

b) nizom muqaddimasi quyidagi tahrirda bayon etilsin:

“Mazkur Nizom maxsus xizmat vazifalariga ega boʻlgan yuridik shaxslarning, fuqaroviy va xizmat qurolini hamda uning oʻq-dorilarini ishlab chiqarish, taʼmirlash va realizatsiya qilish, qurolni va uning oʻq-dorilarini kolleksiyalash va koʻrgazmaga qoʻyish, ovchilik va otish sporti sohasidagi faoliyat bilan shugʻullanuvchi yuridik shaxslarning (bundan buyon matnda yuridik shaxslar deb yuritiladi) qurol va uning oʻq-dorilari saqlanadigan xonalarning muhandislik-texnik jihatdan mustahkamligiga, qoʻriqlash-yongʻin signalizatsiyasi vositalari hamda videokuzatuv tizimlari bilan jihozlanishiga qoʻyiladigan talablarni belgilaydi.”;

v) 1-band quyidagi tahrirda bayon etilsin:

“1. Mazkur Nizomda quyidagi asosiy tushunchalar qoʻllaniladi:

qurol — tuzilishiga koʻra jonli nishonni yoki boshqa nishonni urish, signallar berish uchun moʻljallangan qurilmalar va ashyolar. Tuzilishi jihatidan qurolga oʻxshash boʻlgan xoʻjalik-maishiy va ishlab chiqarish maqsadidagi buyumlar sifatida sertifikatlangan buyumlar, shuningdek tuzilishi jihatidan qurolga oʻxshash boʻlgan sport aslahalari qurol jumlasiga kirmaydi;

oʻq-dorilar — qurolning jonli nishonni yoki boshqa nishonni urish uchun moʻljallangan hamda tarkibida portlovchi, poroxli, uloqtiruvchi, pirotexnik yoki urib chiqaradigan moddalar yoxud ularning birikmasi mavjud boʻlgan qurol-yarogʻ ashyolari va uloqtiriladigan aslahasi;

qurolxona — qurol va uning oʻq-dorilarini saqlashga moʻljallangan, texnik jihatdan mustahkamlangan, qoʻriqlash-yongʻindan saqlash signalizatsiyasi hamda qoʻriqlashning muhandislik-texnik vositalari va jismoniy himoyaning boshqa vositalari bilan maxsus jihozlangan alohida inshoot (ombor, xona).”;

g) 2-band quyidagi tahrirda bayon etilsin:

“2. Mazkur Nizom qoidalari Oʻzbekiston Respublikasi Mudofaa vazirligi, Ichki ishlar vazirligi, Davlat xavfsizlik xizmati, Oʻzbekiston Respublikasi Prezidenti davlat xavfsizlik xizmati, Oʻzbekiston Respublikasi Milliy gvardiyasi, Iqtisodiyot va moliya vazirligi huzuridagi Bojxona qoʻmitasi, Elektron texnologiyalarini rivojlantirish markazi, Favqulodda vaziyatlar vazirligi va Raqamli texnologiyalar vazirligining harbiy tuzilmalariga tatbiq etilmaydi.”;

d) 3-banddagi “oʻq-dorilar” degan soʻz “uning oʻq-dorilari” degan soʻzlar bilan almashtirilsin;

e) 4-bandda:

birinchi xatboshidagi “oʻq-dorilarni” degan soʻz “uning oʻq-dorilarini” degan soʻzlar bilan almashtirilsin;

ikkinchi xatboshidagi “oʻq-dorilarni” degan soʻz “uning oʻq-dorilarini” degan soʻzlar bilan almashtirilsin;

j) 11-bandning birinchi xatboshisidagi “oʻq-dorilarni” degan soʻz “uning oʻq-dorilarini” degan soʻzlar bilan almashtirilsin;

z) 14-bandning birinchi xatboshisidagi “oʻq-dorilarni” degan soʻz “uning oʻq-dorilarini” degan soʻzlar bilan almashtirilsin;

i) 3-bobning nomidagi “qoʻriqlash-yongʻindan saqlash signalizatsiyasi vositalari” degan soʻzlar “qoʻriqlash-yongʻin signalizatsiyasi vositalari hamda videokuzatuv tizimlari” degan soʻzlar bilan almashtirilsin;

y) 16, 17 va 18-bandlar quyidagi tahrirda bayon etilsin:

“16. Qurolxonada qoʻriqlash texnik vositalari va tizimlari, yongʻin signalizatsiyasi qurilmalarini montaj qilish, sozlash, taʼmirlash hamda ularga texnik xizmat koʻrsatish ishlari Oʻzbekiston Respublikasi Favqulodda vaziyatlar vazirligi va Milliy gvardiyasiga xabarnoma yuborgan va xabarnoma reyestriga kiritilgan yuridik shaxslar tomonidan amalga oshiriladi.

Oʻzbekiston Respublikasining alohida muhim va toifalangan obyektlaridagi qurolxonalarda qoʻriqlashning texnik vositalarini loyihalashtirish, montaj qilish, sozlash, taʼmirlash va texnik xizmat koʻrsatish ishlari ruxsatnomaga ega boʻlgan yuridik shaxslar tomonidan amalga oshiriladi.

Qurolxona qoʻriqlash-yongʻin signalizatsiyasi vositalari hamda videokuzatuv tizimlari bilan maxsus loyihalarga muvofiq jihozlanadi.

17. Qurolxonada oʻrnatilgan qoʻriqlash-yongʻin signalizatsiyasi vositalari Oʻzbekiston Respublikasi Milliy gvardiyasining texnik qoʻriqlash markazining (punktining) boshqaruv va kuzatuv pultiga ulanishi lozim.

18. Qurolxonani Oʻzbekiston Respublikasi Milliy gvardiyasining texnik qoʻriqlash markazi (punkti) qoʻriqloviga topshirishning texnik imkoni boʻlmagan taqdirda, u yuridik shaxs binosining tashqi tomoniga joylashtirilgan baland tovush chiqaruvchi uskuna (sirena) hamda qoʻriqlash-yongʻin signalizatsiyasi vositalarining tashvish signalini kechayu kunduz ishlovchi eng yaqin qoʻriqlash postiga, shuningdek yuridik shaxsning kechayu kunduz ishlovchi qorovullik, qoʻriqlash, navbatchilik yoxud dispetcherlik xizmati xonasiga uzatadigan avtonom signalizatsiya vositalari bilan jihozlanadi.

Oʻzbekiston Respublikasi Milliy gvardiyasining texnik qoʻriqlash markazi (punkti) qoʻriqloviga topshirilmagan yoki kechayu kunduz ishlovchi qoʻriqlash posti hamda qorovullik, qoʻriqlash, navbatchilik yoxud dispetcherlik xizmati xonasi boʻlmagan yuridik shaxsda qurolxonaning jihozlanishiga yoʻl qoʻyilmaydi.”;

k) 20-banddagi “oʻq-dorilarni” degan soʻz “uning oʻq-dorilarini” degan soʻzlar bilan almashtirilsin;

l) 23-bandda:

birinchi xatboshidagi “Qoʻriqlash-yongʻindan saqlash signalizatsiyasining” degan soʻzlar “Qoʻriqlash-yongʻin signalizatsiyasi vositalari hamda videokuzatuv tizimlarining” degan soʻzlar bilan almashtirilsin;

ikkinchi xatboshidagi “Qoʻriqlash signalizatsiyasining” degan soʻzlar “Qoʻriqlash-yongʻin signalizatsiyasi vositalari hamda videokuzatuv tizimlarining” degan soʻzlar bilan almashtirilsin;

uchinchi xatboshidagi “Qoʻriqlash-yongʻindan saqlash signalizatsiyasining” degan soʻzlar “Qoʻriqlash-yongʻin signalizatsiyasi vositalari hamda videokuzatuv tizimlarining” degan soʻzlar Bilan almashtirilsin;

m) 24-banddagi “qoʻriqlash-yongʻindan saqlash signalizatsiyasi kompleksi” degan soʻzlar “qoʻriqlash-yongʻin signalizatsiyasi vositalari” degan soʻzlar bilan almashtirilsin;

o) 25-bandda:

birinchi xatboshidagi “Qoʻriqlash-yongʻindan saqlash signalizatsiyasi kompleksining” degan soʻzlar “Qoʻriqlash-yongʻin signalizatsiyasi vositalari hamda videokuzatuv tizimlarining” degan soʻzlar bilan almashtirilsin;

ikkinchi xatboshidagi “Qoʻriqlash-yongʻindan saqlash signalizatsiyasi kompleksining” degan soʻzlar “Qoʻriqlash-yongʻin signalizatsiyasi vositalari hamda videokuzatuv tizimlarining” degan soʻzlar bilan almashtirilsin;

p) 26-band quyidagi tahrirda bayon etilsin:

“26. Qoʻriqlash-yongʻin signalizatsiyasi vositalari hamda videokuzatuv tizimlari yuridik shaxs binosining tashqi tomonida baland tovush chiqaruvchi uskuna (sirena) bilan jihozlanishi lozim.”;

r) 27 va 28-bandlar quyidagi tahrirda bayon etilsin:

“27. Qoʻriqlash-yongʻin signalizatsiyasi vositalarining tashvish signali yuridik shaxsning kechayu kunduz ishlovchi qorovullik, qoʻriqlash, navbatchilik yoxud dispetcherlik xizmati xonasidagi maxsus koʻp kanalli (koʻp nurli) pultga kelib tushishi, ushbu pultdagi maxsus tabloda buzilish yoki yongʻin roʻy bergan joyni nur yordamida koʻrsatadigan tovushli, yorugʻlik yoki boshqa indikatorlar boʻlishi kerak.

Tashvish signali yuridik shaxsning kechayu kunduz ishlovchi qorovullik, qoʻriqlash, navbatchilik yoxud dispetcherlik xizmati xonasidagi maxsus koʻp kanalli (koʻp nurli) pultga kelib tushishi bilan bir vaqtda simli yoki radio aloqa tizimi orqali Oʻzbekiston Respublikasi Milliy gvardiyasining texnik qoʻriqlash markaziga (punktiga) uzatilishi lozim. Tashvish signali sabablarini aniqlash, zudlik bilan kechiktirib boʻlmaydigan choralarni koʻrish va yolgʻon (sababsiz) chaqiriqning oldini olish maqsadida, yuridik shaxsning kechayu kunduz ishlovchi qorovullik, qoʻriqlash, navbatchilik yoxud dispetcherlik xizmati va Oʻzbekiston Respublikasi Milliy gvardiyasining texnik qoʻriqlash markazi (punkti) oʻrtasida ikki tomonlama aloqa tashkil etilishi lozim.

28. Mazkur Nizom talablariga rioya etilishi uchun:

qurol va uning oʻq-dorilarini saqlovchi yuridik shaxslar rahbarlari;

qurol va uning oʻq-dorilarini saqlovchi yuridik shaxslar rahbarlarining buyruq yoki farmoyish tusidagi boshqa hujjatlari bilan qurol va uning oʻq-dorilari but saqlanishini, berilishi-qabul qilib olinishini va hisobi yuritilishini taʼminlash vazifalari yuklangan masʼul shaxslar javobgardir.”.