Oʻzbekiston Respublikasi Hukumati va Qirgʻiziston Respublikasi Vazirlar Mahkamasi, keyingi oʻrinlarda Tomonlar deb ataluvchilar,

1996-yil 24-dekabrda imzolangan Oʻzbekiston Respublikasi bilan Qirgʻiziston Respublikasi oʻrtasida abadiy doʻstlik toʻgʻrisidagi Shartnoma hamda 1996-yil 4-sentabrda imzolangan Oʻzbekiston Respublikasi bilan Qirgʻiziston Respublikasi oʻrtasida sanoat kooperatsiyasi toʻgʻrisidagi Bitimga amal qilgan holda,

sanoat rivojlanishining barqarorligini ragʻbatlantirish va rivojlantirish, xoʻjalik yurituvchi subyektlarning raqobatbardoshligini oshirish zarurligini anglagan holda,

Qirgʻiziston Respublikasida avtomobil va tijorat texnikalari ishlab chiqarishni yoʻlga qoʻyish loyihasini amalga oshirishda oʻzaro huquq va majburiyatlarni tartibga solish maqsadida maqbul investitsiya muhitini yaratishga qaratilgan oʻzaro qiziqishni hisobga olib,

bozor iqtisodiyoti tamoyillariga asoslanib, Tomonlar davlatlarining qonunchiligi va xalqaro majburiyatlariga muvofiq,

quyidagilar toʻgʻrisida kelishuvga erishdilar:

Mazkur Bitimning predmeti Qirgʻiziston hududida yirik uzellik yigʻish — SKD uslubida — (keyingi oʻrinlarda — Loyiha) avtomobil va tijorat transport vositalarini ishlab chiqarish zavodini qurish boʻyicha investitsiya loyihasini amalga oshirish hisoblanadi.

1. Tomonlar ushbu bilan Qirgʻiziston Respublikasi hududida avtotransport vositalari ishlab chiqarishni tashkil etishga va ushbu faoliyat uchun zarur yordam koʻrsatishga tayyor ekanliklarini tasdiqlaydilar.

2. Mazkur Bitim asosida Loyihani amalga oshirishdan manfaatdor boʻlgan xoʻjalik yurituvchi subyektlar oʻrtasida loyiha doirasidagi birgalikdagi faoliyat obyekti, ishlab chiqarishni tashkil etish bosqichlari va muddatlari, avtomobil va tijorat texnikasi modellari qatori, oʻzaro majburiyatlar, Loyihaning texnik parametrlari va boshqa shartlarni belgilaydigan alohida shartnomalar/kontraktlar tuzilishi mumkin.

Quyidagilar Tomonlar davlatlarining mazkur Bitim qoidalarini muvofiqlashtirish va amalga oshirish uchun masʼul vakolatli organlari hisoblanadi:

Qirgʻiziston Respublikasi Vazirlar Mahkamasi nomidan — Qirgʻiziston Respublikasi Iqtisodiyot va tijorat vazirligi;

Oʻzbekiston Respublikasi Hukumati nomidan — Oʻzbekiston Respublikasi Investitsiyalar, sanoat va savdo vazirligi.

1. Tomonlar Loyihani ikki davlatning quyidagi xoʻjalik yurituvchi subyektlari tomonidan amalga oshirilishiga kelishib oldilar:

Qirgʻiz tomonidan — “DT Texnik” MChJ va “Nur” OAJ;

Oʻzbek tomonidan — “Oʻzavtosanoat” AJ.

2. Qirgʻiziston Respublikasi Vazirlar Mahkamasi Loyihani amalga oshirish doirasida quyidagi imtiyoz va preferensiyalar taqdim etilishida koʻmak koʻrsatadi:

a) mazkur Bitim kuchga kirgan sanadan boshlab 120 kun ichida mahalliy avtotransport vositalarini ishlab chiqarishga moʻljallangan butlovchi qismlarni import qilishda va avtotransport vositalarini sotishda qoʻshimcha qiymat soligʻi (QQS)dan ozod qilish;

b) mazkur Bitim kuchga sanadan boshlab 120 kun ichida isteʼmolchilarni mahalliy ishlab chiqarilgan avtotransport vositalarini dastlabki roʻyxatdan oʻtkazganlik uchun yigʻimlarni toʻlashdan ozod qilish;

v) ushbu Bitim kuchga kirgan sanadan boshlab 120 kun ichida Bojxona ittifoqining “Gʻildirakli transport vositalarining xavfsizligi toʻgʻrisida”gi texnik reglamenti talablariga muvofiq Qirgʻiziston Respublikasi hududida avtotransport vositalarini ishlab chiqarish jarayonida ularni soddalashtirilgan sertifikatlashni joriy etish;

g) ushbu Bitim kuchga kirgan sanadan boshlab 120 kun ichida Qirgʻiziston Respublikasi hududida avtotransport vositalarini ishlab chiqarish uchun olib kiriladigan avtotransport vositalari toʻplamlari (SKD toʻplamlari, avtokomponentlar va ehtiyot qismlar) uchun bojxona toʻlovlaridan ozod qilish;

d) ushbu Bitim kuchga kirgan sanadan boshlab 120 kun ichida mahalliy ishlab chiqarilgan avtotransport vositalari uchun amaldagi qonunchilik doirasida davlat xaridlari boʻyicha imtiyozlar qoʻllash;

e) SKD yigʻishning birinchi bosqichi ishga tushirilgan sanadan boshlab, mahalliy avtomobil ishlab chiqaruvchilarni davlat tomonidan qoʻllab-quvvatlagan holda, SKD yigʻishning ikkinchi yilidan boshlab utilizatsiya yigʻimini joriy etish;

j) bank kreditlari va Qirgʻiziston Respublikasi qonunchiligida taqiqlanmagan boshqa moliyaviy mablagʻlar hisobidan mahalliy ishlab chiqarilgan avtotransport vositalarini avtokreditlash uchun moliyaviy mablagʻlarni maqbulroq shartlarda ajratish;

z) 2023-yil 1-yanvardan boshlab import qilinadigan avtotransport vositalarini dastlabki roʻyxatdan oʻtkazganlik uchun yigʻim miqdorini oshirish.

3. Loyihani sifatli va oʻz vaqtida amalga oshirish maqsadida Oʻzbekiston Respublikasi Hukumati tomonidan Oʻzbekistonning yetakchi kompaniyalaridan Qirgʻiziston rezidenti-ishlab chiqaruvchilariga samarali va sifatli ishlab chiqarishni tashkil etish uchun texnik va konsultativ yordamini jalb qilgan holda har tomonlama koʻmak koʻrsatiladi.

Ushbu Bitim Tomonlar davlatlarining ular ishtirokchi boʻlgan boshqa xalqaro shartnomalaridan kelib chiqadigan huquq va majburiyatlariga daxl qilmaydi.

Ushbu Bitim qoidalarini talqin qilish yoki qoʻllash bilan bogʻliq kelishmovchiliklar Tomonlar oʻrtasida maslahatlashuvlar va muzokaralar yoʻli bilan hal qilinadi.

Zarur hollarda Tomonlarning oʻzaro kelishuviga koʻra, mazkur Bitimga alohida bayonnomalar bilan rasmiylashtiriladigan va uning ajralmas qismi hisoblanadigan oʻzgartirish va qoʻshimchalar kiritilishi mumkin.

Mazkur Bitim Qirgʻiz tomoni uning kuchga kirishi uchun zarur boʻlgan davlat ichki protseduralarini bajarganligi toʻgʻrisida yozma xabarnoma Oʻzbek tomonidan olingan kundan boshlab kuchga kiradi.

Mazkur Bitim ikki (2) yil muddatga tuziladi. Agar Tomonlardan biri mazkur Bitimni amal qilishini tugatish niyati toʻgʻrisida diplomatik kanallar orqali boshqa Tomonni xabardor qilmasa, u oʻz-oʻzidan navbatdagi bir yillik davrlarga uzayaveradi.

Mazkur Bitim Tomonlardan biri diplomatik kanallar orqali boshqa Tomonning Bitimni amal qilishini tugatish niyati toʻgʻrisida yozma xabarnomasini olgan kundan boshlab olti (6) oy oʻtgandan soʻng tugatiladi.

Bishkek shahrida 2023-yil 27-yanvarda har biri oʻzbek, qirgʻiz va rus tillarida boʻlgan ikki asl nusxada tuzildi, bunda barcha matnlar bir xil kuchga ega.

Mazkur Bitim qoidalarini talqin qilishda kelishmovchiliklar yuzaga kelgan taqdirda, Tomonlar rus tilidagi matnga murojaat qiladilar.