Oʻzbekiston Respublikasining “Rasmiy statistika toʻgʻrisida”gi Qonuni hamda Oʻzbekiston Respublikasi Vazirlar Mahkamasining 2022-yil 28-sentabrdagi 539-son “Korxonalar va tashkilotlarning yagona davlat registrini yuritish va uning asosida davlat xizmatini koʻrsatishga oid normativ-huquqiy hujjatlarni tasdiqlash toʻgʻrisida”gi qaroriga muvofiq buyuraman:

1. Oʻzbekiston Respublikasi Davlat statistika qoʻmitasining 2014-yil 30-maydagi 3-mb-son “Yuridik shaxslarni hisobga olish va identifikatsiya qilishni avtomatlashtirilgan axborot tizimi “Reg-System”da ishlash tartibi toʻgʻrisidagi yoʻriqnomani tasdiqlash haqida”gi qaroriga (roʻyxat raqami 2594, 2014-yil 12-iyun) (Oʻzbekiston Respublikasi qonun hujjatlari toʻplami, 2014-y., 24-son, 299-modda) ilovaga muvofiq oʻzgartirishlar va qoʻshimcha kiritilsin.

2. Mazkur buyruq Oʻzbekiston Respublikasi Raqamli texnologiyalar vazirligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

1. Qarorning muqaddimasi quyidagi tahrirda bayon etilsin:

“Oʻzbekiston Respublikasining “Rasmiy statistika toʻgʻrisida”gi Qonuni hamda Oʻzbekiston Respublikasi Vazirlar Mahkamasining 2022-yil 28-sentabrdagi 539-son “Korxonalar va tashkilotlarning yagona davlat registrini yuritish va uning asosida davlat xizmatini koʻrsatishga oid normativ-huquqiy hujjatlarni tasdiqlash toʻgʻrisida”gi qaroriga muvofiq buyuraman:”.

2. Yoʻriqnomada:

a) muqaddima quyidagi tahrirda bayon etilsin:

“Mazkur Yoʻriqnoma Oʻzbekiston Respublikasi Prezidenti huzuridagi Statistika agentligi (bundan buyon matnda Statistika agentligi deb yuritiladi) va roʻyxatdan oʻtkazuvchi organlar tomonidan yuridik shaxslar toʻgʻrisidagi maʼlumotlarni, yuridik shaxslarni hisobga olish va identifikatsiya qilishning avtomatlashtirilgan axborot tizimi “Reg-System” asosida Korxonalar va tashkilotlarning yagona davlat registriga (bundan buyon matnda KTYADR deb yuritiladi) kiritish jarayonida oʻzaro hamkorlik qilish tartibini belgilaydi.”;

b) 2-bandning ikkinchi xatboshisi, 5 va 7-bandlardagi “Davlat statistika qoʻmitasi” degan soʻzlar “Statistika agentligi” degan soʻzlar bilan almashtirilsin;

d) 3-bandda:

birinchi xatboshidagi “Davlat statistika qoʻmitasi” degan soʻzlar “Statistika agentligi” degan soʻzlar bilan almashtirilsin;

toʻrtinchi xatboshidagi “Davlat statistika qoʻmitasining” degan soʻzlar “Statistika agentligining” degan soʻzlar bilan almashtirilsin;

e) 4 va 6-bandlardagi “Davlat statistika qoʻmitasiga” degan soʻzlar “Statistika agentligiga” degan soʻzlar bilan almashtirilsin;

f) 9-band quyidagi tahrirda bayon etilsin:

“9. Registrator tomonidan KTYADRni yuritish uchun zarur boʻlgan, yuridik shaxslarning yagona davlat reyestriga kiritilgan yuridik shaxslar toʻgʻrisidagi maʼlumotlarni taqdim etish, bevosita Internet tarmogʻidagi Statistika agentligining registr.stat.uz idoraviy saytida bildirishnomani toʻldirish orqali amalga oshiriladi.”;

g) 12-bandda:

“v” kichik band quyidagi tahrirda bayon etilsin:

“v) yuridik shaxsning taʼsis hujjatlariga oʻzgartirish va qoʻshimchalar kiritilganligi, qayta tashkil etish, tugatish jarayonidaligi, tugatish jarayonining toʻxtatilganligi, tugatilishi va pochta manzili oʻzgarganligi, shuningdek moliya-xoʻjalik faoliyati amalga oshirilmayotganligi yoki harakatsiz holatga oʻtkazilganligi toʻgʻrisidagi maʼlumotlar, yuridik shaxslarning yagona davlat reyestriga kiritilgandan keyin ikki kun mobaynida;”;

quyidagi mazmundagi “g” kichik band bilan toʻldirilsin:

“g) yuridik shaxs yangi tashkil etilgan vaqtda asosiy faoliyat turi kodini biriktirishda yoki xodimlar soni toʻgʻrisidagi maʼlumotni toʻldirishda noaniqlikka yoʻl qoʻyilgan deb hisoblanganda, faoliyat koʻrsatmayotganda, qoʻshib olish yoʻli bilan qayta tashkil etilganda, belgilangan tartibda faoliyati tiklanganda, qayta roʻyxatdan oʻtib, taʼsis hujjatlarida ushbu faoliyat turi asosiy faoliyat turi deb belgilanganda, shuningdek maʼlum faoliyatni amalga oshirish boʻyicha litsenziya olganda yoki litsenziyasi bekor qilinganda uning asosiy faoliyat turi va unda ishlayotganlarning oʻrtacha yillik soni oʻzgarganligi toʻgʻrisidagi maʼlumotlar, yuridik shaxslarning yagona davlat reyestriga kiritilgandan keyin ikki kun mobaynida.”;

h) 13-band quyidagi tahrirda bayon etilsin:

“13. Korxona va tashkilotning umumdavlat tasnifi kodi (bundan buyon matnda KTUT deb yuritiladi) — registrator tomonidan yuridik shaxsga Tizimdan foydalangan holda olingan, real vaqt rejimida bildirishnomani toʻldirish jarayonida beriladi.”;

i) 20-band quyidagi tahrirda bayon etilsin:

“20. KTYADRdagi barchaning foydalanishi uchun ochiq boʻlgan axborotlar quyidagilar hisoblanadi:

identifikatsiyalashtirish koʻrsatkichlari — yuridik shaxsning nomi, KTUT, soliq toʻlovchining identifikatsiya raqami (bundan buyon matnda STIR deb yuritiladi);

klassifikatsiya koʻrsatkichlari — asosiy faoliyat turining xususiyati, joylashgan joyi, tashkiliy-huquqiy shakli, kichik tadbirkorlik subyektlariga mansubligi, davlat va xoʻjalik boshqaruvi organlari tuzilmasiga kirishi;

maʼlumot tusidagi koʻrsatkichlar — pochta manzillari, telefon raqamlari, yuridik shaxslarning taʼsischilari (aksiyadorlik jamiyatlari bundan mustasno), rahbari (soliq organlarining maʼlumoti asosida), davlat roʻyxatidan oʻtkazilgan tartib raqami va sanasi (ustav fondi va taʼsis hujjatlariga oʻzgartirishlar kiritish, yagona davlat reyestridan chiqarish) toʻgʻrisidagi maʼlumotlari.”;

j) 22-band quyidagi tahrirda bayon etilsin:

“22. Tashqi foydalanuvchilar, bevosita Statistika agentligining www.stat.uz rasmiy saytida real vaqt rejimida, soʻralayotgan yuridik shaxsning STIRini kiritib, mazkur yoʻriqnomaning 20-bandning uchinchi xatboshisida koʻrsatilgan axborotlarni bepul olishlari mumkin.”;

k) 1 va 2-ilovalardagi “Oʻzbekiston Respublikasi Davlat statistika qoʻmitasiga” degan soʻzlar “Oʻzbekiston Respublikasi Prezidenti huzuridagi Statistika agentligiga” degan soʻzlar bilan almashtirilsin.