LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
O‘zbekistonga tashqaridan olib kelinadigan yoqilg‘i-energetika resurslari qimmatlashganligi munosabati bilan hamda respublika aholisini ijtimoiy muhofaza qilish borasida oldini olish choralarini ta’minlash maqsadida:
1. O‘zbekiston Respublikasining hududida ish haqi va mehnat nafaqalarining miqdori oyiga 2000 so‘m qilib belgilansin.
2. Ulug‘ Vatan urushining qatnashchilari va nogironlariga eng oz miqdori 2500 so‘m bo‘lishidan kelib chiqib, nafaqalar miqdori belgilansin. Ulug‘ Vatan urushi III guruh nogironlari nafaqalarining miqdori eng oz ish haqi darajasiga yetkazilsin.
3. O‘zbekiston Respublikasining Ijtimoiy ta’minot vazirligi belgilangan eng oz miqdorga asoslanib, fuqarolar ish stajining oz-ko‘pligiga va xizmatlariga qarab, mehnat nafaqalarini tabaqalashtirilgan miqdorlarda qaytadan hisoblab chiqsin.
5. Bolali oilalarga madad berish maqsadida bolalar uchun hozirgi vaqtda amalda bo‘lgan ijtimoiy nafaqalar o‘rta hisobda 1,5 baravar oshirilsin. Belgilab qo‘yilsinki, jami daromadi oilaning har bir a’zosiga hisoblaganda eng oz oylik ish haqidan oshmaydigan bolali oilalarga nafaqalar to‘lanadi.
6. Fuqarolarning soliq olinmaydigan daromadlarining eng past darajasi oyiga 2000 so‘m miqdorida belgilansin.
Oyiga 8 ming so‘mgacha bo‘lgan ish haqidan olinadigan daromad solig‘ining eng kam miqdori (12 foiz) belgilansin. Vazirlar Mahkamasi bir hafta muddat ichida belgilangan tartibda oyiga 8 ming so‘mdan oshadigan ish haqidan tabaqalashtirilgan tarzda soliq olish to‘g‘risidagi takliflarni kiritsin.
7. Oliy o‘quv yurtlari talabalarining stipendiyalari, texnikumlar hamda kiyim-bosh va ovqat bilan ta’minlanmaydigan hunar-texnika bilim yurtlari o‘quvchilarining stipendiyalari 1,6 baravar ko‘paytirilsin. Talabalarning oshxonalari va bufetlarida tushlik ovqatlarning qiymatidan 50 foizli chegirmalar saqlab qolinsin.
8. Birinchi marta nikohdan o‘tayotgan kelin-kuyovlarga gilam buyumlar va mebel sotishda imtiyozli tartib saqlab qolinib, oilaga beriladigan tovon miqdori 5000 so‘mgacha ko‘paytirilsin.
10. Budjetdan pul bilan ta’minlanadigan vazirliklar, idoralar, Qoraqalpog‘iston Respublikasining Vazirlar Kengashi, viloyatlar hamda Toshkent shahar hokimliklari, tashkilotlar va muassasalar ish haqi, pensiyalar va stipendiyalar ushbu Farmonda belgilangan miqdorlarda o‘z vaqtida to‘lanishini ta’minlasinlar.
11. Respublika vazirliklari, idoralari, uyushmalari, konsernlari, korxonalari va xo‘jaliklari belgilangan eng oz miqdorga asoslanib, ishlovchilarning maoshini yanada oshirsinlar.
12. O‘zbekiston Respublikasining Markaziy banki korxonalarga, tashkilotlar, muassasalarga ish haqi o‘z vaqtida to‘lanishini ta’minlovchi choralar ko‘rsin.