Mamlakatimizda xususiy investitsiyalarni jalb etish hamda davlatning iqtisodiyotdagi ishtirokini qisqartirish boʻyicha amalga oshirilgan tadbirlar natijasida oʻtgan uch yilda qariyb 2 mingta davlat aktivlari sotildi va davlat ishtirokidagi korxonalar soni 45 foizga qisqardi.

Xususiylashtirishni jadallashtirish, davlat mulkini ijaraga berish tartibini takomillashtirish hamda iqtisodiyotda xususiy mulkning ulushini yanada oshirish maqsadida:

1. Oʻzbekiston Respublikasi Prezidentining ayrim hujjatlariga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:

alohida davlat mulki obyektlarini xususiylashtirishdan tushgan mablagʻlarni mahallalar va Qoraqalpogʻiston Respublikasi hududidagi suv taʼminoti va kanalizatsiya tizimlarini rivojlantirishga yoʻnaltirish;

davlat mulki obyektlarini auksion orqali ijaraga berish muddatini uch yil etib belgilash va oʻz majburiyatlarini toʻliq bajargan ijara oluvchilarga ijara muddatini yana uch yil muddatga uzaytirish;

uch oydan ortiq foydalanilmasdan boʻsh turgan davlat mulki obyektlarini (ijtimoiy obyektlar bundan mustasno) belgilangan tartibda balans saqlovchilarning roziligisiz ijaraga berish yoki sotish uchun onlayn-auksion savdolariga chiqarish.

2. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. Oʻzbekiston Respublikasi Prezidentining 2019-yil 14-yanvardagi “Davlat aktivlarini boshqarish, monopoliyaga qarshi kurashishni tartibga solish tizimini va kapital bozorini tubdan takomillashtirish chora-tadbirlari toʻgʻrisida”gi PF-5630-son Farmonining 6-bandida:

a) “b” kichik bandi birinchi xatboshidagi “v” va “g” kichik bandlari” soʻzlari “v”-“g” kichik bandlari” soʻzlari bilan almashtirilsin;

b) “v” kichik bandning birinchi xatboshisi quyidagi tahrirda bayon etilsin:

“v) hududi 10 000 kvadrat metrgacha boʻlgan davlat koʻchmas mulk obyektlari (bundan ushbu bandning “v¹” kichik bandi mustasno), shuningdek, Qoraqalpogʻiston Respublikasi Vazirlar Kengashi Raisining, viloyatlar va Toshkent shahri hokimlarining qarorlari asosida sotiladigan davlat koʻchmas mulk obyektlarini sotishdan tushadigan mablagʻlar:”;

v) quyidagi mazmundagi “v¹” va “v²” kichik bandlar bilan toʻldirilsin:

“v¹) mahalladagi maydoni 2 000 kvadrat metrgacha boʻlgan davlat koʻchmas mulk obyektlarini hokim yordamchilarining onlayn-buyurtmanomasiga asosan sotishdan tushadigan mablagʻlar tegishli mahallalarning Mahallaning ijtimoiy-iqtisodiy muammolarini hal etish jamgʻarmalariga;

v²) xususiylashtirish dasturlariga muvofiq, Qoraqalpogʻiston Respublikasida joylashgan davlat aktivlarini (bundan ushbu bandning “v” kichik bandi mustasno) sotishdan tushgan mablagʻlar Qoraqalpogʻiston Respublikasi Iqtisodiyot va moliya vazirligi huzuridagi suv taʼminoti va kanalizatsiya tizimlarini rivojlantirish hududiy jamgʻarmasiga”;

g) “d” kichik band quyidagi tahrirda bayon etilsin:

“d) Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasining tegishli hujjatlarida Jamgʻarmaning umumiy mablagʻlari hisobidan yoki aniq davlat aktivini sotishdan tushgan mablagʻlarni boshqa maqsadlarga toʻliq yoki qisman yoʻnaltirish koʻzda tutilgan taqdirda, mazkur bandning “b” — “v²” kichik bandlari mablagʻlarning qolgan qismiga nisbatan tatbiq etiladi”.

2. Oʻzbekiston Respublikasi Prezidentining 2019-yil 19-fevraldagi “Davlat mulki obyektlaridan samarali foydalanish boʻyicha qoʻshimcha chora-tadbirlar toʻgʻrisida”gi PF-5666-son Farmonida:

a) 4-band quyidagi mazmundagi xatboshi bilan toʻldirilsin:

“davlat mulki obyektlari ijaraga berish uchun auksionga chiqarilganda ijaraga berish muddati uch yil etib belgilanadi, qonunchilik hujjatlarida nazarda tutilgan hollar bundan mustasno. Bunda, ijaraga oluvchi tomonidan majburiyatlar oʻz vaqtida va toʻliq bajarilgan taqdirda ijara muddati uch yil muddatga uzaytiriladi, qonunchilik hujjatlarida nazarda tutilgan hollar bundan mustasno”;

b) 11-bandning uchinchi xatboshisidan “bir yilgacha boʻlgan muddatga” soʻzlari chiqarib tashlansin.

3. Oʻzbekiston Respublikasi Prezidentining 2019-yil 13-avgustdagi “Xususiy mulkni himoya qilish va mulkdorlar huquqlarining kafolatlarini kuchaytirish, tadbirkorlik tashabbuslarini qoʻllab-quvvatlash borasidagi ishlarni tashkil qilish tizimini tubdan takomillashtirish boʻyicha qoʻshimcha chora-tadbirlar, shuningdek, tadbirkorlik subyektlarining moliyaviy resurslar va ishlab chiqarish infratuzilmasidan foydalanish imkoniyatlarini kengaytirish toʻgʻrisida”gi PF-5780-son Farmonining 9-bandi quyidagi mazmundagi xatboshi bilan toʻldirilsin:

“Bunda, vazirlik va idoralar, mahalliy davlat hokimiyati organlariga qarashli boʻlgan, uch oydan ortiq foydalanilmasdan boʻsh turgan obyektlar, ijtimoiy obyektlar bundan mustasno, Davlat aktivlarini boshqarish agentligi tomonidan tasdiqlanadigan tartibga muvofiq ularning roziligisiz ijaraga berish yoki sotish uchun “E-auksion” elektron savdo platformasiga onlayn-auksion savdolariga chiqariladi”.

4. Oʻzbekiston Respublikasi Prezidentining 2020-yil 27-oktabrdagi “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar toʻgʻrisida”gi PF-6096-son Farmonida:

a) 17-bandning oltinchi xatboshisi chiqarib tashlansin;

b) 20-bandning toʻrtinchi xatboshisidagi “2022-yil 1-iyulga qadar” soʻzlari “2023-yil 1-dekabrga qadar” soʻzlari bilan almashtirilsin;

v) 4-ilovadan 130-pozitsiya chiqarib tashlansin.

5. Oʻzbekiston Respublikasi Prezidentining 2014-yil 3-iyuldagi “Davlat mulki obyektlarini kichik biznes va xususiy tadbirkorlik subyektlariga sotish borasidagi qoʻshimcha chora-tadbirlar toʻgʻrisida”gi PQ-2200-son qarorining 6¹-bandining ikkinchi va uchinchi xatboshilaridagi “koʻchirib boʻladigan va koʻchmas mulk” soʻzlari “koʻchar va koʻchmas mulk” soʻzlari bilan almashtirilsin.

6. Oʻzbekiston Respublikasi Prezidentining 2018-yil 6-fevraldagi “Xorazm viloyatida tadbirkorlik subyektlariga davlat mulki obyektlarini sotish va kichik sanoat zonalarini tashkil etish chora-tadbirlari toʻgʻrisida”gi PQ-3513-son qarorining 8-bandi oʻz kuchini yoʻqotgan deb hisoblansin.

7. Oʻzbekiston Respublikasi Prezidentining 2022-yil 18-martdagi “Iqtisodiyotda davlat ishtirokini yanada qisqartirish va xususiylashtirishni jadallashtirishga oid qoʻshimcha chora-tadbirlar toʻgʻrisida”gi PQ-168-son qarorining 3-bandi “a” kichik bandining uchinchi xatboshisi quyidagi tahrirda bayon etilsin:

“qishloq xoʻjaligiga moʻljallanmagan yer uchastkalari (keyingi oʻrinlarda — yer uchastkalari) boʻlganda — “Yerelektron” avtomatlashtirilgan axborot tizimi orqali yuborilgan onlayn-buyurtmanoma tegishli idoralar tomonidan belgilangan tartibda koʻrib chiqiladi hamda ijobiy xulosa berilgan taqdirda, toʻgʻridan toʻgʻri elektron onlayn-auksion savdolariga chiqariladi”.