Oʻzbekiston Respublikasining Shaharsozlik kodeksi hamda Oʻzbekiston Respublikasi Prezidentining 2022-yil 4-avgustdagi PQ-346-son “Koʻp kvartirali uylarni boshqarish tizimini yanada takomillashtirish va boshqaruvchi tashkilotlarni moliyaviy sogʻlomlashtirish borasidagi qoʻshimcha chora-tadbirlar toʻgʻrisida”gi qaroriga muvofiq buyuraman:

1. ShNQ 1.03.01-16 “Korxona, bino va inshootlarni kapital qurilishi loyiha-smeta hujjatlarining tarkibi, ishlab chiqilishi, kelishilishi va tasdiqlanishi tartibi” shaharsozlik normalari va qoidalarining 4-ilovasi “Umumiy tushuntirish matni” paragrafi quyidagi mazmundagi oʻn ikkinchi va oʻn uchinchi xatboshilar bilan toʻldirilsin:

“koʻp kvartirali uylardagi turarjoylar va yashash uchun moʻljallanmagan (noturar) joylar, umumiy mol-mulk (umumiy joylar) roʻyxati;

har bir koʻp kvartirali uy joylashgan va unga tutash yer uchastkasi (rejasi, joylashgan obyektlar, shu jumladan loyihada nazarda tutilgan avtoturargohlar, bolalar va sport maydonchalari, dam olish maskanlari, sayilgohlar, yoʻlaklar va koʻp kvartirali uyga xizmat koʻrsatuvchi boshqa obyektlar) maydoni hamda chegaralari toʻgʻrisidagi maʼlumotlar.”.

2. Mazkur buyruq Oʻzbekiston Respublikasi Uy-joy kommunal xizmat koʻrsatish vazirligi va Davlat soliq qoʻmitasi huzuridagi Kadastr agentligi bilan kelishilgan.

3. Mazkur buyruq 2022-yil 1-noyabrdan eʼtiboran kuchga kiradi.