Oʻzbekiston Respublikasi Oliy Majlisi Qonunchilik palatasi Spikeri oʻrinbosari O. Tojiyevning “Oʻzbekiston Respublikasi Oliy Majlisi Qonunchilik palatasi va uning organlari faoliyati ommaviy axborot vositalarida yoritilishini tashkil etish borasidagi ishlarning holati toʻgʻrisida”gi axborotini koʻrib chiqib, Oʻzbekiston Respublikasi Oliy Majlisi Qonunchilik palatasining Kengashi taʼkidlaydiki, Qonunchilik palatasi faoliyatining ochiqligi va oshkoraligini taʼminlash hamda uni ommaviy axborot vositalarida keng yoritish borasida bir qator ishlar amalga oshirilgan.

Oʻtgan davrda deputatlar korpusining qonun ijodkorligi, nazorat-tahlil faoliyati haqida jamoatchilikka ishonchli va tezkor axborot yetkazishga ustuvor vazifa sifatida qaralgan.

Oʻzbekiston Respublikasi Oliy Majlisining Qonunchilik palatasi (bundan buyon matnda Qonunchilik palatasi deb yuritiladi) va uning organlari faoliyatini ommaviy axborot vositalarida, shu jumladan Internet jahon axborot tarmoqlarida keng yoritib borish, dolzarb masalalar yuzasidan deputatlarning tezkor va xolis munosabatlarini tashkil etish hamda qonun loyihalarining mazmun-mohiyatini xalqchil uslubda yetkazishga alohida eʼtibor berilgan.

Hisobot davrida Qonunchilik palatasining 22 ta majlisi, shu jumladan 3 ta “hukumat soati” ommaviy axborot vositalarida keng va batafsil yoritilgan, 17 ta matbuot anjumani, 14 ta brifing oʻtkazilgan.

Qonunchilik palatasi Devonining Parlament axborot markazi (bundan buyon matnda Markaz deb yuritiladi) tomonidan Qonunchilik palatasi va deputatlar faoliyati haqida ommaviy axborot vositalarida, shu jumladan davlat va nodavlat telekanallarda 4 374-marta, radiokanallarda 5 197-marta koʻrsatuv, eshittirish, intervyu, axborot lavhalari va reportajlar tayyorlanib, efirga uzatilishi tashkil qilingan. Qonunchilik palatasining rasmiy veb-saytida 908 ta, boshqa Internet jahon axborot tarmogʻi saytlarida 2 218 ta, bosma matbuot nashrlarida esa 1 175 ta maqola va axborot eʼlon qilingan.

Qonunchilik palatasi faoliyati toʻgʻrisida tayyorlangan 1 966 ta media mahsulot, shu jumladan 120 ta videorolik, 83 ta intervyu “Telegram”, “Facebook”, “Instagram”, “YouTube” kabi ijtimoiy tarmoqlardagi palataning rasmiy sahifalariga joylashtirilgan.

Bundan tashqari oʻtgan davrda Markaz tomonidan zamonaviy media loyihalar, xususan, “Aksent reportaj” loyihasining 49 ta, “Backstage” loyihasining 4 ta, “Aksent dayjest” loyihasining 47 ta, “Deputat munosabati” loyihasining 23 ta, “Motiv” loyihasining 11 ta, “Markaziy Osiyo Markazida” loyihasining 6 ta, “Aksent Live” loyihasining 8 ta soni tayyorlanib eʼlon qilingan.

Shu bilan birga oʻtgan davrda Qonunchilik palatasi faoliyatining ommaviy axborot vositalarida, shu jumladan Internet jahon axborot tarmoqlarida keng yoritib borilishini hamda dolzarb masalalar yuzasidan deputatlarning chiqishlarini tashkil etish borasidagi ishlar tahlili hali bu borada eʼtibor qaratilishi lozim boʻlgan muayyan masalalar mavjudligini koʻrsatmoqda.

Xususan, jamoatchilikning parlament faoliyatiga doir yangiliklardan keng foydalanishini taʼminlash maqsadida yangidan-yangi media loyihalarni taqdim qilib borish muhim ahamiyat kasb etmoqda.

Shuningdek bugungi kunda Qonunchilik palatasi deputatlarining ommaviy axborot vositalari va ijtimoiy tarmoqlardagi chiqishlarini tashkil etishga qaratilgan uslubiy tavsiyalarni ishlab chiqish zarurati yuzaga kelmoqda.

Qonunchilik palatasida amalga oshirilgan ishlar yuzasidan qoʻmitalar, siyosiy partiyalar fraksiyalari bilan hamkorlikda har chorak yakuni boʻyicha matbuot anjumanlari va brifinglar tashkil etish hamda ushbu tadbirlarda jurnalistlarning ishtirokini taʼminlash maqsadga muvofiqdir.

Yuqorida bayon etilganlardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Spikeri oʻrinbosari O. Tojiyevning “Oʻzbekiston Respublikasi Oliy Majlisi Qonunchilik palatasi va uning organlari faoliyati ommaviy axborot vositalarida yoritilishini tashkil etish borasidagi ishlarning holati toʻgʻrisida”gi axboroti maʼlumot uchun qabul qilinsin.

2. Markaz:

Qonunchilik palatasining ochiqligi va shaffofligini taʼminlash, deputatlar korpusi faoliyati toʻgʻrisida jamoatchilikka oʻz vaqtida, tezkor va xolis axborot yetkazish borasidagi ishlarni yanada kuchaytirish;

jamoatchilikning Qonunchilik palatasi faoliyatiga doir yangiliklardan keng foydalanishini taʼminlashga qaratilgan yangi media loyihalarni taqdim etish;

Qonunchilik palatasi deputatlarining ommaviy axborot vositalari va ijtimoiy tarmoqlardagi chiqishlarini tashkil etish yuzasidan uslubiy tavsiyalar loyihasini ishlab chiqish;

Qonunchilik palatasining qoʻmitalari, siyosiy partiyalar fraksiyalari bilan hamkorlikda ularning faoliyati yuzasidan matbuot anjumanlari va brifinglar tashkil etib borish hamda ushbu tadbirlarda jurnalistlarning ishtirokini taʼminlash;

deputatlarning ijtimoiy tarmoqlarda keng muhokamaga sabab boʻladigan masalalar yuzasidan tezkor va xolis munosabat bildirishida ularga yaqindan koʻmaklashish choralarini koʻrsin.

3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari O. Tojiyevning zimmasiga yuklatilsin.

4. Ushbu Qaror qabul qilingan kundan eʼtiboran kuchga kiradi.