Oʻzbekiston taraqqiyotining yangi bosqichida yurtimizda milliy va diniy qadriyatlarimizga boʻlgan eʼtibor va ehtirom yanada ortib bormoqda. Jonajon diyorimizda hukm surayotgan tinchlik va osoyishtalik, xonadonlarimizdagi fayz va qut-barakani xalqimiz, avvalo, Yaratganning cheksiz marhamati sifatida shukronalik va minnatdorlik bilan qabul qilmoqda.

Ayniqsa, ahillik, oʻzaro birdamlik va maʼnaviy poklik fazilatlari ulugʻlanadigan qutlugʻ Ramazon oyini el-yurtimiz doimo katta xursandchilik va koʻtarinki kayfiyatda kutib olmoqda. Ushbu muborak kunlarda inson qadrini ulugʻlashga, oila hamda mahallaga mehr va eʼtiborda boʻlish, ijtimoiy koʻmakka muhtoj, ehtiyojmand kishilarga yordam va saxovat koʻrsatishga qaratilgan savobli amallar yanada yorqin namoyon boʻlmoqda.

Xalqimiz uchun ezgulik va muruvvat, mehr-oqibat ramzi hisoblangan muborak Ramazon oyini munosib kutib olish va yuqori saviyada oʻtkazish, muqaddas islom dinining insonparvarlik tamoyillarini hamda madaniy qadriyatlarimizni asrab-avaylash va ulugʻlash maqsadida:

1. 2022-yil muborak Ramazon oyining boshlanishi 2-aprel kuniga toʻgʻri kelishi haqidagi Oʻzbekiston musulmonlari idorasining axboroti maʼlumot uchun qabul qilinsin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Din ishlari boʻyicha qoʻmita, Mahalla va nuroniylarni qoʻllab-quvvatlash vazirligi hamda jamoat tashkilotlari bilan birgalikda Ramazon oyini milliy anʼana va qadriyatlarga mos va munosib tarzda oʻtkazishga doir chora-tadbirlarni amalga oshirsin.

Mazkur tadbirlarni oʻtkazishda ushbu muborak oyning mazmun-mohiyatida mujassam boʻlgan insoniylik, shukronalik, sabr-qanoat kabi fazilatlarni eʼzozlash, mamlakatdagi tinch va farovon hayotni qadrlash, oilalar hamda mahallalarda mehr-oqibat va oʻzaro hurmat muhitini mustahkamlash, ehtiyojmand, ijtimoiy himoyaga muhtoj kishilarni har tomonlama qoʻllab-quvvatlashga xizmat qiladigan maʼrifiy tadbirlar va targʻibot ishlarini tashkil etishga alohida eʼtibor qaratilsin.

3. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga Ramazon oyini oʻtkazish bilan bogʻliq tadbirlarni keng yoritish tavsiya etilsin.

4. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining maslahatchisi M.M. Kamilov zimmasiga yuklansin.