Pillachilik sohasini yanada rivojlantirishni taʼminlash, ozuqa bazasini mustahkamlash va pilla yetishtirishni koʻpaytirish, pilla yetishtirishdan pillakorlarning moddiy manfaatdorligini kuchaytirish, shuningdek ishlab chiqarilayotgan mahsulot sifatini oshirish maqsadida Vazirlar Mahkamasi qaror qiladi:

1. 2002—2010-yillar davrida Qoraqalpogʻiston Respublikasi va respublika viloyatlari boʻyicha maxsus ajratilgan yer maydonlarida tut daraxtlari ekish va pilla yetishtirish boʻyicha topshiriq ilovaga* muvofiq belgilansin.

Qoraqalpogʻiston Respublikasi Vazirlar Kengashi Raisi va viloyatlar hokimlari belgilangan topshiriqlarni bajarish yuzasidan zarur chora-tadbirlar koʻrsinlar, mavjud tut daraxtlari saqlanishini, yangi tutzorlar barpo etilishini hamda pillachilikda qishloq xoʻjaligi shirkatlari va fermer xoʻjaliklari tashkil etilishini taʼminlasinlar.

2. Belgilansinki:

“Oʻzbek ipagi” uyushmasi korxonalari belgilangan tartibda tuzilgan shartnoma asosida pilla yetishtiruvchi korxonalarga (ularning roziligi bilan) avans hisobiga pilla yetishtirish uchun zarur moddiy-texnika resurslari va boshqa mahsulotlar, keyinchalik ular qiymatini tayyorlanadigan pilla uchun toʻlov summasiga oʻtkazgan holda, berish huquqiga egadir;

3. Oʻzbekiston Respublikasi tijorat banklariga 2002-yildan boshlab har yili “Pilla-xolding” xolding kompaniyasi korxonalariga pilla yetishtiruvchilar bilan avans toʻlovi va oʻzaro hisob-kitoblar uchun hisoblab chiqilgan ehtiyoj miqdorida, shu jumladan mart-aprel oylarida hisoblab chiqilgan summaning 50—70 foizi miqdorida, kreditlarni yil davomida qaytarish sharti bilan, maqsadli kredit resurslari ajratish tavsiya etilsin.

4. “Oʻzbek ipagi” uyushmasiga “bojxona hududida qayta ishlash” bojxona rejimidan foydalangan holda, istisno tariqasida, 2002-yilda 150 ming quti va 2003-yilda — 160 ming quti ipak qurti urugʻini importdan keltirishga ruxsat berilsin, bunda ipak qurti urugʻi uchun xorijiy yetkazib beruvchiga ipak ip bilan haq toʻlanishi, “Oʻzbek ipagi” uyushmasi ular boʻyicha bojxona toʻlovlari toʻlashdan (bojxonada rasmiylashtirganlik uchun yigʻimlardan tashqari) va qayta ishlash qiymatidan valyuta tushumini majburiy sotishdan ozod qilinishi nazarda tutilsin.

5. Oʻzbekiston Respublikasi Qishloq va suv xoʻjaligi vazirligi har yili pilla yetishtiruvchi korxonalarga tut daraxtlari zararkunandasi “tut parvonasi”ga qarshi kurash vositalarini “Oʻzbek ipagi” uyushmasi bilan birgalikdagi hisob-kitoblar asosida aniqlanadigan hajmda ajratishni nazarda tutsin.

6. Oʻzbekiston Respublikasi Iqtisodiyot vazirligi mineral oʻgʻitlar balanslarini tuzishda, 2003-yildan boshlab, “Oʻzbek ipagi” uyushmasiga tut daraxtlari koʻchatlari va ekish materiali yetishtirishda foydalanish uchun “Oʻzbek ipagi” uyushmasi tomonidan taqdim etiladigan buyurtmanomalarga muvofiq tutchilik xoʻjaliklariga mineral oʻgʻitlar yetkazib berish uchun limitlarni har yili alohida satrda ajratishni nazarda tutsin.

7. Quyidagilar:

Oʻzbekiston Respublikasi Vazirlar Mahkamasining “Respublikada pillachilik sohasini boshqarishni yanada takomillashtirish chora-tadbirlari toʻgʻrisida” 1998-yil 3-apreldagi 144-son qarorining 12-bandi;

Oʻzbekiston Respublikasi Vazirlar Mahkamasining “Pillachilikning ozuqa bazasini mustahkamlash va ipakchilik mahsulotlari yetishtirish hajmlarini koʻpaytirish chora-tadbirlari toʻgʻrisida” 2000-yil 15-martdagi 96-son qarorining 2-bandi oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Bosh vazirning oʻrinbosarlari M.Z. Usmonov va T.X. Xoltoyev zimmasiga yuklansin.