Respublika oliy taʼlim muassasalarida jurnalist kadrlarni tayyorlash va qayta tayyorlashning bugungi holati qoniqarsizligi, taʼlim va tarbiya tizimi, jurnalistika mutaxassisligi boʻyicha oʻquv reja va dasturlari, darslik va oʻquv qoʻllanmalari hamda boshqa turdagi adabiyotlarning jahon andazalariga javob bermay qolganligi, shuningdek soha moddiy-texnik bazasining zaifligi sababli oʻquv jarayonini tashkil etishda, oʻqitish usullarida jiddiy kamchiliklarga yoʻl qoʻyilmoqda.

Mavjud nuqsonlarni bartaraf etish, jurnalist kadrlar tayyorlash va qayta tayyorlash tizimini takomillashtirish hamda dunyo andazalari darajasiga koʻtarish maqsadida Vazirlar Mahkamasi qaror qiladi:

1. Mirzo Ulugʻbek nomidagi Toshkent davlat universiteti jurnalistika fakulteti zamon talablariga muvofiq tarzda qayta tashkil etilsin, Oʻzbekiston davlat jahon tillari universitetida xalqaro jurnalistika fakulteti ochilsin va 1999/2000 oʻquv yilidan boshlab oliy maʼlumotli jurnalist kadrlar tayyorlash ana shu oʻquv yurtlarida amalga oshirilishi, boshqa oliy oʻquv yurtlaridagi (Qoraqalpoq davlat universitetidan tashqari) jurnalistika fakultetlari (boʻlimlari) tugatilishi belgilab qoʻyilsin.

Jurnalistlar malakasini oshirish va qayta tayyorlash Toshkent davlat universiteti va Oʻzbekiston davlat jahon tillari universiteti jurnalistika fakultetlari negizida maqsadli usulda amalga oshirilsin.

2. Oʻzbekiston Respublikasi Oliy va oʻrta maxsus taʼlim vazirligi:

bir oy muddatda oliy taʼlim tarkibidagi jurnalistika fakultetlarining yangi tuzilmasini hamda shu sohadagi bakalavriat va magistratura boʻyicha Davlat taʼlim standartlarini ishlab chiqsin va tasdiqlasin:

1999/2000 oʻquv yilidan boshlab jurnalistika fakultetlari qoshida ikkinchi mutaxassislik boʻyicha toʻlov-kontrakt asosida bir yillik maxsus oʻquv kurslarini tashkil etsin.

Mazkur kurslar tinglovchilari boshqa ixtisoslikka ega boʻlgan, jurnalistika sohasida kamida ikki yil mobaynida oʻz ijodiy qobiliyati va isteʼdodini koʻrsatgan tajribali mutaxassislar orasidan tanlab olinishi taʼminlansin;

1999/2000 oʻquv yiligacha jurnalistika fakultetlarida attestatsiya natijalari asosida zamon talablari darajasida jurnalist kadrlar tayyorlashga qodir yetuk professor-oʻqituvchilar tarkibini shakllantirsin.

Bu ishga mamlakatimiz va xorijiy davlatlardagi chuqur bilim va katta tajribaga ega boʻlgan taniqli amaliyotchilar hamda soha mutaxassislari keng jalb etilsin;

1999/2000 oʻquv yiligacha jurnalistika fakultetlarining moddiy-texnika bazasini inventarizatsiyadan oʻtkazib, ularni oʻquv dasturlari hamda mazkur miqdorda kompyuter texnikasi, oʻquv tele- va radiostudiyalari, chet tillarini mukammal oʻrganish uchun texnik uskunalar bilan taʼminlansin;

Oʻzbekiston Respublikasi Fan va texnika davlat qoʻmitasi bilan kelishgan holda 1999/2000 oʻquv yilidan boshlab Toshkent davlat universitetining jurnalistika fakulteti qoshida oʻquv-uslubiy qoʻllanmalar, darsliklar, sohani yaxshilash boʻyicha tahliliy tavsiyalar tayyorlash, jurnalistika istiqbollarini prognozlash masalalari bilan shugʻullanuvchi xoʻjalik hisobidagi ilmiy-uslubiy markazni tashkil etsin;

Davlat test markazi bilan birgalikda 1999/2000 oʻquv yilidan boshlab:

jurnalistika fakultetlariga qobiliyatli talabalar qabul qilish maqsadida abituriyentlarni test sinovlari bilan bir qatorda ijodiy imtihonlardan oʻtkazishni tashkil etsin;

har yili yagona mezonlar asosida jurnalistika fakultetlarining reytingini aniqlash va tahlil etish, ulardagi taʼlim-tarbiya jarayonini takomillashtirish boʻyicha takliflar tayyorlash va amaliy ish olib borishni yoʻlga qoʻysin.

3. Davlat matbuot qoʻmitasi, “Oʻzteleradio” kompaniyasi, OʻzA, “Jahon” axborot agentligi va boshqa manfaatdor tashkilotlar Oliy va oʻrta maxsus taʼlim vazirligi bilan kelishilgan holda:

jurnalistika fakultetlarida yuqori bosqich talabalari uchun ixtisosliklar boʻyicha mashhur va taniqli jurnalistlarning oʻquv studiyalarini hamda oʻz tahririyatlari qoshida jurnalistika fakultetlarining harakatdagi filiallari yoki oʻquv markazlarini tashkil etsinlar;

qobiliyatli, oʻz mahoratlarini namoyon eta boshlagan talabalarning amaliy tajribalarini oshirib borish maqsadida ularni ish oʻrganuvchi sifatida tahririyatlarga ijodiy xodimlikka qabul qilish choralarini koʻrsinlar.

4. Oʻzbekiston Respublikasi Prezidentining 1993-yil 5-fevraldagi “Oʻzbekistonning oʻquvchi yoshlarini ragʻbatlantirish choralari toʻgʻrisida”gi Farmoniga muvofiq 1999/2000 oʻquv yilidan boshlab mustaqil Vatanga va milliy istiqlol gʻoyalariga sadoqatli, yuqori jurnalistik iqtidorini namoyon etgan, faol jamoatchi, xorijiy tillarni yaxshi biladigan talabalar uchun Oʻzbekiston Respublikasi Prezidentining qoʻshimcha Davlat stipendiyasi taʼsis etilsin.

Davlat stipendiyasining sovrindorlarini aniqlash va stipendiyani moliyalashtirish Vazirlar Mahkamasining 1993-yil 25-martdagi 157-sonli qarorida koʻrsatilgan tartib boʻyicha amalga oshirilsin.

5. Oʻzbekiston Respublikasi Tashqi ishlar vazirligi, Oliy va oʻrta maxsus taʼlim vazirligi, Fan va texnika davlat qoʻmitasi, “Umid”, “Ustoz”, Oʻzbekiston ommaviy axborot vositalarini demokratlashtirish va qoʻllab-quvvatlash jamgʻarmalari va boshqa manfaatdor idoralar jurnalistika fakultetlarining ilgʻor pedagoglari va iqtidorli talablarining xorijiy davlatlarning yetakchi oʻquv va ilmiy markazlari, ommaviy axborot vositalari tahririyatlarida hamda xalqaro tashkilotlarning matbuot xizmatlarida maqsadli oʻquv amaliyoti va stajirovkalar oʻtashi uchun shart-sharoit yaratsin va amalga oshirsin.

6. Oʻzbekiston Respublikasi Moliya vazirligi jurnalistika fakultetlarining moddiy-texnika bazasini mustahkamlash, xususan, ularni zamonaviy kompyuter hamda lingofon xonalari, oʻquv tele- va radiostudiyalari va boshqa zarur jihozlar bilan taʼminlash Oliy va oʻrta maxsus taʼlim vazirligining buyurtmasiga muvofiq mablagʻ ajratsin.

7. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari H. Karomatov zimmasiga yuklansin.