Keyingi yillarda Oʻzbekiston Respublikasi Oliy Majlisi Qonunchilik palatasi qoʻmitalarining qonunlar va qonunosti hujjatlari ijrosi holatini oʻrganish, joylarda saylovchilarni oʻylantirib kelayotgan tizimli muammolarni parlament nazoratining taʼsirchan shakllaridan foydalangan holda hal etish borasidagi faoliyatini samarali tashkil etish boʻyicha qator chora-tadbirlar amalga oshirilmoqda.

Xususan, Oʻzbekiston Respublikasi Oliy Majlisi Qonunchilik palatasining Mudofaa va xavfsizlik masalalari qoʻmitasi tomonidan joriy yilda jami 12 ta nazorat-tahlil tadbiri oʻtkazildi. Ulardan 6 tasi qonun hujjatlarining ijro etilishi holatini oʻrganishga, 6 tasi davlat va xoʻjalik boshqaruvi organlari rahbarlarining axborotini eshitishga taalluqlidir.

Mazkur tadbirlarning taʼsirchanligi hamda natijadorligini oshirish, shuningdek ularning sifatli tashkil etilishini taʼminlash maqsadida “Ijtimoiy fikr” respublika jamoatchilik fikrini oʻrganish markazi tomonidan oʻtkazilgan “Yoshlar oʻzi, armiya va vatanparvarlik haqida”gi, “Yoʻl harakati xavfsizligini taʼminlash: fikrlar, baholar va ijro haqida”gi va yana boshqa qator soʻrovlar tahlilidan keng foydalanildi.

Mamlakatimiz Prezidenti tomonidan belgilangan ustuvor vazifalardan kelib chiqib, Oʻzbekiston Respublikasi Oliy Majlisi Qonunchilik palatasining Mudofaa va xavfsizlik masalalari qoʻmitasi nazorat-tahlil faoliyati samaradorligini oshirish maqsadida 2022-yilda harbiy xizmatchilarni va ularning oila aʼzolarini ijtimoiy himoya qilish, yoshlarni vatanparvarlik ruhida tarbiyalash va muddatli harbiy xizmatga tayyorlash, yoʻl harakati xavfsizligini taʼminlash masalalarida sotsiologik tadqiqotlar oʻtkazish muhim ahamiyat kasb etmoqda.

Yuqoridagilardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Mudofaa va xavfsizlik masalalari qoʻmitasining sotsiologik tadqiqotlar oʻtkazish yuzasidan “Ijtimoiy fikr” respublika jamoatchilik fikrini oʻrganish markaziga 2022-yil uchun buyurtma berish toʻgʻrisidagi taklifi maʼqullansin.

2. Oʻzbekiston Respublikasi Oliy Majlisi Qonunchilik palatasi qoʻmitalarining ish rejalaridan kelib chiqqan holda hamda har bir qoʻmita faoliyatining oʻziga xos jihatlarini inobatga olib, aniq yoʻnalishlar va sohalarda sotsiologik tadqiqotlar oʻtkazish boʻyicha “Ijtimoiy fikr” respublika jamoatchilik fikrini oʻrganish markaziga buyurtmalar berish choralarini koʻrsin.

3. Ushbu Qaror qabul qilingan kundan eʼtiboran kuchga kiradi.