Davlat tasarrufidan chiqarish va xususiylashtirishdan tushadigan mablagʻlarni jamlash va ulardan foydalanish mexanizmini takomillashtirish, korxonalarni xususiylashtirishdan keyin qoʻllab-quvvatlash loyihalarini amalga oshirish uchun beriladigan kreditlardan foydalanish samaradorligini oshirish va ularni oʻz vaqtida qaytarish investitsiya loyihalarini mablagʻ bilan taʼminlashning qoʻshimcha kafolatlarini tashkil etish maqsadida Vazirlar Mahkamasi qaror qiladi:

1. Davlat mulki qoʻmitasi va uning hududiy boʻlinmalarining schyotlaridagi xususiylashtirishdan tushadigan mablagʻlar soliq solish obyekti hisoblanmaydi.

2. Belgilansinki, 1998-yil 1-yanvardan boshlab davlatga tegishli aksiyalar paketlari boʻyicha (Vazirlar Mahkamasining maxsus qarorlari qabul qilingan korxonalar aksiyalari paketlari bundan istisno) dividendlar sifatida olinadigan daromadlarning 50 foizi davlat budjetiga yoʻnaltiriladi.

Davlatga tegishli aksiyalar ulushi boʻyicha dividendlarning qolgan 50 foizi korxonalar ixtiyorida qoladi hamda texnika bilan qayta jihozlash va rekonstruksiya qilish maqsadlariga yoʻnaltiriladi.

3. Oʻzbekiston Respublikasi Moliya vazirligi:

Oʻzbekiston Respublikasi Davlat mulki qoʻmitasi bilan birgalikda bir hafta muddatda Vazirlar Mahkamasining 1995-yil 31-iyuldagi 273-f-son farmoyishi bilan tasdiqlangan “Davlat mulki davlat tasarrufidan chiqarilganda va xususiylashtirilganda, obyektlar kim oshdi savdolarida, tanlovlar va birja savdolarida sotilganda haq toʻlashning, tushgan mablagʻlarni taqsimlash va hisobga olishning, ushbu mablagʻlarning tushishi va ulardan foydalanish ustidan nazorat qilishning Yagona tartibi”ni oʻzgartirish va unga qoʻshimchalar kiritish yuzasidan takliflar kiritsin.

Markaziy bank va “Biznes-fond” bilan birgalikda tijorat banklari tomonidan qarz oluvchilarga maxsus schyotlar ochilishini va banklar tomonidan ajratilgan mablagʻlardan maqsadli foydalanilishi ustidan nazoratni amalga oshirgan holda qarz oluvchilar va kreditorga kassa xizmati koʻrsatish funksiyasi bajarilishini nazarda tutuvchi investitsiya loyihalariga kredit berish tartibi toʻgʻrisidagi nizomni ishlab chiqsin.

4. Oʻzbekiston Respublikasi Davlat mulki qoʻmitasi 1998-yil 1-fevralgacha boʻlgan muddatda:

1998-yil 1-yanvargacha amalga oshirilgan dasturlar boʻyicha davlat tasarrufidan chiqarish va xususiylashtirishdan mablagʻlar toʻliq tushishini taʼminlasin;

qarzdorlarning va boshqa debitorlarning qaytarilishiga ishonch boʻlmagan qarzlari tuzilmasi boʻyicha Vazirlar Mahkamasiga taklif kiritsin.

5. Oʻzbekiston Respublikasi Vazirlar Mahkamasining “1997-yilda Oʻzbekiston Respublikasini ijtimoiy-iqtisodiy rivojlantirishning asosiy koʻrsatkichlari prognozi va Davlat budjeti toʻgʻrisida” 1996-yil 31-dekabrdagi 469-son qarorining 8-bandi 1998-yil 1-yanvardan boshlab oʻz kuchini yoʻqotgan deb hisoblansin.

6. Mazkur qarorning bajarilishini nazorat qilish Bosh vazir oʻrinbosari V.A. Chjen va Moliya vaziri J.B. Sayfiddinov zimmasiga yuklansin.