Soʻnggi yillarda mahalliy vakillik organlari faoliyati tubdan oʻzgardi, xalq deputatlari Kengashlari yigʻilishlarida hududlarni rivojlantirish bilan bir qatorda ijtimoiy-iqtisodiy sohalardagi turli muammolarni hal etishga doir qator boshqa masalalar tizimli ravishda muhokama qilib borilmoqda. Kengashlarning joylardagi dolzarb masalalarni bartaraf etishdagi roli sezilarli darajada oshdi.

Xalq deputatlari Kengashlarining jamiyatdagi tutgan oʻrnini, nazorat faoliyatini kuchaytirishga qaratilgan huquqiy asoslar yaratildi. Jumladan, hokim va uning oʻrinbosarlari, prokuratura, adliya, ichki ishlar va sogʻliqni saqlash idoralari rahbarlarining Kengashlar oldida hisobdorligi qonuniy asosda belgilab qoʻyildi.

Xalq deputatlari Kengashlariga axborot-tahliliy va tashkiliy jihatdan koʻmaklashuvchi Kotibiyatlar tuzilishi ular faoliyatiga yangicha mazmun-mohiyat olib kirdi, bu oʻz navbatida, deputatlar ishining samaradorligini oshirishda muhim omil boʻlib xizmat qilmoqda. Hozirda xalq deputatlari Kengashlari tom maʼnoda xalq va davlat oʻrtasida mustahkam koʻprik vazifasini bajaruvchi organga aylandi.

Bugunga kelib xalq deputatlari Kengashlarining Oʻzbekiston Respublikasi Oliy Majlisi palatalari bilan hududlarda keng koʻlamli islohotlarni amalga oshirish, aholini tashvishlantirayotgan muammolarni hal etish borasidagi amaliy hamkorligi barqaror tus oldi.

Jumladan, Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) deputatlari mahalliy vakillik organlari ishida tizimli asosda ishtirok eta boshladilar. Qonunchilik palatasida koʻrib chiqilayotgan bir qator qonun loyihalari siyosiy partiyalar fraksiyalari orqali xalq deputatlari Kengashlaridagi partiya guruhlarida muhokama qilinmoqda, Kengashlar deputatlarining fikr va takliflari qonun loyihalaridagi normalarni takomillashtirishda inobatga olinmoqda.

Qonunchilik palatasi deputatlari har oyning oxirgi haftasida oʻz saylov okruglarida boʻlishlari anʼanaga aylangani esa barcha darajadagi deputatlar joylarda aholini qiynab kelayotgan muammolarni hal etish imkoniyatini kengaytirdi. Xalq deputatlari Kengashlari deputatlari joylardagi oʻrganishlarda, saylov okruglaridagi uchrashuvlarda Qonunchilik palatasi deputatlari bilan birga bevosita qatnasha boshladi.

Qonunchilik palatasi majlislarida muayyan masalalar muhokama qilinayotganda, qonun loyihalari koʻrib chiqilayotganda xalq deputatlari Kengashlari deputatlarini keng jalb qilish, joylarda qonun loyihalari muhokamalarini tizimli ravishda tashkil etish, loyihalar yuzasidan jamoatchilikning fikr-mulohaza va takliflarini Qonunchilik palatasining qoʻmitalariga taqdim etish amaliyotidan yanada samarali foydalanish dolzarb ahamiyatga ega.

Qonunchilik palatasi qoʻmitalari tomonidan hududlarda oʻtkaziladigan nazorat-tahlil tadbirlarida xalq deputatlari Kengashlari deputatlarining ishtirokini taʼminlash lozim.

Xalq deputatlari Kengashlarida ham Oliy Majlis palatalaridagi kabi yoshlar parlamenti vakillari maktabi tashkil etish boʻyicha boshlangan ishlarni izchil davom ettirish ustuvor masala hisoblanadi.

Yuqoridagilardan kelib chiqib, Qonunchilik palatasining mahalliy vakillik organlari bilan hamkorligini yanada kuchaytirish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi raisi Sh. Bafayevning “Oʻzbekiston Respublikasi Oliy Majlisi Qonunchilik palatasining xalq deputatlari Kengashlari bilan hamkorligini yanada kuchaytirish toʻgʻrisida”gi axboroti maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalariga:

fraksiyalarda koʻrib chiqilayotgan masalalardan xalq deputatlari Kengashlarini xabardor qilib borish tizimini joriy qilish;

Qonunchilik palatasi majlislarida xalq deputatlari Kengashlari deputatlarining ishtirokini doimiy ravishda taʼminlash choralarini koʻrish;

muhim ijtimoiy-iqtisodiy ahamiyatga ega qonun loyihalarini ikkinchi oʻqishga tayyorlash jarayonida joylarda xalq deputatlari Kengashlari deputatlari bilan keng muhokama qilish amaliyotini yoʻlga qoʻyish;

Qonunchilik palatasi deputatining yordamchisi koʻmagida xalq deputatlari Kengashlari bilan oʻzaro maʼlumot almashinuvini taʼminlash;

xalq deputatlari Kengashlari Kotibiyatlari faoliyatiga zamonaviy ish uslublarini keng joriy etishga koʻmaklashish tavsiya etilsin.

3. Oʻzbekiston Respublikasi Oliy Majlisi Qonunchilik palatasining qoʻmitalari:

hududlarda oʻtkaziladigan nazorat-tahlil tadbirlariga xalq deputatlari Kengashlari deputatlarini keng jalb etish;

qoʻmitalarning faoliyat yoʻnalishidan kelib chiqib, xalq deputatlari Kengashlaridagi doimiy komissiyalar bilan hamkorlik aloqalarini yoʻlga qoʻyish choralarini koʻrsin.

4. Oʻzbekiston Respublikasi Oliy Majlisi Qonunchilik palatasining Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi (Sh. Bafayev) hamda Yoshlar masalalari boʻyicha komissiyasi (A. Aslonov) xalq deputatlari Kengashlarida ham Oʻzbekiston Respublikasi Oliy Majlisi Qonunchilik palatasidagi kabi yoshlar parlamenti vakillari maktabini tashkil etish yuzasidan asoslantirilgan takliflar kiritsin.

5. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklatilsin.

6. Ushbu Qaror qabul qilingan kundan eʼtiboran kuchga kiradi.