Transport infratuzilmasini rivojlantirish uchun investitsiyalar jalb etish miqdorini kengaytirish, xalq xoʻjaligi yuklarining uzluksiz tashilishini taʼminlash hamda “Oʻzbekiston temir yoʻllari” davlat-aksiyadorlik kompaniyasining lokomotivlar parkini zamonaviylashtirish va yangilash maqsadida Vazirlar Mahkamasi qaror qiladi:

1. Quyidagilar:

Yevropa tiklanish va taraqqiyot banki Direktorlar kengashi tomonidan “Dizel lokomotivlari parkini zamonaviylashtirish” loyihasini amalga oshirish uchun Oʻzbekiston Respublikasiga toʻrt yillik imtiyozli davrni oʻz ichiga olgan 15 yil muddatga 68 mln AQSH dollari miqdoridagi kredit berilishini maʼqullanganligi;

“Oʻzbekiston temir yoʻllari” davlat-aksiyadorlik kompaniyasi tomonidan Yevropa tiklanish va taraqqiyot banki bilan tegishli kredit bitimi imzolanganligi;

Oʻzbekiston Respublikasi Moliya vazirligi tomonidan Oʻzbekiston Respublikasi Hukumati nomidan “Oʻzbekiston temir yoʻllari” davlat-aksiyadorlik kompaniyasining dizel lokomotiv parkini zamonaviylashtirish loyihasi boʻyicha Oʻzbekiston Respublikasi bilan Yevropa tiklanish va taraqqiyot banki oʻrtasida Kafolat bitimi imzolanganligi maʼlumot uchun qabul qilinsin.

2. Belgilansinki:

koʻrsatib oʻtilgan kredit boʻyicha “Oʻzbekiston temir yoʻllari” davlat-aksiyadorlik kompaniyasi qarz oluvchi hisoblanadi;

Yevropa tiklanish va taraqqiyot bankining kredit mablagʻlari kompaniya lokomotivlari uchun yordamchi asbob-uskunalar bilan birgalikda tender asosida dizel-generator qurilmalari, shuningdek “Oʻztemiryoʻltuzatishmash” korxonasining quyuv sexlari uchun asbob-uskunalar sotib olishga yoʻnaltiriladi;

koʻrsatib oʻtilgan kredit boʻyicha asosiy qarzni qaytarish, foizlar va vositachilik haqi toʻlash 1-ilovaga* muvofiq kreditni qaytarish jadvaliga binoan “Oʻzbekiston temir yoʻllari” davlat-aksiyadorlik kompaniyasining oʻz mablagʻlari hisobiga amalga oshiriladi;

“Oʻzbekiston temir yoʻllari” davlat-aksiyadorlik kompaniyasi mazkur loyiha mablagʻlari hisobiga sotib olinadigan asbob-uskunalar, tovarlar (ishlar, xizmatlar) uchun bojxona toʻlovlari toʻlashdan ozod etiladi (bojxona rasmiylashtiruvi yigʻimlari bundan mustasno).

3. Vazirlar Mahkamasining Tashqi iqtisodiy aloqalar kompleksi rahbari (Gʻaniyev) xalqaro moliyaviy institutlar tomonidan taqdim etiladigan kredit liniyalari va grantlar doirasidagi xaridlar boʻyicha tenderlar oʻtkazilishida suiisteʼmollarga, narxlarni sunʼiy pasaytirish va oshirishga yoʻl qoʻyilmasligi uchun qattiq nazorat oʻrnatsin.

Tenderlar oʻtkazish natijalari toʻgʻrisida Vazirlar Mahkamasiga muntazam ravishda axborot berilsin.

4. “Dizel lokomotivlari parkini zamonaviylashtirish” loyihasi boʻyicha texnik-iqtisodiy asoslashning 2-ilovaga* muvofiq koʻrsatkichlari tasdiqlansin.

5. Oʻzbekiston Respublikasi Adliya vazirligi “Dizel lokomotivlari parkini zamonaviylashtirish” loyihasi boʻyicha Oʻzbekiston Respublikasi bilan Yevropa tiklanish va taraqqiyot banki oʻrtasidagi Kafolat bitimi yuzasidan belgilangan tartibda yuridik xulosa bersin.

6. Oʻzbekiston Respublikasi Tashqi ishlar vazirligi, Ichki ishlar vazirligi, “Oʻzbekiston temir yoʻllari” davlat-aksiyadorlik kompaniyasining buyurtmanomalari boʻyicha loyihani amalga oshirishda qatnashayotgan chet ellik mutaxassislarni konsullik yigʻimlari va davlat bojlari toʻlashdan ozod etgan holda ularga koʻp martalik vizalar berilishini va ularning muddati uzaytirilishini, shuningdek ular vaqtincha roʻyxatdan oʻtkazilishini va vaqtincha roʻyxatdan oʻtkazish muddati uzaytirilishini taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N.Toʻlaganov va Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.