Toshkent shahri mehmonxonalarini 2003-yilda Yevropa tiklanish va taraqqiyot banki Boshqaruvchilar Kengashining yillik majlisi qatnashchilarini qabul qilishga tayyorlash, shuningdek xalqaro turizmni yanada rivojlantirish, mehmonxona sohasiga xorijiy investitsiyalarni keng jalb etish maqsadida Vazirlar Mahkamasi qaror qiladi:

1. Toshkent shahar hokimligi, “Oʻzbekturizm” kompaniyasi va Oʻzbekiston Respublikasi Davlat mulki qoʻmitasining:

Toshkent shahridagi “Doʻstlik”, “Toshkent”, “Rossiya” va “Chorsu” mehmonxona komplekslari, shuningdek Amir Temur koʻchasidagi qurilishi tugallanmagan obyekt negizida mehmonxonalarni rekonstruksiya qilish, qurish va bundan buyon foydalanish boʻyicha qoʻshma korxonalar tashkil etish toʻgʻrisidagi takliflariga rozilik berilsin. Xorijiy sheriklar ushbu qoʻshma korxonalarning ustav fondlariga oʻz ulushlarini xorijiy va milliy valyutalardagi pul mablagʻlari bilan qoʻshadilar;

“Oʻzbekiston” mehmonxona kompleksini rekonstruksiya qilish loyihasining yakunlovchi bosqichini amalga oshirish toʻgʻrisidagi takliflariga rozilik berilsin.

2. Toshkent shahar hokimligi va “Oʻzbekturizm” kompaniyasi bir oy muddatda koʻrsatib oʻtilgan mehmonxonalarni rekonstruksiya qilish, qurish va ulardan foydalanish boʻyicha qoʻshma korxonalarning loyihalari texnik-iqtisodiy asoslanishini ishlab chiqsinlar va belgilangan tartibda tasdiqlasinlar.

3. Belgilansinki, loyihalar texnik-iqtisodiy asoslashda nazarda tutilgan manbalarga muvofiq:

rekonstruksiya qilish va qurish tugallangandan keyin keyinchalik mehmonxonalar binolarini bankka garovga qoʻygan holda yangidan tashkil etilgan qoʻshma korxonalar va ularning muassislarining likvidli mol-mulkini garovga qoʻyish bilan;

mablagʻ bilan taʼminlovchi banklarning xorijiy banklar oldidagi kafilligi va kafolati ostida mablagʻ bilan taʼminlanadi:

4. Oʻzbekiston Respublikasi Tashqi iqtisodiy faoliyat milliy banki, “Oʻzsanoatqurilishbank”, “Asaka” banki loyihalarning texnik-iqtisodiy asoslanishi ekspertizasi natijalari boʻyicha xorijiy banklar bilan belgilangan tartibda kredit bitimlari tuzsinlar va mablagʻ bilan taʼminlashni oʻz mablagʻlari hisobiga yoki xorijiy banklarning mablagʻlarini koʻrsatib oʻtilgan mehmonxonalarni rekonstruksiya qilish va qurishga qayta moliyalash yoʻli bilan taʼminlasinlar.

5. Mazkur qarorga muvofiq yangidan tashkil etilayotgan qoʻshma korxonalarga mehmonxonalarni rekonstruksiya qilish va qurishni 2003-yil 1-yanvargacha loyihalashtirish va loyiha-smeta hujjatlari tasdiqlanishi bilan bir vaqtda ishchi chizmalar boʻyicha amalga oshirishga, istisno tariqasida, ruxsat berilsin.

6. Oʻzbekiston Respublikasi Davlat mulki qoʻmitasi Toshkent shahar hokimligi va “Oʻzbekturizm” kompaniyasiga mehmonxona komplekslarining mol-mulkini ustav fondiga ulush sifatida foydalanish uchun qoʻshma korxonalarga berish huquqini bersin, shuningdek garov shartnomalarini (ipoteka) rasmiylashtirish uchun tegishli ruxsatnomalar berilishini nazarda tutsin.

7. Oʻzbekiston Respublikasi Adliya vazirligi Toshkent shahar hokimligi va “Oʻzbekturizm” kompaniyasining garov mol-mulki davlat poshlinalari undirilmasdan qoʻshilishi toʻgʻrisidagi shartnomalar notarial tasdiqlanishini taʼminlasin.

8. Toshkent shahar hokimligi va “Oʻzbekturizm” kompaniyasi uch oy muddatda qoʻshma korxonalarning xorijiy muassislari bilan birgalikda menejmentni amalga oshirishga va mehmonxonalarni boshqarishga birinchi darajali xorijiy kompaniyalarni tanlov asosida jalb etsinlar.

9. Yangidan tashkil etilayotgan qoʻshma korxonalar va “Otel Oʻzbekiston” qoʻshma korxonasi:

rekonstruksiya qilish va qurish davrida foydalanishga tayyor holda qurish uchun tuzilgan kontraktlar doirasida mehmonxonalarni rekonstruksiya qilish va qurish uchun olib kelinadigan materiallar va asbob-uskunalarga bojxona toʻlovlari toʻlashdan (bojxona rasmiylashtiruvi yigʻimlari bundan mustasno);

kreditlarni qaytarish davrida, biroq kredit shartnomalarida belgilangan muddatlardan ortiq boʻlmagan davrda, daromad (foyda)dan olinadigan soliqdan, qoʻshilgan qiymat soligʻidan, mulk soligʻidan, yer soligʻidan va ekologiya soligʻidan ozod qilinsin, soliq imtiyozlari berilishi natijasida boʻshab qoladigan mablagʻlar belgilangan tartibda toʻliq miqdorda mehmonxonalarni rekonstruksiya qilish va qurish uchun jalb qilingan kreditlarni qaytarishga yoʻnaltirilishi nazarda tutilsin.

10. Mazkur loyihalarni mablagʻ bilan taʼminlashda qatnashuvchi xorijiy banklar va sugʻurta agentliklari Oʻzbekiston Respublikasi hududida norezidentlardan undiriladigan daromaddan olinadigan soliqlarni toʻlashdan ozod qilinsin.

11. Oʻzbekiston Respublikasi Tashqi ishlar vazirligi Toshkent shahar hokimligi va “Oʻzbekturizm” kompaniyasining buyurtmanomalari boʻyicha mehmonxonalarni rekonstruksiya qilish, qurish, ulardan foydalanish va ularni boshqarish uchun jalb etilayotgan xorijiy mutaxassislarga mehnat faoliyati bilan shugʻullanish huquqini beruvchi koʻpmartali kirish vizalari konsullik yigʻimlari undirilmasdan berilishini taʼminlasin.

12. Oʻzbekiston Respublikasi Ichki ishlar vazirligi Toshkent shahar hokimligi va “Oʻzbekturizm” kompaniyasining buyurtmanomalari boʻyicha mehmonxonalarni rekonstruksiya qilish, qurish, ulardan foydalanish va ularni boshqarish ishlarini amalga oshirishda qatnashish uchun tuzilgan muddatli mehnat kontraktlari amal qilishi davrida jalb qilinadigan xorijiy mutaxassislarning davlat bojlari undirilmasdan vaqtincha roʻyxatdan oʻtkazilishini va roʻyxatdan oʻtkazish muddati uzaytirilishini taʼminlasin, shuningdek muddatli mehnat kontraktlari amal qilishi davrida respublikaning boshqa mintaqalaridan jalb etiladigan mahalliy mutaxassislarning roʻyxatdan oʻtkazilishini va roʻyxatdan oʻtkazish muddati uzaytirilishini taʼminlasin.

13. Oʻzbekiston Respublikasi Mehnat va aholini ijtimoiy muhofaza qilish vazirligi Toshkent shahar hokimligi va “Oʻzbekturizm” kompaniyasining buyurtmanomalari boʻyicha mehmonxonalarni rekonstruksiya qilish, qurish, ulardan foydalanish va ularni boshqarish uchun jalb etilayotgan xorijiy xodimlarning mehnat faoliyatini amalga oshirish uchun zarur ruxsatnomalar (litsenziyalar) oʻz vaqtida berilishini taʼminlasin.

14. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.