Oʻzbekiston Respublikasida Yevropa Ittifoqi Komissiyasining texnikaviy koʻmaklashish dasturi (TASIS) doirasida chet El pudratchi kompaniyalari bilan birgalikda amalga oshirilayotgan loyihalar boʻyicha vazirliklar, idoralar va tashkilotlarning faoliyatini tartibga solish, shuningdek, TASIS loyihalarini amalga oshirishni muvofiqlashtirishni va ularning monitoringini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasida Yevropa Ittifoqi Komissiyasining TASIS dasturi doirasida vazirliklar va idoralar faoliyatining prinsiplari va shartlari toʻgʻrisidagi Nizom tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Makroiqtisodiy rivojlantirish, tarkibiy oʻzgartirishlar, xorijiy investitsiyalarni jalb etish va hududlarni kompleks rivojlantirish masalalari yigʻma axborot-tahlil departamentiga yuklansin.

1. Mazkur Nizom Yevropa Ittifoqi Komissiyasi texnikaviy koʻmaklashish dasturi (TASIS) doirasida loyihalarni amalga oshirish tartibini boshqaradi hamda koʻrsatib oʻtilgan loyihalarni amalga oshirishda Oʻzbekiston Respublikasi vazirliklari va idoralari faoliyatini tartibga soladi.

2. TASIS — bu Yevropa Ittifoqi bilan Mustaqil Davlatlararo Hamdoʻstligi va Moʻgʻuliston oʻrtasidagi uygʻun aloqalarni rivojlantirishga koʻmaklashish maqsadida Yevropa Ittifoqi tomonidan ushbu sherik mamlakatlar uchun ishlab chiqilgan dasturdir.

3. Oʻzbekistondagi TASIS dasturi faoliyati Investitsiyalar, innovatsion rivojlantirish, erkin iqtisodiy va kichik sanoat zonalari faoliyatini muvofiqlashtirish, turizm masalalari axborot-tahlil departamenti huzuridagi Oʻzbekistonda Yevropa Ittifoqi Komissiyasining texnikaviy yordamni muvofiqlashtirish Byurosi (“OʻZYIKBYuRO”) hamda Oʻzbekiston Respublikasi Moliya vazirligining Insonparvarlik yordami hamda texnik koʻmaklashish vositalaridan maqsadli foydalanishni muvofiqlashtirish, hisobga olish va nazorat qilish departamenti (keyingi oʻrinlarda — Moliya vazirligi Departamenti deb ataladi) tomonidan muvofiqlashtiriladi.

4. TASIS dasturining faoliyati boshqaruv, huquqiy va normativ bazani tashkil etish, yangi muassasalar tashkil etish va ishlab turganlarini qayta tashkil etish, ekspertlar guruhini yuborish, ekspert tadqiqotlari oʻtkazish va mutaxassislarning kasb-kor tayyorgarligi, xalqaro tarmoq tuzilmalari tashkil etish, pilot loyihalarini amalga oshirish masalalarida maslahat yordami koʻrsatish shaklida amalga oshiriladi.

5. TASIS dasturi doirasida texnikaviy yordam olishni xohlovchi tashkilotlar buyurtmanoma bilan “OʻZYIKBYuRO” ga yozma ravishda murojaat qiladilar. Buyurtmanomada boʻlajak loyihani mablagʻ bilan taʼminlashga doir aniq takliflar bayon qilinadi.

6. Barcha buyurtmanomalar TASIS dasturi maqsadlari va shartlariga muvofiq muayyan mezonlar boʻyicha “OʻZYIKBYuRO”da dastlabki tanlovdan oʻtadi va kelishish, hisobga olish va keyinchalik monitoring olib borish uchun Moliya vazirligi Departamentiga yuboriladi. Tanlovdan oʻtgan va kelishilgan takliflar tasdiqlash va boʻlajak xatti-harakatlar dasturiga kiritish uchun Yevropa Komissiyasiga yuborish uchun Oʻzbekiston Respublikasi Vazirlar Mahkamasining Investitsiyalar, innovatsion rivojlantirish, erkin iqtisodiy va kichik sanoat zonalari faoliyatini muvofiqlashtirish, turizm masalalari axborot-tahlil departamentiga yuboriladi.

7. Tasdiqlangan loyihalar roʻyxati loyihalarni bajarish yuzasidan takliflar qabul qilinishi haqida boʻlajak pudratchilarni xabardor qilish uchun Yevropa Komissiyasining rasmiy jurnalida eʼlon qilinadi.

8. Kontraktlar boʻyicha axborot eʼlon qilingandan keyin Yevropa Komissiyasi tender hujjatlarini tayyorlaydi. Ushbu hujjatlarda har bir loyiha boʻyicha batafsil texnik topshiriqlar mavjud boʻladi.

9. TASIS dasturi aniq loyihalar boʻyicha tenderda yutib chiqqan kompaniyalar (keyingi oʻrinlarda “pudratchilar” deb yuritiladi) tomonidan amalga oshiriladi.

10. Ham alohida kompaniya, ham bir necha kompaniyalardan iborat konsorsium pudratchi boʻlishi mumkin.

11. TASIS dasturining har bir loyihasi koʻrsatilgan loyiha boʻyicha YIK ning mustaqil maslahatchisi tomonidan ishlab chiqiladigan texnik topshiriqlarga muvofiq amalga oshiriladi va Moliya vazirligi Departamenti va yordam oluvchi tashkilot (keyingi oʻrinlarda “buyurtmachi” deb yuritiladi) bilan kelishiladi.

12. Pudratchi loyihani amalga oshirish uchun u bilan YI ekspertlari oʻrtasida tuziladigan uzoq muddatli (olti oydan ortiq) yoki qisqa muddatli (bir haftadan bir necha oygacha) kontrakt asosida Yevropa ekspertlarini (keyingi oʻrinlarda “YI ekspertlari” deb yuritiladi) jalb etadi.

13. “OʻZYIKBYuRO” loyiha rahbarlarining moʻljallanayotgan kelishi toʻgʻrisida buyurtmachini oldindan xabardor qiladi va loyihani amalga oshirish boshlanishi muddatlarini kelishadi.

14. Buyurtmachi koʻrsatib oʻtilgan loyihani amalga oshirish boʻyicha ishchi guruh tarkibini aniqlaydi va oʻz tomonidan ishlarni muvofiqlashtiruvchini tayinlaydi.

15. YI ekspertlari “OʻZYIKBYuRO”ga, Moliya vazirligi Departamentiga va buyurtmachiga loyiha boʻyicha texnik topshiriqni barcha ilovalar va qoʻshimchalar bilan birgalikda beradi.

16. Pudratchi “OʻZYIKBYuRO”, Moliya vazirligi Departamenti va buyurtmachi bilan kelishilgan jadvalga koʻra loyiha boʻyicha nazarda tutilgan barcha hisobotlarni taqdim etadi.

17. YI ekspertlari “OʻZYIKBYuRO” da roʻyxatdan oʻtishlari kerak.

18. YI ekspertlari oʻz faoliyatini Oʻzbekiston Respublikasining butun hududida amalga oshirish huquqiga egadirlar, chet el fuqarolarining boʻlishi qonunchilikda belgilangan tartibda tartibga solinadigan ayrim rayonlar bundan mustasno.

19. Tashqi ishlar vazirligi “OʻZYIKBYuRO” ning buyurtmanomasi boʻyicha loyiha boʻyicha ishlash davrida YI ekspertlari va ularning oila aʼzolari mazkur Nizomning 18-moddasiga muvofiq konsullik yigʻimlari toʻlamasdan boʻlishlari huquqini beruvchi vizaviy qoʻllab-quvvatlashni olish uchun zarur hujjatlarni rasmiylashtiradi.

20. YI ekspertlarini xususiy uylarda vaqtincha roʻyxatdan oʻtkazish buyurtmachining buyurtnomasiga koʻra ichki ishlar organlari tomonidan vaqtincha roʻyxatdan oʻtkazganlik uchun yigʻim yoki haq olmasdan belgilangan tartibda amalga oshiriladi.

21. Pudratchi mahalliy ekspertlarni kontrakt asosida ishga jalb etishga haqlidir. Ularning huquqiy holati Oʻzbekiston Respublikasi qonunchiligi bilan tartibga solinadi.

22. “OʻZYIKBYuRO” ekspertlarga ularning maqomi, huquqlari va vazifalarini tushuntirish shart.

23. Pudratchi loyiha ustida ishlash uchun Oʻzbekiston Respublikasi mahalliy xodimlarni (tarjimonlar, kotiblar, haydovchilar va boshqalarni) yollashga haqlidir. Mahalliy xodimlarga tegishli hujjatlarni rasmiylashtirish “OʻZYIKBYuRO” tomonidan Tashqi ishlar vazirligining diplomatik servis xizmatida belgilangan tartibda amalga oshiriladi.

24. Yevropa Ittifoqining Oʻzbekiston Respublikasida 183 kundan ortiq boʻlgan ekspertlari belgilangan muddatda mahalliy soliq organiga daromadlari toʻgʻrisida deklaratsiya taqdim etishlari kerak.

25. TASIS dasturi loyihalarini amalga oshirish doirasida chet eldan yetkazib beriladigan asbob-uskunalar, transport vositalari va boshqa texnika (keyingi oʻrinlarda — asbob-uskunalar deb yuritiladi) Yevropa Ittifoqining granti sifatida qaraladi va ularga boj poshlinalari, soliqlar va yigʻimlar solinmaydi.

26. Asbob-uskunalar “OʻZYIKBYuRO” nomiga keladi.

27. TASIS dasturi loyihalari mablagʻlari hisobiga xarid qilingan transport vositalari ichki ishlar organlari tomonidan yigʻimlar undirilmasdan belgilangan tartibda ekspertlar nomiga roʻyxatdan oʻtkaziladi.

28. TASIS dasturi boʻyicha amalga oshiriladigan loyihalar doirasida Oʻzbekiston Respublikasiga asbob-uskunalar yetkazib berishga kontrakt Tashqi iqtisodiy aloqalar, investitsiyalar va savdo vazirligida va vakil qilingan bankda roʻyxatdan oʻtkazilmaydi.

29. Olinadigan asbob-uskunani sertifikatsiyalash zarur boʻlganda, u “Oʻzstandart” agentligi organlari va ular tomonidan vakil qilingan tashkilotlar tomonidan sertifikatsiya qilinganligi uchun haq undirilmasdan amalga oshiriladi.

30. Loyiha tugallangandan keyin asbob-uskunalar pudratchi tomonidan “OʻZYIKBYuRO” bilan kelishilgan holda buyurtmachiga berilishi mumkin. Buyurtmachi asbob-uskunalarni belgilangan tartibda oʻz balansiga qabul qiladi. Ushbu holatda loyiha tugallangandan keyin mazkur banda koʻrsatilgan asbob-uskunalar Davlat bojxona qoʻmitasi tomonidan (transport vositalarini berishda — Davlat bojxona qoʻmitasi va Ichki ishlar vazirligi tomonidan) boj poshlinalari, soliqlar va boshqa yigʻimlar undirilmasdan buyurtmachining nomiga qayta rasmiylashtiriladi.

31. Buyurtmachi asbob-uskunalarni olishda loyiha tugallangandan keyin “OʻZYIKBYuRO”ga va tegishli statistika organiga olingan asbob-uskunalarning foydalanilishi toʻgʻrisidagi maʼlumotlarni har yili taqdim etadi. Begonalashtirilgan taqdirda esa belgilangan tartibda toʻlovlar va soliqlar toʻlaydi.

32. Pudratchi yoki “OʻZYIKBYuRO” tomonidan asbob-uskunalar qaytarib olib ketilishi toʻgʻrisida qaror qabul qilingan taqdirda (fors-major holatlar paydo boʻlganda), qaytarib olib ketishni rasmiylashtirish Oʻzbekiston Respublikasi bojxona organlari tomonidan boj poshlinalari, soliqlar, yigʻimlar va har qanday tusdagi boshqa toʻlovlar undirilmasdan amalga oshiriladi.

33. Loyihani amalga oshirish davomida paydo boʻluvchi barcha nizolar vazirliklar va idoralar, shuningdek, yordam oluvchi tashkilotlar tomonidan “OʻZYIKBYuRO” bilan birgalikda hal qilinadi.

34. Zarurat boʻlganda nizoli masalalar “OʻZYIKBYuRO” tomonidan kelishish uchun Vazirlar Mahkamasining Investitsiyalar, innovatsion rivojlantirish, erkin iqtisodiy va kichik sanoat zonalari faoliyatini muvofiqlashtirish, turizm masalalari axborot-tahlil departamentiga kiritilishi mumkin.