Oʻzbekiston Respublikasi Vazirlar Mahkamasining 13-avgust 2003-yil 350-sonli qarorini bajarish maqsadida qaror qilamiz:

1. Baliq ovlash korxonalarida tabiiy suv havzalaridan foydalanganlik uchun ijara haqini hisoblash va uni undirish tartibi toʻgʻrisidagi Nizom tasdiqlansin,

2. Ushbu qaror Adliya vazirligidan roʻyxatdan oʻtkazilgan kundan boshlab, oʻn kundan soʻng kuchga kiradi.

Ushbu Nizom Oʻzbekiston Respublikasi Vazirlar Mahkamasining 2003-yil 13-avgustdagi “Baliqchilik tarmogʻida monopoliyadan chiqarish va xususiylashtirishni chuqurlashtirish chora-tadbirlari toʻgʻrisida”gi 350-sonli qaroriga asosan ishlab chiqilgan boʻlib, baliq va boshqa suv jonivorlarini ovlash yoki ularni koʻpaytirish uchun foydalanilayotgan yoki foydalanish mumkin boʻlgan barcha tabiiy suv havzalaridan (dengiz, daryolar, suv omborlari, koʻllar va ularga yondosh suv havzalari — koʻl xoʻjaliklari va baliq pitomniklaridan tashqari) olinadigan ijara haqlarining miqdori va uni undirish tartibini belgilaydi.

1. Mazkur Nizomga asosan tabiiy suv havzalari kamida 10 yil muddatga ijaraga berilib, ijaraga olgan baliq ovlash korxonalari suv havzalaridan foydalanganlik uchun ijara haqi toʻlaydilar.

2. Ijara haqi ijara shartnomasi tuzilganda joriy yil uchun belgilanib, keyingi har yil uchun yanvar oyida qaytadan belgilanadi.

3. Ijaraga berilgan tabiiy suv havzalaridan olinadigan ijara haqi miqdori quyidagi tartibda hisoblanadi:

a) ijaraga beriladigan suv havzalarining maydoni aniqlanadi (gektarda);

b) ijaraga beriladigan suv havzasining maydonidan oxirgi 3 yil davomida ovlangan baliq va boshqa suv jonivorlarining miqdori Davlat statistika idoralari maʼlumotlari asosida aniqlanadi;

v) 3 yil davomida tutilgan baliq va suv jonivorlarining miqdori qoʻshilib, oʻrtacha bir yilga toʻgʻri keladigan miqdor aniqlanadi;

g) oʻrtacha bir yilda tutilgan baliq va suv jonivorlarining miqdori ijaraga beriladigan suv havzasining maydoniga boʻlinib, bir gektarga toʻgʻri keladigan miqdor aniqlanadi (kg.da);

d) hisob-kitoblar natijasida bir gektardan olingan mahsulotning miqdori 4,2 kg.dan kam boʻlsa yoki oldin ushbu havzadan olingan mahsulotning miqdori aniq boʻlmasa, u holda bir gektardan ovlanadigan baliq va suv jonivorlarining miqdori Baliqchilikni rivojlantirish ilmiy-tadqiqot markazi xulosasiga asosan aniqlanadi;

e) bir gektardan olinadigan mahsulotning oʻrtacha miqdori eng kam ish haqi miqdorining birinchi ikki yilida 1.5 foiziga, ikkinchi ikki yilda 2 foiziga va keyingi yillarda 3 foiziga teng boʻlgan summaga koʻpaytiriladi. Aniqlangan summa 1 gektar tabiiy suv havzasiga toʻgʻri keladigan ijara haqi hisoblanadi.

4. Agar tanlov gʻolibi bergan arizasida mazkur Nizomning 3-bandiga asosan hisoblangan ijara haqi summasidan koʻproq summani taklif qilgan boʻlsa, shartnomada ijara haqi mazkur taklif qilingan summa miqdorida belgilanadi. Bunda keyingi yillarda eng kam oylik ish haqining belgilangan miqdori oʻzgarsa, ijara haqi miqdori ham tegishlicha oʻzgartirilishi lozim.

5. Eng kam oylik ish haqining miqdori yil davomida oʻzgarsa, joriy yil uchun ijara haqi qayta hisoblanmaydi.

6. Ijara haqi baliq ovlash korxonalari tomonidan yil davomida 2 qismga boʻlib toʻlanadi. Bir qismi (ijara haqining 40 foizidan kam boʻlmagan) yilning 1-apreligacha, qolgan qismi 1-oktabrgacha toʻlab beriladi.

7. Suv havzasi ijaraga berilgan birinchi yilda joriy yil uchun ijara haqi ushbu yilda faoliyat koʻrsatadigan oylar miqdoriga teng ulushlarda quyidagi tartibda belgilanadi:

Ix — ijara haqi;

Yix — yillik ijara haqi;

Tm — joriy yilda faoliyat koʻrsatadigan oylar soni.

8. Ijarachi ijara haqining:

a) 60 foizini tegishli mahalliy budjetlarga, shu jumladan baliqchilik tarmogʻini rivojlantirish tadbirlariga;

b) 25 foizini “Baliqchilikni rivojlantirish ilmiy-tadqiqot markazi huzuridagi Baliqchilikni rivojlantirish jamgʻarmasi”ga;

v) 15 foizini Oʻzbekiston Respublikasi Davlat tabiatni muhofaza qilish qoʻmitasiga yoʻnaltiradi.

9. Ijarachi tomonidan ijara haqining oʻz vaqtida toʻlab borilishi tegishli idoralar tomonidan nazorat qilinadi.

10. Ijarachi ijara haqini belgilangan muddatlarda toʻlab bermasa, toʻlov muddati oʻtkazib yuborilgan har bir kun uchun 0,07 foiz miqdorida, lekin ijara haqining 50 foizidan koʻp boʻlmagan miqdorda penya undiriladi. Penya ijara haqi summasini toʻlashdan ozod qilmaydi.

11. Mazkur Nizom Oʻzbekiston Respublikasi Davlat statistika qoʻmitasi bilan kelishilgan.