Respublika eksport salohiyatini oshirish, eksportchi korxonalarni moliyaviy qo‘llab-quvvatlashni yanada kuchaytirish, tashqi savdo muvozanatini ta’minlash va valyuta tushumlarini ko‘paytirish maqsadida:
1. Eksport bilan bog‘liq savdo va eksportoldi operatsiyalarini moliyalashtirish uchun Tiklanish va taraqqiyot jamg‘armasi Eksportni rag‘batlantirish agentligi talabnomasiga asosan Eksportni qo‘llab-quvvatlash jamg‘armasiga 5 yil muddatga 1 foiz stavkasida 100 million AQSh dollari miqdorida mablag‘larni ajratsin.
Oldingi tahrirga qarang.
Tiklanish va taraqqiyot jamg‘armasi mazkur bandga asosan ajratilgan mablag‘larni 2026-yil 1-yanvardan boshlab 2026-yil 1-iyulga qadar qaytarish sharti bilan “Savdoni rivojlantirish kompaniyasi” aksiyadorlik jamiyatiga qayta rasmiylashtirsin.
(1-band O‘zbekiston O‘zbekiston Respublikasi Prezidentining 2024-yil 14-martdagi PQ-126-son qaroriga asosan ikkinchi xatboshi bilan to‘ldirilgan — Qonunchilik ma’lumotlari milliy bazasi, 15.03.2024-y., 07/24/126/0214-son)
2. Tashqi savdo, investitsiyalar, mahalliy sanoatni rivojlantirish va texnik jihatdan tartibga solish masalalari bo‘yicha Hukumat komissiyasi (S. Umurzakov):
Eksportni qo‘llab-quvvatlash jamg‘armasi hisobidan ajratilayotgan moliyaviy resurslarning o‘z vaqtida va to‘liq qaytarilishini;
2021-yil yakuniga qadar xalqaro moliya institutlari, xorijiy hukumat moliya tashkilotlari, xorijiy banklar va moliya kompaniyalaridan Eksportni qo‘llab-quvvatlash jamg‘armasi va mahalliy tijorat banklariga eksportoldi moliyalashtirish uchun 200 million AQSh dollari miqdoridagi mablag‘lar jalb etilishini ta’minlasin.
3. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Bosh vazirining o‘rinbosari S.U. Umurzakov zimmasiga yuklansin.