Oʻzbekiston Respublikasi Vazirlar Mahkamasining 2001-yil 4-oktabrdagi 400-son qaroriga muvofiq “Oʻrta maxsus, kasb-hunar taʼlimi tizimi rahbarlar tarkibini, pedagog va muhandis-pedagog kadrlarini attestatsiyadan oʻtkazish toʻgʻrisida”gi Nizomni tasdiqlash haqida qaror:

1. “Oʻrta maxsus, kasb-hunar taʼlimi tizimi rahbarlar tarkibini, pedagog va muhandis-pedagog kadrlarini attestatsiyadan oʻtkazish toʻgʻrisida”gi Nizom ilovaga muvofiq tasdiqlansin.

2. Mazkur Nizom barcha oʻrta maxsus, kasb-hunar taʼlimi hududiy boshqarmalari, akademik litsey va kasb-hunar kollejlariga yetkazilsin.

3. Mazkur Nizom Oʻzbekiston Respublikasi Adliya vazirligi tomonidan roʻyxatdan oʻtkazilgan kundan boshlab 10 kun oʻtgandan keyin kuchga kiradi.

Mazkur Nizom Oʻzbekiston Respublikasining “Taʼlim toʻgʻrisida”gi, “Kadrlar tayyorlash milliy dasturi toʻgʻrisida”gi qonunlari, Oʻzbekiston Respublikasi Vazirlar Mahkamasining 1998-yil 11-martdagi 109-son “Davlat test markazi tarkibida Kadrlar tayyorlash sifatini nazorat qilish, pedagog kadrlar va taʼlim muassasalari attestatsiyasi boshqarmasini tashkil etish toʻgʻrisida”gi, 1998-yil 13-maydagi 204-son “Oʻzbekiston Respublikasida oʻrta maxsus, kasb-hunar taʼlimini tashkil etish chora-tadbirlari toʻgʻrisida”gi, 2001-yil 4-oktabrdagi 400-son “Oʻrta maxsus, kasb-hunar taʼlimi muassasalari uchun pedagog kadrlar tayyorlash tizimini takomillashtirish chora-tadbirlari toʻgʻrisida”gi qarorlari asosida ishlab chiqilgan boʻlib, oʻrta maxsus, kasb-hunar taʼlimi tizimidagi akademik litsey va kasb-hunar kollejlari (taʼlim muassasalari)ning rahbar, pedagog va muhandis-pedagog (rahbar va pedagog) kadrlarini attestatsiyadan oʻtkazish tartibini belgilaydi.

Attestatsiya taʼlim muassasalarida oʻquv jarayonlarini takomillashtirishga yoʻnaltirilib, rahbar va pedagog kadrlarning kasbiy salohiyatlarini xolisona baholash, ularni egallab turgan lavozimlariga qoʻyilgan talablarga mosliklarini aniqlash maqsadida oʻtkaziladi.

1. Taʼlim muassasalari rahbarlari va pedagoglari uch yilda bir marta attestatsiyadan oʻtkaziladi.

2. Attestatsiya mazkur Nizom asosida tuziladigan taʼlim muassasalari rahbarlari va pedagoglarini attestatsiyadan oʻtkazish komissiyasi (Attestatsiya komissiyasi) tomonidan oʻtkaziladi.

3. Attestatsiya komissiyalarining faoliyatlarini muvofiqlashtirish va nazorat qilish Oʻzbekiston Respublikasi Vazirlar Mahkamasi huzuridagi Davlat test markazi tarkibidagi Kadrlar tayyorlash sifatini nazorat qilish, pedagog kadrlar va taʼlim muassasalari attestatsiyasi boshqarmasi (Boshqarma) tomonidan amalga oshiriladi.

4. Ishga mehnat shartnomasi asosida yangi qabul qilingan rahbarlar va pedagoglar kamida bir yildan keyin attestatsiyadan oʻtkaziladi.

Homilador ayollar va uch yoshga toʻlmagan bolasi bor ayollar attestatsiyadan oʻtkazilmaydi.

5. Taʼlim muassasalari rahbarlari va pedagoglarini attestatsiyadan oʻtkazish boʻyicha taxminiy test savollari majmui va attestatsiya oʻtkazish grafigi Boshqarma tomonidan ishlab chiqiladi va attestatsiya boshlanishidan bir oy oldin taʼlim muassasalariga yetkaziladi.

6. Attestatsiya komissiyasi 7 kishidan iborat tuziladi va oʻrta maxsus, kasb-hunar taʼlimi hududiy boshqarmasining buyrugʻi bilan tasdiqlanadi. Attestatsiya komissiyasining faoliyati uni aʼzolarining kamida 5 nafari qatnashgan taqdirda vakolatli hisoblanadi.

7. Komissiya raisi Boshqarma ekspertlaridan, kotibi Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazi (Markaz) mutaxassislaridan tayinlanadi.

Attestatsiya komissiyasi tarkibiga Boshqarma ekspertlari, Markaz yoki uning hududiy boshqarmalari, shuningdek kasaba uyushmalarining vakillari kiritiladi.

Markaz boʻysinuvida boʻlmagan taʼlim muassasalarining rahbar va pedagoglarini attestatsiyadan oʻtkazishda attestatsiya komissiyasining tarkibiga tegishli vazirlik yoki idoraning 2 nafar vakillari kiritiladi.

Attestatsiya komissiyasi tarkibiga taʼlim muassasalarining malakali mutaxassislari ham kiritilishi mumkin.

8. Attestatsiya komissiyasi zarur hollarda pedagoglarning tegishli soha va mutaxassisliklari boʻyicha ekspert guruhlarini tuzishi mumkin.

9. Attestatsiya komissiyasiga quyidagi hujjatlar taqdim etiladi:

soʻrovnoma (kadrlarni hisobga olish varaqasi);

mehnat faoliyati haqida tavsifnoma;

maʼlumoti toʻgʻrisidagi hujjatning nusxasi;

attestatsiyalar oraligʻida chop etilgan ilmiy ishlari va oʻquv-metodik qoʻllanmalari roʻyxati (mavjud boʻlsa);

ilmiy daraja, ilmiy unvon va malakasini oshirganligi, toifalari haqidagi hujjatlarning nusxalari (mavjud boʻlsa);

attestatsiya oraligʻidagi faoliyati toʻgʻrisida hisobot (rahbar xodimlar uchun).

Ushbu hujjatlarni attestatsiya komissiyaga rahbar xodimlar boʻyicha oʻrta maxsus, kasb-hunar taʼlimi hududiy boshqarmalari, pedagoglar boʻyicha taʼlim muassasalarining rahbarlari jamlab toshiradilar.

10. Attestatsiya test sinovlari, suhbat yoki yozma ishlar shaklida oʻtkaziladi.

11. Attestatsiya komissiyasi ochiq ovoz berish asosida koʻpchilik ovoz bilan attestatsiyaning yakuniy xulosasini qabul qiladi. Ovozlar teng boʻlgan taqdirda komissiya raisining ovozi hal qiluvchi hisoblanadi.

12. Attestatsiya komissiyasi attestatsiya natijalariga koʻra taʼlim muassasalari rahbarlari va pedagoglarini egallab turgan lavozimiga “loyiq” yoki “noloyiq”ligi haqida xulosa chiqaradi va ushbu xulosani attestatsiya jarayoni tugashi bilan eʼlon qiladi.

13. Attestatsiya komissiyasining xulosasi attestatsiya varaqasiga yozilib, kadrlarning shaxsiy hujjatlar jamlanmasida saqlanadi. Attestatsiya komissiyasi bayonnomasining asl nusxasi Boshqarmada, qolgan nusxalari esa Markaz va uning hududiy boshqarmalarida saqlanadi.

14. Attestatsiyadan oʻtishi lozim boʻlgan taʼlim muassasasining rahbarlari va pedagoglari uzrli sabablarga koʻra attestatsiyaga kelmagan taqdirda, komissiyasining qaroriga binoan boshqa muddatda attestatsiyadan oʻtkaziladi. Attestatsiyaga uzrsiz sababga koʻra kelmagan taʼlim muassasasining rahbarlari va pedagoglari attestatsiyadan oʻtmagan hisoblanadi va egallab turgan lavozimiga “noloyiq” deb topiladi.

15. Markaz, uning hududiy boshqarmalari, tegishli vazirlik va idoralar hamda taʼlim muassasasining rahbarlari attestatsiya komissiyalarining xulosalarini inobatga olishlari lozim.

16. Attestatsiya komissiyasi xulosasidan norozi boʻlgan shaxslar yuqori turuvchi organga yoki sudga shikoyat qilishlari mumkin.