Toshkent issiqlik elektrstansiyasini zamonaviylashtirishga Yaponiya Hukumati tomonidan berilayotgan uzoq muddatli imtiyozli kreditdan samarali foydalanishni taʼminlash maqsadida Vazirlar Mahkamasi qaror qiladi:

1. Yaponiya xalqaro hamkorlik banki 24 955 mln Yaponiya yeni miqdorida imtiyozli kredit berayotgani, shundan:

24 344 mln Yaponiya yeni 1,8 yillik foiz bilan 30 yil muddatga, shu jumladan oʻn yil imtiyozli davrdan iborat muddatga Toshkent issiqlik elektrstansiyasini zamonaviylashtirish loyihasi boʻyicha injiringga, asbob-uskunalar, materiallar yetkazib berishga va qurilish ishlarini amalga oshirishga;

611 mln Yaponiya yeni 0,75 yillik foiz bilan 40 yil muddatga, shu jumladan oʻn yil imtiyozli davrdan iborat muddatga mazkur loyiha boʻyicha konsultatsiya xizmatlari koʻrsatishga berilayotgani maʼlumot uchun qabul qilinsin.

2. Belgilab qoʻyilsinki:

loyiha qiymatining 85 foizini mablagʻ bilan taʼminlash Yaponiya xalqaro hamkorlik bankining imtiyozli krediti hisobiga amalga oshiriladi;

Oʻzbekiston Respublikasi Tashqi iqtisodiy faoliyat milliy banki kreditga xizmat koʻrsatish boʻyicha moliyaviy agent hisoblanadi;

loyiha qiymatining 15 foizi “Oʻzbekenergo” davlat-aksiyadorlik kompaniyasining oʻz mablagʻlari hisobiga mablagʻ bilan taʼminlanadi;

Oʻzbekiston Respublikasi Moliya vazirligi Yaponiya xalqaro hamkorlik banki krediti boʻyicha Oʻzbekiston Respublikasi Hukumati nomidan qarz oluvchi hisoblanadi;

“Oʻzbekenergo” davlat-aksiyadorlik kompaniyasi loyihani amalga oshirish boʻyicha ijro etuvchi agentlik hisoblanadi;

kredit boʻyicha asosiy qarzni uzish, foizlarni va komissiya toʻlovlarini toʻlash bilan bogʻliq xarajatlar “Oʻzbekenergo” davlat-aksiyadorlik kompaniyasining oʻz mablagʻlari hisobiga 1 va 2-ilovalarga* muvofiq amalga oshiriladi.

3. Quyidagilar:

Oʻzbekiston Respublikasi Bosh vazirining oʻrinbosari R.S.Azimov Almashuv Notasini va Yaponiya Hukumatining imtiyozli kreditini olish bilan bogʻliq hujjatlarni Oʻzbekiston Respublikasi Hukumati nomidan imzolashga;

Oʻzbekiston Respublikasi Moliya vaziri Yaponiya xalqaro hamkorlik bankining imtiyozli kreditini olish boʻyicha kredit bitimini Oʻzbekiston Respublikasi Hukumati nomidan imzolashga vakil qilinsin.

4. Oʻzbekiston Respublikasi Tashqi iqtisodiy faoliyat milliy banki Yaponiya xalqaro hamkorlik banki bilan banklararo bitimni, shuningdek Oʻzbekiston Respublikasi Moliya vazirligi va “Oʻzbekenergo” davlat-aksiyadorlik kompaniyasi bilan Yaponiya Hukumati tomonidan berilayotgan imtiyozli kreditdan foydalanish va uni qaytarish tartibi boʻyicha agentlik bitimini tuzsin.

5. Oʻzbekiston Respublikasi Adliya vazirligi Oʻzbekiston Respublikasi Moliya vazirligi va Yaponiya xalqaro hamkorlik banki oʻrtasidagi kredit bitimi yuzasidan belgilangan tartibda yuridik xulosa bersin.

6. Yaponiyaning “Mitsubisi Korporeyshn” firmasi tomonidan Toshkent issiqlik elektrstansiyasini zamonaviylashtirish loyihasining texnik-iqtisodiy asoslashi ishlab chiqilgani va u Oʻzbekiston Respublikasining vakolatli organlarida dastlabki ekspertizadan oʻtganligi maʼlumot uchun qabul qilinsin.

“Oʻzbekenergo” davlat-aksiyadorlik kompaniyasi ikki oy muddatda Toshkent issiqlik elektrstansiyasini zamonaviylashtirish loyihasining texnik-iqtisodiy asoslashini puxta ishlab chiqishni va Oʻzbekiston Respublikasining vakolatli organlarida kelishib olishni amalga oshirsin hamda tasdiqlash uchun Vazirlar Mahkamasiga kiritsin.

7. Toshkent issiqlik elektrstansiyasini zamonaviylashtirishga Yaponiya Hukumati tomonidan Yaponiya xalqaro hamkorlik banki orqali berilayotgan kreditdan toʻliq, maqsadli va samarali foydalanish yuzasidan masʼuliyat “Oʻzbekenergo” davlat-aksiyadorlik kompaniyasiga yuklansin.

8. Oʻzbekiston Respublikasi Tashqi ishlar vazirligi “Oʻzbekenergo” davlat-aksiyadorlik kompaniyasining buyurtmanomalariga binoan, loyihani amalga oshirishda qatnashuvchi xorijiy mutaxassislarga konsullik yigʻimlari undirilmasdan kelish vizalari berishni taʼminlasin.

9. Oʻzbekiston Respublikasi Ichki ishlar vazirligi “Oʻzbekenergo” davlat-aksiyadorlik kompaniyasining buyurtmanomalariga binoan, loyihani amalga oshirishda qatnashuvchi xorijiy mutaxassislarga davlat boji undirilmasdan koʻp martalik vizalar berilishini, shuningdek ularning vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini taʼminlasin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari V.Yu.Atayev va R.S.Azimov zimmasiga yuklansin.