Tabiiy gaz yetkazib berishning alohida tartibi belgilangan strategik tashkilotlarga yetkazib berilayotgan tabiiy gaz uchun oʻzaro hisob-kitoblarni tartibga solish hamda ularning moliyaviy ahvolini barqaror saqlash maqsadida Vazirlar Mahkamasi qaror qiladi:

1. Oʻzbekiston Respublikasi Energetika vazirligi, “Issiqlik elektr stansiyalari” AJ, “Oʻztransgaz” AJ va “Oʻzkimyosanoat” AJning tabiiy gaz yetkazib berishning alohida tartibi belgilangan strategik tashkilotlarga “Oʻztransgaz” AJ tomonidan shartnomadagi hajmlardan ortiqcha yetkazib berilgan tabiiy gaz qiymatiga 1,4 koeffitsiyent bilan oshirilgan toʻlov undirilishi tartibini bekor qilish toʻgʻrisidagi taklifi maʼqullansin.

2. “Oʻztransgaz” AJ ushbu qaror qabul qilinguniga qadar “Issiqlik elektr stansiyalari” AJ va “Oʻzkimyosanoat” AJ tizimidagi tashkilotlarga shartnomadagi hajmlardan ortiqcha yetkazib berilgan tabiiy gaz qiymatini 1,4 koeffitsiyent qoʻllanmagan holda qayta hisoblab chiqsin.

3. Vazirlar Mahkamasining 2018-yil 12-yanvardagi 22-son qarori bilan tasdiqlangan Tabiiy gazdan foydalanish qoidalarining 105-bandi quyidagi tahrirda bayon etilsin:

“105. Isteʼmolchi tomonidan tabiiy gaz yetkazib berish uchun tuzilgan shartnomada belgilanganidan koʻp hajmda va gaz taʼminoti tashkiloti bilan oldindan kelishilmasdan gaz olingan taqdirda, isteʼmolchidan (ushbu qoidalarga ilovada koʻrsatilgan tabiiy gaz yetkazib berishning alohida tartibi belgilanadigan strategik tashkilotlar bundan mustasno) shartnomadagi hajmlardan ortiqcha olingan tabiiy gaz qiymatiga nisbatan 1,4 koeffitsiyent bilan oshirilgan toʻlov undiriladi. Vujudga kelgan qarzdorlik uchun toʻlov oʻz vaqtida amalga oshirilmagan taqdirda:

ushbu qoidalarga ilovada koʻrsatilgan tabiiy gaz yetkazib berishning alohida tartibi belgilanadigan strategik tashkilotlar gaz taʼminoti tashkilotiga toʻlov muddati oʻtgan har bir kun uchun toʻlov muddati oʻtgan summaning 0,1 foizi miqdorida, lekin muddati oʻtgan summasining 50 foizidan koʻp boʻlmagan miqdorda;

qolgan isteʼmolchilar gaz taʼminoti tashkilotiga qonunchilik hujjatlarida belgilangan miqdorda penya toʻlaydi”.

4. Mazkur qarorning bajarilishini nazorat qilish Oʻzbekiston Respublikasi Bosh vazirining maslahatchisi — Geologiya, energetika, sanoat va uning bazaviy tarmoqlarini rivojlantirish masalalari departamenti boshligʻi va Oʻzbekiston Respublikasi energetika vaziri A.S. Sultanov zammasiga yuklansin.