Oʻzbekiston Respublikasining “Yoʻl harakati xavfsizligi toʻgʻrisida” va “Taʼlim toʻgʻrisida”gi qonunlariga hamda Oʻzbekiston Respublikasi Prezidentining “Davlat xizmatlari koʻrsatish milliy tizimini yanada kompleks rivojlantirish choralari haqida” 2019-yil 15-fevraldagi PQ-4193-son qaroriga muvofiq Vazirlar Mahkamasi qaror qiladi:

1. “Yoʻl harakati xavfsizligi toʻgʻrisida”gi Oʻzbekiston Respublikasi Qonuniga muvofiq faoliyati transport vositalaridan foydalanish bilan bogʻliq boʻlgan yuridik shaxslarning yoʻl harakati xavfsizligi xizmati xodimlari Oʻzbekiston Respublikasi Transport vazirligi tomonidan tasdiqlangan maxsus dasturlar boʻyicha vaqti-vaqti bilan, har uch yilda kamida bir marta oʻz malakasini oshirib, malaka imtihoni topshirishi kerakligi belgilanganligi maʼlumot uchun qabul qilinsin.

2. Shunday tartib belgilansinki, unga muvofiq:

yoʻlovchilar va yuklarni avtomobil transportida tashish faoliyati bilan shugʻullanuvchi yuridik shaxslarning tashish xavfsizligini taʼminlash boʻyicha masʼul rahbari, rahbar oʻrinbosari, transport boʻlimi rahbari va (yoki) harakat xavfsizligi mutaxassislariga (keyingi oʻrinlarda — xodimlar) nisbatan litsenziyalar olish uchun hujjatlar taqdim etish va avtomobil transportida tegishli tashishlarni amalga oshirish uchun har besh yilda attestatsiyadan oʻtish talablari bekor qilinadi;

yoʻlovchilar va yuklarni avtomobil transportida tashish faoliyati bilan shugʻullanuvchi yuridik shaxslar xodimlarining bilimi, malaka darajasi va kasbiy mahorati malaka talablariga muvofiqligi Transport vazirligi tomonidan tasdiqlangan maxsus dastur boʻyicha ushbu xodimlarning kamida har uch yilda bir marta oʻz malakasini oshirganligi toʻgʻrisida berilgan malaka sertifikatiga muvofiq aniqlanadi;

yoʻlovchi va yuklarni avtomobil transportida tashish ushbu sohada kamida uch yil ish stajiga, avtomobil yoki texnik yoʻnalishda oliy kasbiy maʼlumotga va malaka sertifikatiga ega xodimi mavjud boʻlgan yuridik shaxslar tomonidan amalga oshiriladi;

avtomobil yoki texnik yoʻnalishda oliy kasbiy maʼlumotga ega boʻlish sharti maxsus uskuna bilan jihozlangan avtotransport vositasida qattiq va suyuq maishiy chiqindilarni (axlat) tashish va kommunal xizmatlar koʻrsatish bilan shugʻullanadigan yuridik shaxslarning xodimlariga nisbatan tatbiq etilmaydi.

3. Quyidagilar:

Avtomobil transporti sohasida kadrlar malakasini oshirish kurslarini tugatganlik haqidagi sertifikat hamda Avtomobilda xalqaro tashuvchining kasbiy mahorat sertifikati namunalari va tavsiflari 1 va 1a-ilovalarga muvofiq;

Avtomobil transporti sohasida kadrlarni qayta tayyorlash haqidagi diplom namunasi va tavsifi 2-ilovaga muvofiq tasdiqlansin.

Belgilansinki, Oʻzbekiston Respublikasining avtomobilda xalqaro tashishlarni tartibga soluvchi xalqaro shartnomalarida nazarda tutilgan boshqa kasbiy mahorat sertifikatlari (guvohnomalari)ning berilishi ushbu shartnomalar qoidalariga muvofiq amalga oshiriladi.

4. Oʻzbekiston Respublikasi Transport vazirligi uch oy muddatda:

avtomobil transporti sohasida kadrlar malakasini oshirish va qayta tayyorlash davlat taʼlim talablarini ishlab chiqish hamda taʼlim oluvchilarning bilim, malaka va koʻnikmalarini baholash tartibini belgilash;

avtomobil transporti sohasida kadrlar malakasini oshirish va ularni qayta tayyorlash boʻyicha oʻquv kurslarining yoʻnalishlari, mavzulari, davomiyligi, shuningdek kurslarda oʻqitiladigan kadrlar toifalari roʻyxatini lavozimlar, kasblar va mutaxassisliklar kesimida shakllantirish;

avtomobil transporti sohasida kadrlar malakasini oshirish va qayta tayyorlash oʻquv rejasi va dasturlarini ishlab chiqish va tasdiqlash;

taʼlim muassasalarida malaka oshirish kursi bitiruvchilariga elektron sertifikatlar berish amaliyotini joriy etish maqsadida identifikatsiya raqami va QR-kod hamda himoya elementlarini nazarda tutuvchi “Elektron sertifikatlar repozitoriysi” tizimi va dasturiy taʼminotini yaratish choralarini amalga oshirsin.

5. Vazirlar Mahkamasining 2019-yil 31-iyuldagi 636-son qarori bilan tasdiqlangan Avtomobil transportida yoʻlovchilarni va yuklarni shaharda, shahar atrofida, shaharlararo va xalqaro yoʻnalishlar boʻyicha tashish faoliyatini litsenziyalash yuzasidan davlat xizmatlari koʻrsatishning maʼmuriy reglamentiga 3-ilovaga muvofiq oʻzgartirishlar kiritilsin.

6. Oʻzbekiston Respublikasi Transport vazirligi manfaatdor vazirliklar va idoralar bilan birgalikda:

mazkur qarorning mazmuni va mohiyati toʻgʻrisida tashuvchilar oʻrtasida muntazam ravishda targʻibot ishlarini olib borsin;

oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

7. Ushbu qaror rasman eʼlon qilingan kundan boshlab uch oy oʻtgandan keyin kuchga kiradi.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi transport vaziri I.R. Maxkamov zimmasiga yuklansin.

Avtomobil transporti sohasida kadrlar malakasini oshirish kurslarini tugatganlik haqida sertifikat — malaka oshirish taʼlim dasturlarini muvaffaqiyatli tugatgan (oʻzlashtirgan) shaxslarga beriladi.

Avtomobil transporti sohasida kadrlar malakasini oshirish kurslarini tugatganlik toʻgʻrisidagi SERTIFIKAT A5 formatdagi oq qogʻozda, ofset usulida, besh xil rangdan: matn uchun — qora rang, rasmlar tasviri uchun — yashil, koʻk va qizil ranglardan, fon uchun — och pushti rangdan foydalangan holda bosib chiqariladi.

Varaqning chap yuqori qismida Oʻzbekiston Respublikasi Davlat gerbi tasviri va davlat tilida lotin yozuvida quyidagilar joylashtiriladi:

20 — 35 mm diametrda OʼZBEKISTON RESPUBLIKASI GERBI tasviri

OʼZBEKISTON RESPUBLIKASI TRANPORT VAZIRLIGI.

Malaka oshirganlik‎ haqida

SERTIFIKAT

MO № 000000

Qayd raqami: ____________

Berilgan joy: ____________

Berilgan sana: 20__ yil “___” _________

*Amal qilish muddati: 20__ yil “___” _________ gacha

QR-kod joyi

Sertifikatning oʻng qismida davlat tilida lotin yozuvida quyidagilar joylashtiriladi:

taʼlim oluvchining familiyasi, ismi, otasining ismi;

oʻqish davri;

malaka oshirish kursining nomi va umumiy soati;

taʼlim muassasasi (tashkilot) rahbarining imzosi va familiyasi, ismi, otasining;

muhr oʻrni.

Sertifikat:

tartib raqami ikkita lotin harfidan “MO” va olti raqamli sondan iborat boʻlishi;

barcha matn va tasvirlar naqshli rastrdan iborat och-pushti rang fonda joylashtirilishi;

takrorlanmaydigan raqamlardan, oltita himoyaga ega va ketma-ket oʻzgaruvchi raqamlardan iborat boʻlishi;

yuqori sifatli maxsus himoyalangan ofset qogʻozda chop etilishi;

yorugʻlik vositasida nusxa koʻchirilishini murakkablashtirish uchun boʻyoqning ochiq ranglaridan iborat boʻlishi;

turli ranglarni hosil qilish uchun turli rangdagi rastr toʻrlaridan foydalanish yoʻli bilan himoyaga ega maxsus qogʻozdan tayyorlanishi lozim.

Sertifikatning elektron shakli hisobga olish seriyasi, QR-kodi va tartib raqamiga ega boʻladi.

QR-kod sertifikat chap qismniing oʻng tomoniga joylashtiriladi.

Mazkur sertifikat qogʻoz yoki elektron shaklda berilishi mumkin.

Avtomobilda xalqaro tashuvchining kasbiy mahorat sertifikati — avtomobil transportida xalqaro tashuvlarni tashkil etish boʻyicha taʼlim dasturlarini muvaffaqiyatli tamomlagan (oʻzlashtirgan) mutaxassislar, haydovchi va yakka tartibdagi tadbirkorlik subyektlariga beriladi.

Sertifikatning old qismi chap tomonida Oʻzbekiston Respublikasi Davlat gerbi tasviri va quyidagilar joylashtiriladi:

oʻzbek, rus va ingliz tillarida “Oʻzbekiston Respublikasi” soʻzlari;

oʻquv muassasasining (tashkilot) nomi;

oʻzbek, rus va ingliz tillarida “Avtomobilda xalqaro tashuvchining kasbiy mahorat SERTIFIKATI (KMS)” soʻzlari;

oʻzbek, rus va ingliz tillarida shahar nomi.

Varaqning orqa tomoni chap qismida rus tilida quyidagilar koʻrsatiladi:

Sertifikat;

xalqaro avtomobilda tashuvchining kasbiy mahorati haqida;

Berildi (Familiyasi, ismi, otasining ismi)

tugʻilgan sanasi __________________________________________

kasbiy mahorat uchun malaka imtihonini (yil:______, oy, kun:_____) topshirdi va _______________________________________ sifatida kasbiy faoliyat uchun malakali deb topildi.

dastur nomi;

berilgan sana;

amal qilish muddati;

Raqamlash uchun, sertifikat ikkita kirill harflaridan “MP” va oltita sonli tartib raqamlardan iborat boʻladi;

Oʻquv muassasasi (tashkiloti) rahbarining imzosi, familiyasi, ismi, otasining ismi;

muhr oʻrni;

berilgan joy.

QR-kod joyi

Varaqning ichki oʻng tomonida chap tomonida rus tilidagi matn ingliz tilida hamda varaqning oldi oʻng tomonida oʻzbek tilida toʻliq joylashtiriladi.

Sertifikat:

takrorlanmaydigan raqamlardan, olti karralik himoyaga ega va ketma-ket oʻzgaruvchi raqamlardan iborat boʻlishi;

maxsus himoyalangan yuqori sifatli ofset qogʻozda chop etilishi;

ofset usulida, matn uchun — koʻk rang A5 formatdagi oq qogʻozda chop etilishi;

yorugʻlik yordamida nusxa koʻchirishni murakkablashtirish uchun boʻyoqning ochiq ranglaridan iborat boʻlishi;

naqshli rastr;

turli ranglarni yaratish uchun har xil rangli rastr toʻrlaridan foydalanish yoʻli bilan himoyaga ega maxsus qogʻozdan tayyorlanishi lozim.

Sertifikatning elektron shakli hisobga olish seriyasi, QR-kodi va tartib raqamiga ega boʻladi.

QR-kod sertifikat chap qismining oʻng tomoniga joylashtiriladi.

Mazkur sertifikat bosma qogʻoz yoki elektron shaklda berilishi mumkin.

Avtomobil transporti sohasida kadrlarni qayta tayyorlash haqidagi davlat namunasidagi diplom A5 formatdagi oq qogʻozda, ofset usulida, besh xil rangdan: matn uchun — qora rang, rasmlar tasviri uchun — yashil, koʻk va qizil ranglardan, fon uchun — och pushti rangdan foydalangan holda bosib chiqariladi.

Varaqning chap yuqori qismida Oʻzbekiston Respublikasi Davlat gerbi tasviri va davlat tilida lotin yozuvi bilan quyidagilar joylashtiriladi:

O'ZBEKISTON RESPUBLIKASI GERBI

O'ZBEKISTON RESPUBLIKASI

TRANSPORT VAZIRLIGI.

Qayta tayyorlash haqida

DIPLOM

QT № 000000

Qayd raqami: ____________

Berilgan joy: ____________

Berilgan sana: 20__ yil “___” _________

QR-kod joyi

Diplomning oʻng qismida davlat tilida lotin yozuvi bilan quyidagilar koʻrsatiladi:

taʼlim oluvchining familiyasi, ismi, otasining ismi;

oʻqish davri;

taʼlim muassasasi (tashkilot) nomi;

qayta tayyorlash kursining nomi va umumiy soati;

Davlat attestatsiya komissiyasi qarorining sanasi va raqami;

taʼlim muassasasi (tashkilot) rahbari imzosi va familiyasi, ismi, otasining ismi;

muhr oʻrni.

Diplom:

tartib raqami ikkita lotin harfidan “QT” va olti raqamli sondan iborat boʻlishi;

barcha matn va tasvirlar naqshli rastrdan iborat och-pushti rang fonda aks ettirilishi;

takrorlanmaydigan raqamlardan, oltita himoyaga ega va ketma-ket oʻzgaruvchi raqamlardan iborat boʻlishi;

yuqori sifatli maxsus himoyalangan ofset qogʻozda chop etilishi;

yorugʻlik vositasida naqshli rastr nusxasi koʻchirilishini murakkablashtirish uchun boʻyoq ochiq ranglardan iborat boʻlishi;

turli ranglarni hosil qilish uchun turli rangdagi rastr toʻrlaridan foydalanish yoʻli bilan himoyaga ega maxsus qogʻozlardan tayyorlanishi lozim.

Diplomning elektron shakli hisobga olish seriyasi, QR-kodi va tartib raqamiga ega boʻladi.

QR-kod diplomning chap qismi oʻng tomoniga joylashtiriladi.

Mazkur diplom bosma qogʻoz yoki elektron shaklda berilishi mumkin.

1. 11-bandining “b” kichik bandida “attestatsiyadan” soʻzi “transport vazirligi tomonidan tasdiqlangan maxsus dasturlar boʻyicha malakasini oshirib, malaka imtihonidan” soʻzlari bilan almashtirilsin.

2. 37-bandining ikkinchi xatboshisida “attestatsiyadan” soʻzi “Transport vazirligi tomonidan tasdiqlangan maxsus dastur boʻyicha malaka oshirgan va malaka imtihonidan” soʻzlari bilan almashtirilsin.

3. 4-ilovadagi “attestatsiyadan” soʻzi “Transport vazirligi tomonidan tasdiqlangan maxsus dastur boʻyicha malaka oshirgan va malaka imtihonidan” soʻzlari bilan almashtirilsin.