Sirdaryo viloyatidagi “Sardoba suv ombori” toʻgʻonida yuzaga kelgan texnogen holat oqibatida talafot koʻrgan aholining uy-joylarini taʼmirlash, yangi uy joylar qurish hamda obodonlashtirish ishlari qisqa muddatda sifatli yakunlanib, hududlarda keng koʻlamli bunyodkorlik ishlari amalga oshirilgan.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan 1 830 ta beton-panelli uyda qurilish-taʼmirlash ishlari bajarilgan.

Sardoba tumani “Doʻstlik” mahallasi hamda Mirzaobod tumani “Navbahor” va “Yangi Oʻzbekiston” mahallalarida 86 ta 2 640 xonadonli uy barpo etilgan.

Ijtimoiy soha muassasalaridan 34 tasida qurilish-taʼmirlash ishlari amalga oshirilib, har bir tumanda 1 tadan yangi umumtaʼlim maktabi va maktabgacha taʼlim tashkiloti qurilgan.

Talafot koʻrgan mahallalar va yangi qurilgan uy-joy massivlari tabiiy gaz hamda elektr energiyasi bilan taʼminlangan, ichimlik va oqova suv tarmoqlari qurilib, ichki xoʻjalik yoʻllari taʼmirlangan.

Sardoba, Oqoltin, Mirzaobod tumanlarida yaroqsiz ahvolga kelib qolgan 98,6 kilometrlik irrigatsiya va melioratsiya obyektlari tiklanib, qishloq xoʻjaligi ekin maydonlari hamda aholi tomorqalari qisman suv bilan taʼminlangan.

Shu bilan birga, oʻz yechimini kutayotgan ayrim masalalar mavjud.

Xususan, Sardoba, Oqoltin va Mirzaobod tumanlarida ishchi guruhlar tomonidan baliqchilik, chorvachilik, parrandachilik yoʻnalishidagi tadbirkorlik subyektlariga favqulodda hodisa oqibatida yetkazilgan zarar miqdorini hisoblash va qoplash choralarini koʻrish hamda irrigatsiya va melioratsiya tarmoqlari boʻyicha qurilish-taʼmirlash ishlarini qisqa muddatda yakunlash talab etiladi.

Oʻzbekiston Respublikasi Prezidentining “Sirdaryo viloyatida joylashgan “Sardoba suv ombori” toʻgʻonida yuzaga kelgan favqulodda hodisa oqibatlarini bartaraf etish boʻyicha kechiktirib boʻlmaydigan chora-tadbirlar toʻgʻrisida”gi 2020-yil 1-maydagi F-5569-sonli farmoyishini, Sirdaryo viloyatidagi “Sardoba suv ombori” toʻgʻonidan suv toshishi oqibatlarini bartaraf etish va hodisa sabablarini oʻrganish boʻyicha Hukumat komissiyasining 2021-yil 27-apreldagi 01-05/1-1084-sonli sayyor yigʻilishi bayonida belgilangan tadbirlarni inobatga olib, “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 9 va 16-moddalariga muvofiq Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi hukumat komissiyasining 2021-yil 27-apreldagi 01-05/1-1084-son sayyor yigʻilishi bayoni maʼlumot uchun qabul qilinsin.

2. Oʻzbekiston Respublikasi Moliya vazirligi:

Sardoba, Oqoltin va Mirzaobod tumanlarida zarar koʻrgan baliqchilik, chorvachilik va parrandachilik yoʻnalishida faoliyat olib borayotgan tadbirkorlik subyektlari (fermer xoʻjaliklari) tomonidan koʻrilgan zararlarni qoplash hamda irrigatsiya va melioratsiya obyektlarida amalga oshirilayotgan qurilish-taʼmirlash ishlarini qisqa muddatda yakunlash uchun talab etiladigan mablagʻlarni Oʻzbekiston Respublikasi respublika budjetidan bosqichma-bosqich ajratish;

Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi hamda Davlat soliq qoʻmitasi bilan birgalikda Sardoba, Oqoltin va Mirzaobod tumanlarida favqulodda hodisa oqibatida zarar koʻrgan baliqchilik, chorvachilik va parrandachilik xoʻjaliklarini 2020-yil 1-maydan 2022-yil 1-noyabrga qadar barcha soliq toʻlovlaridan ozod qilish yuzasidan joriy yil 1-iyulga qadar tegishli normativ-huquqiy hujjat loyihasini Vazirlar Mahkamasiga kiritish;

ikki oy muddatda “2021-yil uchun Davlat budjeti toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish boʻyicha Vazirlar Mahkamasiga takliflar taqdim etish choralarini koʻrsin.

3. Oʻzbekiston Respublikasi Markaziy banki tijorat banklari bilan birgalikda Sirdaryo viloyati hokimligi, Qishloq xoʻjaligi vazirligi, Veterinariya va chorvachilikni rivojlantirish davlat qoʻmitasi hamda “Oʻzbekbaliqsanoat” uyushmasi maʼlumotlari asosida zarar koʻrgan baliqchilik, chorvachilik va parrandachilik xoʻjaliklarini moliyaviy inqirozdan chiqarish maqsadida ushbu xoʻjaliklarga tijorat banklari tomonidan ajratilgan kreditlar boʻyicha asosiy qarz hamda hisoblangan foizlar toʻlanishini 2020-yil 1-maydan vaqtincha toʻxtatib turish masalasini oʻrganib, takliflar ishlab chiqsin.

4. Sirdaryo viloyati hokimligi:

Sardoba, Oqoltin va Mirzaobod tumanlarida zarar koʻrgan baliqchilik, chorvachilik hamda parrandachilik yoʻnalishida faoliyat olib borayotgan tadbirkorlik subyektlari (fermer xoʻjaliklari) tomonidan koʻrilgan zararlarni qoplash hamda irrigatsiya va melioratsiya obyektlarida amalga oshirilayotgan qurilish-taʼmirlash ishlari uchun budjet mablagʻlarini ajratish masalasini muhokama qilib tegishli qaror qabul qilish uchun xalq deputatlari viloyat Kengashiga kiritsin.

Bunda:

respublika budjetidan mazkur tadbirlarga ajratilgan mablagʻlarning manzilli va maqsadli sarflanishi ustidan masʼul tashkilot, idoralar rahbarlari javobgarligi belgilansin hamda ushbu mablagʻlarni xalq deputatlari viloyat Kengashi qaroriga binoan qonunchilik talablariga muvofiq yoʻnaltirsin;

respublika budjetidan ajratilgan mablagʻlarning sarflanishi yuzasidan har chorak yakuni bilan xalq deputatlari viloyat Kengashiga, Senatga hamda Hukumat komissiyasiga hisobot taqdim etib borsin;

bir oy muddatda Sardoba, Oqoltin va Mirzaobod tumanlarida zarar koʻrgan tadbirkorlik subyektlarining murojaatlarini tegishli mutaxassislar bilan toʻliq va xolisona koʻrib chiqib, tahlil qilgan holda ular tomonidan koʻrilgan zararni qoplash yuzasidan tasdiqlovchi hujjatlarni Hukumat komissiyasiga taqdim etsin.

5. Ushbu Qarorning ijrosini nazorat qilish Oʻzbekiston Respublikasi Oliy Majlisi Senatining Budjet va iqtisodiy islohotlar masalalari qoʻmitasi (E. Gadoyev) zimmasiga yuklansin.

6. Ushbu Qaror qabul qilingan kundan eʼtiboran kuchga kiradi.