Gazetalar, jurnallar, axborotnomalar, byulletenlar, axborot agentliklari, televideniye (kabelli, efir-kabelli televideniye) va radioeshittirishlar, hujjatli kino, elektron axborot tizimi, shuningdek, doimiy nomga ega boʻlgan, davlat tasarrufidagi, mustaqil va boshqa ommaviy davriy nashrlar ommaviy axborot vositalaridir.

Ommaviy axborot vositalari qonun hujjatlarida belgilangan tartibda ilovalar nashr etishi mumkin.

Oʻzbekiston Respublikasida ommaviy axborot vositalari erkin boʻlib, ular Oʻzbekiston Respublikasi Konstitutsiyasiga, ushbu Qonunga va boshqa qonun hujjatlariga muvofiq faoliyat koʻrsatadi.

Ommaviy axborot vositalari axborotni izlash, olish va tarqatish huquqidan foydalanadilar hamda oʻzlari eʼlon qilayotgan axborotning toʻgʻriligi va haqqoniyligi uchun qonun hujjatlarida belgilangan tartibda javobgar boʻladilar.

Har kim ommaviy axborot vositalarida chiqish, oʻz fikri va eʼtiqodini oshkora bayon etish huquqiga egadir.

Oʻzbekiston Respublikasida ommaviy axborot vositalarini senzura qilishga yoʻl qoʻyilmaydi. Eʼlon qilinayotgan xabarlar yoki materiallar oldindan kelishib olinishini, shuningdek, ularning matni oʻzgartirilishini yoki butunlay nashrdan olib qolinishini (efirga berilmasligini) talab qilishga hech kimning haqqi yoʻq.

Oʻzbekiston Respublikasida ommaviy axborot vositalari oʻz faoliyatini Davlat tili haqidagi Qonunga muvofiq amalga oshiradi.

Ommaviy axborot vositalaridan Oʻzbekiston Respublikasining mavjud konstitutsiyaviy tuzumini, hududiy yaxlitligini zoʻrlik bilan oʻzgartirishga daʼvat qilish, urush va zoʻravonlikni, shafqatsizlikni, milliy, irqiy va diniy adovatni targʻib etish, davlat sirini yoki qonun bilan qoʻriqlanadigan oʻzga sirni oshkor etish, jinoiy javobgarlikka sabab boʻladigan boshqa xatti-harakatlarni sodir qilish maqsadida foydalanilishiga yoʻl qoʻyilmaydi.

Ommaviy axborot vositalari orqali fuqarolarning shaʼni va qadr-qimmatini tahqirlash, ularning shaxsiy hayotiga aralashish taqiqlanadi.

Prokuror, tergovchi yoki surishtiruvchining yozma ruxsatisiz dastlabki tergov materiallarini eʼlon qilish, muayyan ish boʻyicha sud qarori chiqmasdan turib yoki sudning hal qiluv qarori yoxud hukmi qonuniy kuchga kirmay turib, uning natijalarini taxmin qilish yoki sudga oʻzgacha yoʻl bilan taʼsir koʻrsatish, nomini koʻrsatmaslik sharti bilan maʼlumot bergan shaxsning nomini oshkor qilish (sud oshkor etishni talab qiladigan hollar bundan mustasno) taqiqlanadi.

Ommaviy axborot vositasining tahririyati muassis tomonidan tuziladi hamda ushbu Qonun, boshqa qonun hujjatlari, oʻz ustavi (nizomi) asosida ish olib boradi.

Tahririyat xodimi deganda tahririyat shtatida turuvchi va materiallar toʻplash, ularni tahlil hamda tahrir qilish, tayyorlash bilan shugʻullanuvchi shaxs tushuniladi.

Tahririyat xodimi murojaatlardan yoki boshqa manbalardan oʻziga maʼlum boʻlgan yoxud oʻzi guvoh boʻlgan muayyan voqea, holat yuzasidan jurnalistik tekshiruv oʻtkazishga, faktlarni, guvohlik koʻrsatmalarini toʻplashda audio va video texnikadan foydalanishga haqli. Jurnalistik tekshiruv tergov va sud jarayoniga taʼsir oʻtkazmasligi kerak.

Tahririyat xodimi muayyan voqea yoki holatga nisbatan shaxsiy fikrini ommaviy axborot vositalarida eʼlon qilishga, agar voqea yoki holat yuzasidan tergov tugamagan boʻlsa, sudning hal qiluv qarori yoki hukmi qonuniy kuchga kirganidan soʻng jurnalistik taxminlarini shaxsiy mulohaza tarzida eʼlon qilishga haqlidir.

Ommaviy axborot vositasi xabar, maʼlumot, fakt yoki dalillar taqdim etgan manbaning yoki taxallusini qoʻygan muallifning nomini ularning yozma roziligisiz oshkor etishga haqli emas.

Ommaviy axborot vositasi axborot manbaining yoki taxallusini qoʻygan muallifning iltimosiga binoan sudda uning nomidan ishtirok etishi mumkin.

Oʻzbekiston Respublikasining yuridik va jismoniy shaxslari ommaviy axborot vositalarini taʼsis etish huquqiga egadirlar.

Ommaviy axborot vositasi bir necha muassis tomonidan ham taʼsis etilishi mumkin.

Tahririyat roʻyxatdan oʻtkazilganlik toʻgʻrisida guvohnoma olinganidan keyin faoliyat boshlashi mumkin.

Ommaviy axborot vositalarini roʻyxatga olish toʻgʻrisidagi ariza Oʻzbekiston Respublikasi Hukumati vakolat bergan davlat organiga belgilangan tartibda muassis tomonidan topshiriladi.

Roʻyxatga olish toʻgʻrisidagi ariza topshirilgan kundan boshlab bir oy muddat ichida koʻrib chiqilishi shart.

Ommaviy axborot vositasini chiqarishga kirishish huquqi guvohnoma olingan kundan boshlab uch oy davomida saqlanib turadi. Belgilangan muddat ichida ommaviy axborot vositasining birorta ham soni (dasturi) eʼlon qilinmagan taqdirda roʻyxatdan oʻtkazilganlik toʻgʻrisidagi guvohnoma oʻz kuchini yoʻqotgan deb hisoblanadi.

Roʻyxatga olish toʻgʻrisidagi arizada ommaviy axborot vositasining:

1) muassisi (muassislari);

2) nomi, qaysi tilda (tillarda) eʼlon qilinishi, manzili;

3) maqsad va vazifalari;

4) qanday doiradagi oʻquvchiga (tomoshabinga, tinglovchiga) moʻljallanganligi;

5) davriyligi, hajmi, moddiy-texnika taʼminoti hamda pul bilan taʼminlanish manbalari koʻrsatilishi kerak.

Koʻrsatilgan maʼlumotlarda oʻzgarish boʻlsa, ommaviy axborot vositasi belgilangan tartibda qayta roʻyxatdan oʻtkazilishi shart. Oʻzgartishlar jiddiy boʻlmagan hollarda roʻyxatga oluvchi organ ommaviy axborot vositasini qayta roʻyxatdan oʻtkazish shart emasligi toʻgʻrisida qaror qabul qilishi mumkin.

Roʻyxatga olish va qayta roʻyxatdan oʻtkazish uchun haq qonun hujjatlarida belgilanadigan tartib va miqdorlarda undiriladi.

Oʻzlarining normativ hujjatlari yoki oʻzga hujjatlarni rasmiy nashrlarda, axborotnomalar, byulletenlarda chiqaruvchi davlat hokimiyati va boshqaruv organlari, shuningdek oʻz faoliyatlari uchun zarur boʻlgan axborot materiallarini hamda hujjatlarni chiqaruvchi korxonalar, muassasalar, tashkilotlar (shu jumladan, oʻquv va ilmiy muassasalar) axborotni roʻyxatdan oʻtkazmagan holda tarqatish huquqiga egadirlar.

Ommaviy tarqatishga moʻljallanmagan yoki qoʻlyozma tarzida koʻpaytiriladigan bosma, video va audiovizual mahsulotni texnikaviy vositalar yordamida tayyorlash ishlarini, agar qonun hujjatlarida boshqacha tartib nazarda tutilgan boʻlmasa, roʻyxatdan oʻtkazilish talab qilinmaydi.

Ommaviy axborot vositasini roʻyxatga olish quyidagi hollarda rad etilishi mumkin:

1) ommaviy axborot vositasining maqsad va vazifalari Oʻzbekiston Respublikasi Konstitutsiyasiga hamda ushbu Qonunga zid boʻlsa;

2) bundan avval xuddu shu nomdagi ommaviy axborot vositasi roʻyxatga olingan boʻlsa;

3) ariza sudning ommaviy axborot vositasi faoliyatini tugatish toʻgʻrisidagi hal qiluv qarori qonuniy kuchga kirganiga bir yil toʻlmay berilgan boʻlsa;

4) ommaviy axborot vositasi muassisning yoki muassislaridan birining yoxud noshirning manzili Oʻzbekiston Respublikasi hududidan tashqarida joylashgan boʻlsa.

Ommaviy axborot vositasini roʻyxatga olish rad etilgan taqdirda bunga asos boʻlgan sabab koʻrsatilgan holda arizachiga yozma maʼlumot yuboriladi.

Ommaviy axborot vositasini chiqarish yoki nashr etish muassisning yoki ommaviy axborot vositasini roʻyxatga olgan organning yoxud sudning qarori bilan tugatilishi mumkin.

Muassis ommaviy axborot vositasini chiqarishni yoki nashr etishni tugatish toʻgʻrisidagi qaror qabul qilgan taqdirda muharrir (bosh muharrir) yoki tahririyat xodimi ushbu Qonunning 9-moddasiga muvofiq xuddi shu nomda ommaviy axborot vositasi taʼsis etish masalasini qoʻyishi mumkin. Bunday hollarda ommaviy axborot vositasini qayta roʻyxatdan oʻtkazish talab etiladi.

Davlat organi tomonidan ommaviy axborot vositasini roʻyxatga olishning rad etilishi, shuningdek ommaviy axborot vositasi faoliyatini tugatish toʻgʻrisidagi qaror ustidan ommaviy axborot vositasining muassisi yoki tahririyati sudga shikoyat qilishi mumkin.

Ommaviy axborot vositasi oʻz faoliyatini muassis tasdiqlaydigan ustav (nizom) asosida yuritadi.

Ommaviy axborot vositasining ustavi (nizomi) tahririyat xodimlari umumiy miqdorining kamida uchdan ikki qismi ishtirokidagi umumiy yigʻilishida koʻpchilik ovoz bilan qabul qilinadi va muassis tomonidan tasdiqlanadi.

Ustavda (nizomda) muassis, muharrir (bosh muharrir) va tahririyat xodimlarining vakolatlari belgilanadi va ommaviy axborot vositasining muassisi, nomi, qaysi tilda (tillarda) eʼlon qilinishi, manzili, faoliyat turi va maqsadlari, tahririyat mol-mulki manbai hamda foydani (daromadni) taqsimlash tartibi, nashrni qayta tashkil etish va tugatish shartlari koʻrsatiladi.

Ustav (nizom) Oʻzbekiston Respublikasining qonun hujjatlariga zid kelmasligi kerak.

Muharrir (bosh muharrir) ommaviy axborot vositasi tahririyati, tahrir hayʼati ishiga rahbarlik qiladi, muassis bilan munosabatlarda ommaviy axborot vositasi nomidan ish olib boradi.

Muharrirni (bosh muharrirni) lavozimga tayinlash va lavozimdan ozod etish tartibi ustavda (nizomda) belgilab qoʻyiladi.

Tahrir hayʼati ommaviy axborot vositasi ustavida (nizomida) nazarda tutilgan tartibda tuziladi. Ommaviy axborot vositasining muassisi, tahririyati va noshiri oʻrtasidagi ishlab chiqarish, mulkiy, moliyaviy va boshqa munosabatlar qonun hujjatlari bilan tartibga solinadi.

Oʻzbekiston Respublikasining yuridik va jismoniy shaxslari ommaviy axborot vositalariga homiylik qilishi mumkin. Ommaviy axborot vositalari bilan homiylar oʻrtasidagi munosabatlar qonun hujjatlari bilan tartibga solinadi.

Homiylarning ommaviy axborot vositalari va ular xodimlarining kasb faoliyatiga aralashuvi taqiqlanadi.

Davriy nashrning har bir sonida quyidagi maʼlumotlar koʻrsatilishi kerak:

1) nashrning nomi;

2) tahririyatning manzili;

3) muassis (muassislar)ning nomi;

4) muharrirning (bosh muharrirning) familiyasi, ismi-sharifi;

5) davriy nashrning roʻyxatga olingan tartib raqami hamda bosilib chiqqan sanasi, gazetalarning esa, shuningdek, chop etishga ruxsat berilib, imzo qoʻyilgan vaqti;

6) aloqa korxonalari orqali tarqatiladigan davriy nashrlar uchun indeks raqami;

7) tiraji;

8) bosmaxonaning nomi va manzili.

Televideniye, radioeshittirish tahririyati har safar efirga chiqqanda, uzluksiz eshittirish chogʻida esa, bir kecha-kunduzda kamida toʻrt marta televideniye, radioeshittirish tahririyati nomini eʼlon qilishi shart.

Davriy bosma nashrlarning nazorat nusxalari tahririyatga, muassisga va roʻyxatga oluvchi organga bepul yuboriladi.

Davriy bosma nashrlarning taqdim etilishi shart boʻlgan nusxalari yuboriladigan tashkilotlar va muassasalarning roʻyxati Oʻzbekiston Respublikasi Hukumati tomonidan belgilanadi.

Televideniye, radioeshittirish tahririyatlari telekoʻrsatuvlar va radioeshittirishlar materiallarini (plyonkalarni) ular efirga berilganidan soʻng bir oy davomida saqlab turishlari, oldindan yozib olmay, toʻgʻridan toʻgʻri efirga beriladigan koʻrsatuvlar va eshittirishlarni roʻyxatga olish daftarini yuritishlari, ularning mavzui, namoyish etilgan (efirga berilgan) kuni, boshlangan va tugagan vaqti, ularni olib borgan kishining familiyasi va ismini qayd etib borishlari shart.

Telekoʻrsatuvlar va radioeshittirishlarni roʻyxatga olish daftari unga soʻnggi yozuv kiritilgan kundan boshlab bir yil davomida saqlanadi. Tarixiy, ilmiy, madaniy va boshqa yoʻsindagi ahamiyatga molik materiallar qonun hujjatlarida belgilanadigan tartibda saqlanishi kerak.

Ommaviy axborot vositalarining mahsulotlarini bevosita noshirning va tahririyatning oʻzi yoki shartnoma asosida aloqa korxonalari, boshqa yuridik va jismoniy shaxslar tarqatishi mumkin.

Ommaviy axborot vositasining har bir alohida sonini tarqatishga muharrir (bosh muharrir) uni chop etishga (efirga berishga) ruxsat etganidan keyingina yoʻl qoʻyiladi.

Oʻzbekiston Respublikasi hududida xorijiy mamlakatlar ommaviy axborot vositalari mahsulotlarini tarqatish Oʻzbekiston Respublikasi tegishli qonun hujjatlari va xalqaro shartnomalar qoidalari asosida amalga oshiriladi.

Davlat hokimiyati va boshqaruv organlari tomonidan taʼsis etilgan ommaviy axborot vositalari mazkur organlarning rasmiy xabarlarini eʼlon qilishlari shart.

Favqulodda vaziyatlar toʻgʻrisidagi shoshilinch xabarlar yoki davlatning vakolatli organlari tomonidan omma eʼtiboriga zudlik bilan yetkazish maqsadida berilgan xabarlar barcha ommaviy axborot vositalarida eʼlon qilinadi.

Sudning aynan shu ommaviy axborot vositasida eʼlon qilish toʻgʻrisidagi koʻrsatmasi boʻlgan, qonuniy kuchga kirgan hal qiluv qarorini tahririyat koʻrsatilgan muddatda bepul eʼlon qilishi shart.

Boshqa har qanday xabar, axborot va eʼlonlar tahririyat bilan oʻzaro shartnoma tuzish asosida eʼlon qilinadi.

Ommaviy axborot vositalarida tegishli qonun hujjatlariga asoslangan holda jurnalistika, adabiyot, sanʼat asarlaridan va ilmiy asarlardan foydalanilishiga yoʻl qoʻyiladi.

Tahririyatga kelgan xatlarni eʼlon qilishga tayyorlash chogʻida mazmunini buzmagan holda ularning matnini qisqartirish va tahrir etishga yoʻl qoʻyiladi.

Tahririyat qonuniy asoslarda rad etgan materialni ommaviy axborot vositasida majburan eʼlon qildirishga hech kimning haqqi yoʻq.

Yuridik yoki jismoniy shaxs ommaviy axborot vositasida eʼlon qilingan, haqiqatga toʻgʻri kelmaydigan va oʻzining shaʼni hamda qadr-qimmatiga dogʻ tushiradigan maʼlumotlar boʻyicha raddiya berishni tahririyatdan talab qilishga haqlidir.

Eʼlon qilingan material tufayli huquqlari va qonuniy manfaatlari buzilgan yuridik va jismoniy shaxslar oʻz raddiyasini mazkur ommaviy axborot vositasi orqali eʼlon qilishga haqlidir. Raddiya yoki javob maxsus ruknda yoxud ana shunga sabab boʻlgan material bosilgan ayni oʻsha sahifada eʼlon qilinishi shart. Raddiya yoki javob gazetalarda ular kelgan kundan eʼtiboran bir oy muddat ichida, boshqa davriy nashrlarda esa navbatdagi sonda eʼlon qilinadi.

Olingan raddiya yoki javob radioeshittirish yoki televideniye tahririyati tomonidan radioeshittirish yoxud telekoʻrsatuvning ayni oʻsha dasturi yoki turkumida, kelgan kunidan eʼtiboran bir oy muddat ichida eʼlon qilinadi.

Asosli va odob doirasidagi javob matnini, agar uni eʼlon qilish hajm yoki vaqt nuqtai nazaridan ommaviy axborot vositasining faoliyatiga zarar yetkazmasa, tahrir qilishga yoʻl qoʻyilmaydi.

Ommaviy axborot vositasi raddiya yoki javobni eʼlon qilishdan bosh tortsa yoxud ularni eʼlon qilish uchun belgilab qoʻyilgan muddatni buzsa, yuridik yoki jismoniy shaxs daʼvo bilan sudga murojaat qilishga haqlidir.

Ommaviy axborot vositalari toʻgʻrisidagi qonun hujjatlari talablarini buzishda aybdor deb topilgan shaxslar belgilangan tartibda javobgar boʻladilar.

Muharrir (bosh muharrir), shuningdek, jurnalist ommaviy axborot vositasida haqiqatga toʻgʻri kelmaydigan materiallarni tarqatganlik uchun, agar maʼlumotlar: rasmiy xabarlardan olingan boʻlsa; axborot agentliklari yoki davlat organlarining matbuot xizmati orqali olingan boʻlsa yoxud muallifning oldindan yozib olinmay, toʻgʻridan toʻgʻri efirga berilayotgan nutqlarida aytilgan boʻlsa, javobgar boʻlmaydilar.

Chet el ommaviy axborot vositalari vakolatxonalari va vakillari Oʻzbekiston Respublikasida faoliyatni Oʻzbekiston Respublikasi Tashqi ishlar vazirligida akkreditatsiyadan oʻtganlaridan keyin amalga oshiradilar.

Oʻzbekiston Respublikasida akkreditatsiya qilingan chet el ommaviy axborot vositalari vakolatxonalari va vakillarining huquqiy maqomi va kasb faoliyatini amalga oshirish shartlari qonun hujjatlari bilan belgilanadi.

Agar Oʻzbekiston Respublikasining xalqaro shartnomasida Oʻzbekiston Respublikasining ommaviy axborot vositalari toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.