Oʻzbekiston Respublikasi Prezidentining 2005-yil 28-fevraldagi R-2146-sonli Farmoyishining 8-bandiga muvofiq, Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlim markazi, Vazirlar Mahkamasi huzuridagi Davlat test markazi va Mehnat va aholini ijtimoiy muhofaza qilish vazirligi qaror qiladi:

1. “Akademik litsey va kasb-hunar kollejlari direktor oʻrinbosarlari, pedagog va muhandis-pedagog kadrlari attestatsiyasi toʻgʻrisida”gi nizomning yangi tahriri ilovaga muvofiq tasdiqlansin.

2. Mazkur qaror kuchga kirgan kundan eʼtiboran Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlim markazi, Vazirlar Mahkamasi huzuridagi Davlat test markazi va Mehnat va aholini ijtimoiy muhofaza qilish vazirligining 2002-yil 3-yanvardagi 4,18 va 18-son qarori bilan tasdiqlangan (2002-yil 4-yanvar, roʻyxat raqami 1094) “Oʻrta maxsus, kasb-hunar taʼlimi tizimi rahbarlar tarkibini, pedagog va muhandis-pedagog kadrlarini attestatsiyadan oʻtkazish toʻgʻrisida”gi nizom va Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlim markazi, Vazirlar Mahkamasi huzuridagi Davlat test markazi va Mehnat va aholini ijtimoiy muhofaza qilish vazirligining 2002-yil 24-apreldagi 10, 293 va 22-son qarori bilan tasdiqlangan (2002-yil 14-may, roʻyxat raqami 1094-1) nizomga kiritilgan qoʻshimcha va oʻzgartirishlar oʻz kuchini yoʻqotgan deb hisoblansin.

3. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiritilsin.

Mazkur Nizom Oʻzbekiston Respublikasi Mehnat kodeksi, “Taʼlim toʻgʻrisida”gi Qonuni, Kadrlar tayyorlash milliy dasturi, Oʻzbekiston Respublikasi Prezidentining 2005-yil 28-fevraldagi R–2146-son “Akademik litsey va kasb-hunar kollejlari direktorlari attestatsiyasi toʻgʻrisida”gi Farmoyishi, Oʻzbekiston Respublikasi Vazirlar Mahkamasining 2004-yil 24-iyundagi 293-son “Oʻzbekiston Respublikasi Vazirlar Mahkamasi huzuridagi Davlat test markazi faoliyatini takomillashtirish toʻgʻrisida”gi va 2001-yil 4-oktabrdagi 400-son “Oʻrta maxsus, kasb-hunar taʼlimi muassasalari uchun pedagog kadrlar tayyorlash tizimini takomillashtirish chora-tadbirlari toʻgʻrisida”gi qarorlari asosida ishlab chiqilgan boʻlib, akademik litsey va kasb-hunar kollejlarining direktor oʻrinbosarlari, pedagog va muhandis-pedagog kadrlari (keyingi oʻrinlarda — direktor oʻrinbosarlari va pedagoglar) attestatsiyasini tashkil etish va oʻtkazish tartibini belgilaydi.

Direktor oʻrinbosarlari va pedagoglar attestatsiyasi ularning Oʻzbekiston Respublikasi “Taʼlim toʻgʻrisida”gi Qonuni, Kadrlar tayyorlash milliy dasturi, Davlat taʼlim standartlari, respublikada amalga oshirilayotgan siyosiy, ijtimoiy-iqtisodiy islohotlarning bajarilishini taʼminlashdagi faolligi, taʼlim muassasasida olib borilayotgan maʼnaviy-maʼrifiy, tarbiyaviy ishlar sifati va egallab turgan lavozimlariga muvofiqligini aniqlash, taʼlim muassasalarida taʼlim-tarbiya jarayonini takomillashtirish, kasb mahoratlari oʻsishini ragʻbatlantirish, taʼlim-tarbiya, maʼnaviy-maʼrifiy yoʻnalishlardagi mehnati natijalarini xolis baholash maqsadida oʻtkaziladi.

1. Direktor oʻrinbosarlari va pedagoglar attestatsiyasi vakolatli organ — Oʻzbekiston Respublikasi Vazirlar Mahkamasi huzuridagi Davlat test markazi (keyingi oʻrinlarda — DTM) tarkibidagi Kadrlar tayyorlash sifatini nazorat qilish, pedagog kadrlar va taʼlim muassasalari attestatsiyasi boshqarmasi tomonidan ishlab chiqilgan jadvallar asosida tashkil etiladi va oʻtkaziladi.

2. Akademik litsey va kasb-hunar kollejlari (keyingi oʻrinlarda — taʼlim muassasalari) direktor oʻrinbosarlari va pedagoglari attestatsiyadan 3 yilda bir marta oʻtkaziladi.

3. Attestatsiya komissiyasining tarkibi 7 kishidan iborat tuziladi va DTM buyrugʻi bilan tasdiqlanadi.

Tarkibning 5 nafar aʼzosi qatnashgan taqdirda komissiya vakolatli hisoblanadi.

4. Attestatsiya komissiyasi ehtiyojga koʻra qoʻshimcha mutaxassislar jalb qilishi mumkin.

5. Komissiya raisi va kotibi DTM ekspertlaridan, komissiya raisi oʻrinbosari esa Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazi (keyingi oʻrinlarda — Markaz) yoki boʻysunuvida taʼlim muassasasi mavjud boʻlgan vazirlik yoki idora mutaxassislaridan tayinlanadi.

Attestatsiya komissiyasi tarkibiga DTM ekspertlari, Markaz yoki uning hududiy boshqarmalari vakillari, shuningdek boʻysunuvida taʼlim muassasasi mavjud boʻlgan vazirlik yoki idora vakillari kiritilishi mumkin.

Attestatsiya jarayonida mahalliy hokimiyat va jamoatchilik tashkilotlari vakillari, kasaba uyushma xodimlari ovoz berish huquqiga ega boʻlmagan holda, kuzatuvchi sifatida ishtirok etishlari mumkin.

6. Attestatsiya komissiyalarining faoliyat koʻrsatish muddati DTM tomonidan belgilanadi. Zarur hollarda komissiyalar tarkibiga oʻzgartirishlar DTM buyrugʻi bilan kiritilishi mumkin.

7. Oʻrindoshlik boʻyicha ishlayotgan pedagoglar asosiy ish joyida attestatsiyadan oʻtadilar.

Korxona, tashkilot va idora xodimlari oʻrindoshlik asosida ishlayotgan taʼlim muassasasida attestatsiyadan oʻtkaziladi.

8. Oʻrta maxsus, kasb-hunar taʼlimi hududiy boshqarmasi (keyingi oʻrinlarda — hududiy boshqarma) va taʼlim muassasalari rahbariyati attestatsiya jarayonini tashkil etishga masʼul hisoblanadilar.

9. Attestatsiyadan oʻtuvchi direktor oʻrinbosarlari va pedagoglar attestatsiya komissiyasiga quyidagi hujjatlarni taqdim etadilar:

kadrlarni hisobga olish shaxsiy varaqasi;

maʼlumoti, ilmiy daraja va unvoni (mavjud boʻlsa) toʻgʻrisidagi hujjatlarning nusxalari;

toifasi haqida maʼlumot (buyruqdan koʻchirma);

soʻnggi 3 yilda nashr etilgan ilmiy, oʻquv-metodik ishlari, ixtirolari va maqolalari roʻyxati (mavjud boʻlsa);

malaka oshirganlik toʻgʻrisidagi guvohnoma (sertifikat) nusxasi;

attestatsiyadan oʻtuvchining oxirgi 3 yildagi oʻquv, uslubiy, ilmiy va maʼnaviy-maʼrifiy yoʻnalishlar boʻyicha olib borgan ishlari hisoboti;

taʼlim muassasasini rivojlantirish borasidagi ishlari va kelgusidagi rejalari toʻgʻrisida qisqacha maʼlumot (direktor oʻrinbosarlari uchun).

Attestatsiya komissiyalari attestatsiyadan oʻtuvchining ish faoliyatiga oid qoʻshimcha maʼlumotlar soʻrash huquqiga ega.

Komissiyaga taqdim etilgan hujjatlar taʼlim muassasasi direktori (rahbari) tomonidan imzolanadi. Hujjatlardagi maʼlumotlarning asosliligiga imzo qoʻygan shaxs masʼul hisoblanadi.

10. Direktor oʻrinbosarlari va pedagoglarni attestatsiyadan oʻtkazish toʻgʻrisidagi rasmiy xabar va attestatsiya oʻtkazish jadvali attestatsiya boshlanishidan 1 oy oldin DTM tomonidan hududiy boshqarmalarga va taʼlim muassasalariga yuboriladi.

11. Lavozimiga tanlov asosida yangi qabul qilingan direktor oʻrinbosarlari va pedagoglar uch yildan keyin navbatdagi attestatsiyaga jalb qilinadi.

12. Homilador yoki farzandi 3 yoshga toʻlmagan pedagog ayollar attestatsiyaga jalb qilinmaydi.

13. Pedagog kadrlar tayanch maʼlumoti yoki qayta tayyorlash muassasalarida olgan mutaxassisligi boʻyicha attestatsiyadan oʻtkaziladi.

14. Taʼlim muassasalarida faoliyat koʻrsatayotgan xorijiy davlatlar pedagoglari attestatsiyaga jalb qilinmaydi.

15. Taʼlim muassasasining rahbariyati:

attestatsiyadan oʻtuvchilar roʻyxatini tuzadi, ular haqida tegishli buyrugʻini rasmiylashtiradi;

attestatsiyadan oʻtuvchilarning hujjatlarini tayyorlaydi va ularga tavsifnomalar yozadi;

har bir attestatsiyadan oʻtuvchi uchun alohida yigʻma jild (9-bandga asosan) tayyorlaydi;

attestatsiyadan oʻtuvchilarga attestatsiyaning tartibi va qoidalarini tushuntirish uchun seminarlar oʻtkazadi va ularning attestatsiyada toʻliq qatnashishini taʼminlaydi;

attestatsiyada qatnasha olmaydiganlar roʻyxatini tuzadi va ularning sababini aniqlaydi;

attestatsiya jarayonini oʻtkazishga zarur shart-sharoitlarni yaratadi.

16. Direktor oʻrinbosarlari attestatsiyasi quyidagicha tashkil etiladi:

direktor oʻrinbosarlarining faoliyatlari, mansab vazifalaridan kelib chiqqan holda, ularning oxirgi attestatsiyadan keyingi yillardagi oʻquv-uslubiy, ilmiy-tadqiqot hamda maʼnaviy-maʼrifiy va tarbiyaviy ishlari, shuningdek taʼlim muassasasini rivojlanish surʼatiga qoʻshgan hissasining aniq statistik maʼlumotlarini oʻrganish asosida tahlil qilinadi;

mansab vazifalarida belgilangan masalalar boʻyicha test sinovi va suhbatdan oʻtkaziladi. Suhbat jarayonida berilgan savol va javoblar maxsus (sahifalangan, bogʻlangan, muhrlangan) jurnalda qayd etiladi.

17. Taʼlim muassasasini rivojlantirish surʼatini belgilovchi koʻrsatgichlarga quyidagilar kiradi: bitiruvchilarning bilim darajasi, taʼlim muassasasidagi oʻquv-uslubiy, ilmiy-tadqiqot ishlarining tashkil etilish darajasi, oʻquvchilarning xalqaro va respublika olimpiadalari, sport musobaqalari, maʼnaviy-maʼrifiy yoʻnalishlar boʻyicha koʻriklardagi natijalari, bitiruvchilarining ishga (oʻqishga) joylashishi, oʻqituvchilar, iqtidorli va kam taʼminlangan oʻquvchilarni ijtimoiy himoyalash boʻyicha olib borilgan ishlar, taʼlim muassasasi moddiy-texnik bazasi, fan va ishlab chiqarish bilan integratsiyasi, tadbirkorlik faoliyati, xorijiy taʼlim muassasalari bilan hamkorlik masalalari.

18. Pedagog kadrlar attestatsiyasi jarayonida quyidagi ishlar amalga oshiriladi:

pedagog kadrning oxirgi attestatsiyadan keyingi yillardagi oʻquv, ilmiy, maʼnaviy-maʼrifiy va tarbiyaviy ishlar boʻyicha faoliyati oʻrganiladi;

pedagog kadrlar oʻz mutaxassisligi, lavozim vazifalari va meʼyoriy-huquqiy, maʼnaviy-maʼrifiy masalalar boʻyicha malaka sinovi (test, yozma yoki ijodiy ish) va suhbatdan oʻtkaziladi. Suhbat jarayonida berilgan savol va javoblar maxsus (sahifalangan, bogʻlangan, muhrlangan) jurnalda qayd etiladi.

19. Attestatsiya komissiyasi direktor oʻrinbosari va pedagoglar faoliyati haqidagi maʼlumotlar, malaka sinovi (test, yozma yoki ijodiy ish) va suhbat natijalari asosida umumiy xulosani qabul qiladi.

Umumiy xulosalar komissiya aʼzolarining ochiq ovoz berishi yoʻli bilan aniqlanadi. Ovozlar teng boʻlganda komissiya raisining ovozi hal qiluvchi hisoblanadi.

Attestatsiya komissiyasining xulosasi attestatsiyadan keyin eʼlon qilinadi.

20. Komissiya attestatsiya natijalariga koʻra:

direktor oʻrinbosarlari haqida “Attestatsiyadan oʻtdi” yoki “Attestatsiyadan oʻtmadi”;

pedagoglar haqida “Attestatsiyadan oʻtdi”, “Attestatsiyadan shartli oʻtdi” yoki “Attestatsiyadan oʻtmadi” deb xulosa chiqaradi.

21. “Attestatsiyadan oʻtdi” deb eʼtirof etilgan direktor oʻrinbosarlari va pedagoglar egallab turgan lavozimiga loyiq deb topiladi.

22. “Attestatsiyadan shartli oʻtdi” deb eʼtirof etilgan pedagoglar kamida 6 oydan soʻng qayta attestatsiyadan oʻtkaziladi.

23. “Attestatsiyadan oʻtmadi” deb eʼtirof etilgan direktor oʻrinbosarlari va pedagoglar Mehnat kodeksining 100-moddasi 2-bandiga asosan egallab turgan lavozimidan ozod qilinadi.

24. Tayanch maʼlumoti dars berayotgan faniga mos kelmaydigan pedagog kadrlar qayta tayyorlash kurslaridan oʻtmagan boʻlsa, attestatsiyaga qoʻyilmaydi.

25. Tayanch maʼlumoti dars berayotgan faniga mos kelmasdan attestatsiyaga qoʻyilmagan pedagoglarga, tegishli taʼlim muassasasi rahbari oʻz mutaxassisligiga oʻtishni hamda qayta tayyorlash kursiga borishni taklif qiladi. Ushbu takliflarga rozi boʻlmaganda amaldagi qonunchilik asosida u bilan mehnat shartnomasi bekor qilinadi.

26. Attestatsiya qilinuvchi attestatsiyaga uzrli sabab bilan kelmagan taqdirda, uning attestatsiyasi boshqa muddatga koʻchiriladi. Attestatsiyaga uzrsiz sababga koʻra qatnashmagan direktor oʻrinbosarlari va pedagog “Attestatsiyadan oʻtmadi” deb hisoblanadi.

27. Attestatsiya komissiyasining xulosa (baho va tavsiya)lari ilovaga muvofiq attestatsiya varaqasida qayd etiladi va bayonnoma bilan rasmiylashtiriladi.

Attestatsiya varaqalari va bayonnomalarga oʻzgartirish kiritish qatʼiyan man etiladi.

Attestatsiya varaqasi xodimning shaxsiy hujjatlariga qoʻshib qoʻyiladi, bayonnomaning birinchi nusxasi DTMda saqlanadi.

28. Attestatsiya natijalari boʻyicha komissiya hisobot tayyorlaydi va DTMga taqdim etadi.

29. “Direktor oʻrinbosari va pedagoglar attestatsiyasi toʻgʻrisidagi mehnat nizolari qonunchilikda belgilangan tartibda koʻrib chiqiladi.