Oʻzbekiston Respublikasi Oliy Majlisining Senati Oʻzbekiston Respublikasi Vazirlar Mahkamasi tomonidan kiritilgan Budjetnomani, shu jumladan asosiy makroiqtisodiy koʻrsatkichlar prognozini, Oʻzbekiston Respublikasining 2016-yilgi Davlat budjeti, davlat maqsadli jamgʻarmalarining budjetlari hamda soliq va budjet siyosatining asosiy yoʻnalishlari konsepsiyasining loyihalarini koʻrib chiqib, “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 8-moddasiga hamda Oʻzbekiston Respublikasi Budjet kodeksining 97-moddasiga muvofiq qaror qiladi:

1. Oʻzbekiston Respublikasi Oliy Majlisi Qonunchilik palatasining 2015-yil 11-noyabrda qabul qilingan “Oʻzbekiston Respublikasining 2016-yilgi Davlat budjeti, davlat maqsadli jamgʻarmalarining budjetlari hamda soliq va budjet siyosatining asosiy yoʻnalishlari toʻgʻrisida”gi 276-III-sonli Qarori maʼlumot uchun qabul qilinsin.

2. Oʻzbekiston Respublikasining 2016-yilgi Davlat budjeti, davlat maqsadli jamgʻarmalarining budjetlari hamda soliq va budjet siyosatining asosiy yoʻnalishlari qabul qilinsin, shuningdek Oʻzbekiston Respublikasi Davlat budjeti taqchilligining eng yuqori darajasi yalpi ichki mahsulot hajmiga nisbatan 1,0 foiz miqdorida belgilansin.

3. Oʻzbekiston Respublikasi Vazirlar Mahkamasi:

iqtisodiyotning barqaror oʻsishini ragʻbatlantirishga, aholi farovonligini oshirishga va inflatsiya darajasini maqsadli prognoz koʻrsatkichlari doirasida saqlashga qaratilgan samarali chora-tadbirlarni koʻrsin;

maʼmuriy toʻsiq va cheklovlarni bartaraf etish, davlatning iqtisodiyotdagi ishtirokini kamaytirish orqali xususiy mulkning roli va oʻrnini yuksaltirishga, kichik biznes va xususiy tadbirkorlikni har tomonlama qoʻllab-quvvatlash va ularning ishonchli himoya qilinishini taʼminlash hamda yalpi ichki mahsulotdagi ulushini yanada koʻpaytirishga doir islohotlarni davom ettirsin;

iqtisodiyotga va aholi daromadlariga tushadigan soliq yukini yanada kamaytirishga, xoʻjalik yurituvchi subyektlar faoliyatida uning ragʻbatlantiruvchi rolini oshirishga qaratilgan soliq hamda pul-kredit siyosatini izchil amalga oshirishga doir chora-tadbirlar koʻrilishini taʼminlasin;

aholining turmush sifatini yaxshilashga qaratilgan axborot-kommunikatsiya tizimlarini, yoʻl-transport va muhandislik-kommunikatsiya qurilishini, uy-joy-kommunal xoʻjaliklarini rivojlantirish surʼatlarini tezlashtirish hamda kengaytirishga, shuningdek sugʻoriladigan yerlarning meliorativ holatini yanada yaxshilash va suv resurslaridan oqilona foydalanishga doir dasturlarning roʻyobga chiqarilishini jadallashtirsin;

zamonaviy texnologiyalarni ildam surʼatlarda rivojlantirish va modernizatsiyalashni, faol oʻzlashtirish hamda joriy etishni, shuningdek jahon bozorida teng raqobatlasha oladigan tarmoq va korxonalarni aniq yoʻnaltirilgan holda qoʻllab-quvvatlashni taʼminlasin;

korporativ boshqaruv tizimining prinsip va yondashuvlaridagi oʻzgarishlar davom ettirilishini, ishlab chiqarish, tashqi iqtisodiy va investitsiya jarayonlariga zamonaviy xalqaro korporativ menejment standartlarining joriy etilishini, korporativ boshqaruvning namunaviy tuzilmalari yaratilishini taʼminlasin;

ishlab chiqarishning mahalliylashtirilishini yanada chuqurlashtirish, tarmoqlararo sanoat kooperatsiyasini kengaytirish, ichki talabni shakllantirish va bozorni zarur isteʼmol tovarlari hamda butlovchi buyumlar bilan toʻldirish, aholini ish bilan taʼminlash muammolarini hal qilish yuzasidan chora-tadbirlar koʻrsin;

muhtoj oilalarning maqsadli ijtimoiy qoʻllab-quvvatlanishini kuchaytirish orqali keksa yoshdagi insonlar va nogironlarni har tomonlama qoʻllab-quvvatlash hamda ularga doimo eʼtibor berish chora-tadbirlarini davom ettirsin;

2016-yilning 1-yanvar holatiga koʻra aylanma kassa mablagʻining zarur miqdoridan ortiq boʻlgan respublika budjetining boʻsh qoldiqlari va boshqa noinflatsion manbalar hisobidan Oʻzbekiston Respublikasi Davlat budjetining taqchilligini moliyalashtirsin.

4. Mahalliy davlat hokimiyati organlari Oʻzbekiston Respublikasining 2016-yilgi Davlat budjeti, davlat maqsadli jamgʻarmalari daromadlari va xarajatlarining tasdiqlangan tegishli parametrlari bajarilishini taʼminlasin, mintaqalarning iqtisodiy salohiyatini oshirish yuzasidan zarur chora-tadbirlar koʻrsin, budjet mablagʻlaridan manzilli, maqsadli va samarali foydalanilayotganligi ustidan qatʼiy nazorat oʻrnatsin.

5. Ushbu Qaror qabul qilingan kundan eʼtiboran kuchga kiradi.